Spadarožnik Starlink u načnym niebie. Fota depositphotos.com.
Mask śćviardžaje, što kampanija ŭžo dasłała 100 tysiač terminałaŭ dla dostupu da spadarožnikavaha internetu Starlink. Na siońnia karystacca sistemaj možna ŭ 14 krainach. Siarod ich ZŠA, Kanada, Brytanija, Aŭstralija i jašče 10 krain ES.
Adnak kiraŭnik SpaceX paviedamlaje, što dazvoł na licenziju dla Starlink zaraz razhladajecca ŭ šmatlikich inšych krainach, i kampanija spadziajecca chutka pašyryć svaju zonu dziejnaści na ŭvieś śviet. Na sajcie servisu isnuje mahčymaść papiaredniaha zakazu terminałaŭ. Siarod krain, dla jakich heta dastupna, jość navat dziaržava Ŭschodniaj Jeŭropy — Polšča. Havorki pra Biełaruś pakul nie idzie.
SpaceX pačali raspracoŭvać Starlink u 2015 hodzie, a pieršyja spadarožniki-pratatypy byli vyviedzienyja na arbitu ŭ 2018 hodzie. Zaraz ahulnaja kolkaść aparataŭ servisu na arbicie składaje 1737, chacia niekatoryja ź ich — heta pratatypy ci nie pracujučyja zaraz elemienty sistemy.
Meta Starlink nastupnaja: davać dostup da internetu, asabliva ŭ tych rajonach, dzie niama mahčymaści ažyćciavić vysokachutkasnaje šyrokapałosnaje padklučeńnie da internetu — naprykład, u sielskich rehijonach. Dla hetaha budučy klijent internetu ad Maska pavinien nabyć terminał koštam u 499 dalaraŭ, jaki vam dastaviać z ZŠA. U nabor uvachodziać spadarožnikavaja talerka, terminał dla pieraŭtvareńnia sihnała, maršrutyzatar Wi-Fi, 30-mietrovy kabiel i macavańni. Za sam dostup da internetu ad Starlink taksama treba budzie płacić — suma składzie 99 dalaraŭ u miesiac.
U śviecie isnuje nie tak šmat pravajdaraŭ, jakija pradastaŭlajuć spadarožnikavy internet. Zvyčajna ich aparaty raźmieščanyja na vyšyni da 40 tysiač kiłamietraŭ, i takaja vialikaja adlehłaść pamiž aparatam i naziemnaj antenaj vyklikaje mocnaje zatrymańnie sihnała. Spadarožniki Starlink znachodziacca na vyšyni ŭsiaho 550 kiłamietraŭ nad Ziamloj — ažno ŭ 65 razoŭ bližej da płaniety.
Siaredniaja chutkaść internetu ad Starlink — ad 50 da 150 miehabit u siekundu, to bok jana prykładna supadaje sa zvyčajnaj chutkaściu pravadnoha internetu. Maksimum chutkaści byŭ zarehistravany ŭ mai 2021 hoda ŭ Hiermanii, kali Starlink razahnaŭsia da 560 miehabit u siekundu. Isnuje navat śpiecyjalny mabilny dadatak, z dapamohaj jakoha karystalnik zmoža padabrać dla terminała toje miesca, dzie sihnał ad spadarožnika budzie samym mocnym.
Kab zabiaśpiečyć pakryćcio spadarožnikavym internetam usioj terytoryi Ziamli, prahramie Starlink, chutčej za ŭsio, spatrebicca vyvieści na arbitu nie mienš za 10 tysiač spadarožnikaŭ. Pry hetym pradstaŭniki SpaceX užo padavali ŭ mižnarodny rehulatarny orhan zapyt na dazvoł vyvieści na arbitu jašče kala 30 tysiač kaśmičnych aparataŭ.
Nie ŭsim heta padabajecca. Krytyki śćviardžajuć, što Mask adpraŭlaje svaje spadarožniki ŭ kosmas zanadta chutka i vyrašaje pytańnie niepaładak užo tady, kali aparaty znachodziacca ŭ kosmasie. U vyniku na ziamnoj arbicie, jakaja i tak zapoŭnienaja vialikaj kolkaściu aparataŭ, źjaŭlajucca spadarožniki, jakim moža spatrebicca ramont, a to i zamiena. Heta moža vyklikać sutyknieńni aparataŭ na arbicie.
Astranomy taksama majuć pretenzii da Starlink. Śćviardžajecca, što aparaty SpaceX takija jarkija, što ich možna bačyć ź Ziamli niaŭzbrojenym vokam, i heta pieraškadžaje śpiecyjalistam nazirać za inšymi niabiesnymi abjektami.
