Fota z tvitara Mećju Čensa
1 kastryčnika na amierykanskim telekanale CNN vyjšła intervju z Alaksandram Łukašenkam. Hutarku z palitykam prademanstravali ŭ efiry dvuchhadzinnaj prahramy The Lead with Jake Tapper, pryśviečanaj navinam ZŠA i śvietu. Dla Łukašenki redaktary CNN vydzielili kala 10 chvilin u mižnarodnym błoku pieradačy, naprykancy druhoj hadziny efiru.
Intervju zrabiłasia skandalnym jašče da svajoj demanstracyi na amierykanskim telebačańni. Žurnalist maskoŭskaha ofisa CNN Mećju Čens, jaki i hutaryŭ z Łukašenkam, atrymaŭ dziasiatki aburanych kamientaryjaŭ da pasta ŭ svaim Twitter z anonsam intervju za toje, što nazyvaje Łukašenku «prezidentam Biełarusi».
Biełaruskija praŭładnyja śpikiery taksama pačali zahadzia stavicca naściarožana da hetaj hutarki, abvinavaciŭšy Čensa ŭ «zaanhažavanym padychodzie».
Cikava, što ŭ padvodcy da intervju viadučy CNN Džejk Tepier adkryta nazvaŭ jaho «dziŭnym» — bizarre. Aŭtary siužeta, u jaki ŭvajšli frahmienty z hutarki Łukašenki i Čensa, nahadali pra hvałt, ź jakim sutyknulisia biełaruskija pratestoŭcy, a taksama nazvali Łukašenku adkaznym za hetyja dziejańni. Mima žurnalistaŭ nie prajšło i staŭleńnie biełaruskaha palityka da kavidu razam z prapanovami lačyć hetuju chvarobu «harełkaj i chakiejem», u vyniku čaho, tolki pa aficyjnych źviestkach, ad kavidu pamierli bolš za čatyry tysiačy biełarusaŭ.
Taksama ŭ siužecie pakazana, jak Mećju Čens sprabuje zapytacca ŭ minčukoŭ na vulicy pra ich staŭleńnie da Łukašenki: ludzi, pačuŭšy pytańnie, źbiahajuć ad žurnalista, adzin mužčyna ščyra pryznajecca, što nie budzie adkazvać, bo jaho «pasadziać», tvary ludziej redaktary zabluryli.
Samomu Łukašenku taksama nahadali pra paślavybarnyja padziei, i žurnalist CNN prapanavaŭ jamu prynieści prabačeńni za parušeńni pravoŭ čałavieka. U adkaz Łukašenka admoviŭsia prynosić prabačeńni, adznačyŭšy, što nie bačyć sensu rabić heta praz CNN, dy i nie maje pryčyn dla prabačeńniaŭ. Tady žurnalist pracytavaŭ danyja mižnarodnych pravaabarončych arhanizacyj, što śviedčać pra fizičny hvałt u dačynieńni da zatrymanych na biełaruskich pratestach. Łukašenka abvierh abvinavačvańni:
«Što datyčycca našych ułasnych turmaŭ, dzie my trymajem abvinavačanych ci tych, chto pad śledstvam, jany nie horšyja, čym u Brytanii ci ZŠA … Usio, što vy zaraz nazvali, — heta fejk i fantazija. Harantuju vam, heta — falšyŭka i vydumka».
Intehracyja z Rasijaj i napamin pra Pratasieviča
U anonsie intervju, što źjaviŭsia ŭ tvitary Mećju Čensa za dzień da jaho vychadu, hučała tema mihrantaŭ. Adnak u toj viersii hutarki, što była pakazanaja na CNN, hetaje pytańnie adsutničała, zatoje znajšłosia miesca temie intehracyi z Rasijaj. Łukašenka abviarhaje hetuju mahčymaść i nazyvaje vysnovu pra toje, što Biełaruś stanie častkaj Rasii, pamyłkaj, śćviardžajučy, što «suvierenitet nie pradajecca».
Jašče adno pytańnie, što ŭvajšło ŭ siužet, datyčyłasia historyi z prymusovaj pasadkaj samalota z Ramanam Pratasievičam i aryštam hetaha aktyvista. Mećju Čens pacikaviŭsia ŭ Łukašenki, ci hatovy jon pryznać, što ŭsia situacyja z pasadkaj samalota była štučna stvoranaja, kab zachapić apazicyjnaha krytyka. Biełaruski palityk znoŭ adkazaŭ admoŭna:
«Ja nie źbirajusia ničoha pryznavać pierad vami, ja nie pad rasśledavańniem… Ale pravieści takuju apieracyju dla našych słužb biaśpieki, pry hetym nie parušyŭšy mižnarodnyja zakony — heta b kaštavała šmat».
Pry hetym Łukašenka nie vyklučyŭ mahčymaści taho, što, navat kali pasadka łajniera nie była prymusovaj, padobnyja apieracyi ŭsio ž mohuć mieć miesca ŭ budučym: «Kali vy baiciesia latać nad našaj terytoryjaj, mahu vam asabista, vašaj kampanii i krainie i luboj inšaj harantavać poŭnuju biaśpieku palotaŭ nad Biełaruśsiu, tak, jak heta i było zaŭsiody. Ale kali ja i pravaachoŭnyja orhany budziem bačyć pahrozu biełaruskaj dziaržavie, my pasadzim tut luby samalot».
