«Heta baraćba na znos»
«Mnie niadaŭna ŭ instahram napisała dziaŭčyna, jakaja znachodzicca na chatniaj chimii, — raspaviała Śviatłana Cichanoŭskaja. — Jana napisała nie dla taho, kab raskazać, jak joj ciažka, a kab raskazać pra toje, što jana trymajecca, šukaje pracu, što jaje padtrymlivajuć siabry i nieznajomyja ludzi ź inšych krain. I napisała: «Ja vieru ŭ vas».
My razumiejem, što ŭnutry ludzi, sutykajučysia z žudasnym hvałtam, žachami turmaŭ, kryzisam, biaspraŭjem na pracy i biesčałaviečnym staŭleńniem, usio adno partyzaniać. Ludzi raspaŭsiudžvajuć samvydat, rychtujuć stačku, vałanciorać, dapamahajuć palitźniavolenym i ich siemjam.
I my [tyja, chto za miažoj] u paraŭnańni ź biełarusami ŭ krainie možam dziejničać bolš adkryta i adčuvać siabie ŭ bolšaj biaśpiecy. Minuły hod tamu dokaz».
Siarod hałoŭnych pytańniaŭ, jakija buduć abmiarkoŭvać štaby na kanfierencyi, — jak uzmacnić dapamohu biełarusam unutry krainy i zrabić hetu dapamohu rehularnaj, jak pašyryć palityčny i ekanamičny cisk na režym, trymać Biełaruś u mižnarodnaj paviestcy, jak supracoŭničać dyjasparam.
«Razumieju, što my pierajšli ŭ fazu zaciažnoha supraćstajańnia. Faktyčna heta baraćba na znos.
Razumieju, što mnohija stamilisia. Ciapier składana hienieravać novyja farmaty pracy, novyja idei. Sotni tysiač biełarusaŭ pakinuli dom, ale taksama sotni tysiač umacavali dyjasparu.
I jak by nam nie chaciełasia admaŭlać heta, my stali emihrantami ci rełakantami.
Ale tyja, chto nam supraćstajać, nie ŭličyli chod času, jany dumajuć, što, jak i raniej, fizičny adjezd roŭny źniknieńniu čałavieka i niemahčymaści praciahvać svaju baraćbu».
«Uźnikła realnaja pahroza straty suvierenitetu Biełarusi»
Pavieł Łatuška nahadaŭ pra hałoŭnyja mety demakratyčnych struktur. Pieršaje — vyzvaleńnie ŭsich palitviaźniaŭ i spynieńnie represij. Druhoje — pryciahnieńnie da adkaznaści vinavatych za złačynstvy suprać biełaruskaha naroda. Treciaje — praviadzieńnie novych demakratyčnych vybaraŭ.
«My znachodzimsia ŭ situacyi maštabnaj kontrataki na demakratyčnyja siły i hramadzianskija inicyjatyvy, skiravanaj na poŭnaje padaŭleńnie hramadzianskaj supolnaści.
Biełaruskaje hramadstva prachodzić etap psichałahičnych pieraŭtvareńniaŭ ad ejfaryi abjadnańnia da prahmatyzacyi i acenak realnaha stanu spraŭ i čakaje vyraznaj prahramy z boku demakratyčnych sił pa vychadzie ź situacyi, jakaja skłałasia.
Z ulikam dziejańniaŭ Kramla pa padtrymcy i finansavańni Łukašenki, uźnikła realnaja pahroza straty suvierenitetu Biełarusi».
Łatuška kaža, što jany buduć praciahvać sproby damahčysia niepryznańnia Łukašenki i jaho ŭradu na mižnarodnaj arenie.
«Pry hetym nie treba sumiaščać dva paniaćci — niepryznańnie Łukašenki i niepryznańnie dziaržavy. Mižnarodnaj pravavoj subjektnaści Biełaruś u hetaj suviazi nie hublaje i joj ničoha nie pahražaje», — ličyć kiraŭnik NAU.
Jon taksama ahučyŭ płany pravieści 11 kastryčnika ŭ Niurnbierhu kanfierencyju pa złačynstvach suprać čałaviečnaści.
«Treba stavić zadaču ab vykarystańni miechanizmu ŭniviersalnaj kryminalnaj adkaznaści ŭ ramkach kanviencyi AAN suprać katavańniaŭ, jaki, na žal, dahetul nie daŭ adpaviednaha vyniku. Stratehičnaj zadačaj źjaŭlajecca stvareńnie mižnarodnaha kryminalnaha suda pa Biełarusi».
Jakuju pamyłku, pa mierkavańni Łatuški, zrabili štaby?
«My ŭsie zrabili istotnuju pamyłku ŭ tym, što nie stvaryli alternatyŭnych instytutaŭ kiravańnia dziaržavaj. Prapanuju vypravić jaje i viarnuć hetu inicyjatyvu ŭ ruki biełaruskaha naroda.
Dla dasiahnieńnia hetaj mety prapanuju ŭ najbližejšy čas sklikać kanhres biełarusaŭ, u niezaležnaści ad miesca ich pražyvańnia — jak u Biełarusi, tak i za miažoj. Delehaty kanhresu mahli b pryniać rašeńnie ab stvareńni alternatyŭnych instytutaŭ ułady, u tym liku vykanaŭčaj».
Kali budzie «adziny front demsiłaŭ»?
Śviatłanu Cichanoŭskuju spytali, kali narešcie demakratyčnyja siły abjadnajucca.
«Mianie zaŭsiody ŭvodzić u stupar hetaje pytańnie — pra adziny front demsiłaŭ. My ŭžo adziny front. Ja tak razumieju, što chočuć, kab my nazvalisia adnoj nazvaj, sieli ŭ adnym miescy i razam pracavali. Dyk tak nie atrymajecca.
Kali niechta mnie daść strukturu adzinaha frontu demsiłaŭ, dzie raśpisany roli, zrazumieła, chto što robić, to padkazvajcie. Jak umoŭna pryjedzie chtości ź niamieckaj dyjaspary, siadzie pobač i budzie pradstaŭlać u demsiłach dyjasparu. Jak heta budzie vyhladać, ja nie razumieju. My z Pał Pałyčam i tak sustrakajemsia, abmiarkoŭvajem situacyju, kožny dzień praktyčna na zvankach», — prakamientavała Cichanoŭskaja.
