Kadr ź filma
Šachmatystka Nona Hapryndašvili, jakaja stała ŭ 1976 hodzie pieršaj u historyi žančynaj-hrosmajstram, padała pazoŭ da kampanii Netflix, patrabujučy $ 5 młn u jakaści kampiensacyi za «razburalnuju chłuśniu, jakaja padryvaje i prynižaje jaje dasiahnieńni pierad šmatmiljonnaj aŭdytoryjaj», paviedamlaje vydańnie The New York Times.
Hapryndašvili patrabuje vyklučyć ź sieryjała frazy ab tym, što jana nikoli nie hulała ŭ šachmaty z mužčynami. Pavodle infarmacyi vydańnia, savieckuju čempijonku aburyli słovy, skazanyja, pa siužecie, padčas finalnaha matču ŭ Maskvie.
«Adzinaje, što ŭ joj niezvyčajnaha, — heta jaje poł, ale navat heta nie źjaŭlajecca čymści ŭnikalnym u Rasii. Jość Nona Hapryndašvili, ale jana čempijonka śvietu siarod žančyn i nikoli nie hulała z mužčynami», — kaža kamientatar padčas matču Bet Charman z savieckim šachmatystam Borhavym.
U pazovie, padadzienym pradstaŭnikami Nony Hapryndašvili, havorycca, što ŭ 1968 hodzie, kali pa siužecie sieryjała adbyŭsia matč Charman—Borhaŭ, šachmatystka zhulała jak minimum z 59 mužčynami, u tym liku i z hrosmajstrami, uklučajučy Drahaluba Vielimiraviča, Śvietłazara Hlihoryča, Paŭla Kieresa, Barysa Spaskaha i Michaiła Tala — apošnija dvoje stanavilisia čempijonami śvietu.
Fraza ab Nonie «źjaŭlajecca vidavočna iłžyvaj, a taksama žudasna seksisckaj i źnievažalnaj», śćviardžajuć advakaty. 80-hadovaja šachmatystka ličyć, što stvaralniki sieryjała achviaravali jaje reputacyjaj dziela zališniaj dramatyzacyi i pryŭniasieńnia ŭnikalnaści ŭ bijahrafiju vydumanaha piersanaža.
Stryminhavy servis Netflix užo adkazaŭ na pazoŭ karotkaj zajavaj ab tym, što, niahledziačy na pavahu da Hapryndašvili i jaje bliskučaj karjery, Netflix nie zhodny z pazovam i budzie adstojvać svaju pravatu.
