Fotarobat Zadyjaka. Fota garystockbridge617.getarchive.net.
Hrupa rasśledavalnikaŭ The Case Breakers ličyć, što imia zabojcy — Hery Frensis Post. Heta były vieteran amierykanskich VVS, jaki pamior u 2018 hodzie, piša Sky News.
Jak piša amierykanskaja presa, Post pamior u 2018 hodzie, kali jamu było 80. U jaho byŭ dom u kalifarnijskim horadzie Hroŭlend, mierkavany zabojca pracavaŭ malarom i byŭ žanaty.
Chto taki Zadyjak
U pieryjad pamiž 1968 i 1969 hadami Zadyjak zabiŭ u Paŭnočnaj Kalifornii piać čałaviek. Jon dražniŭ palicyju praz toje, što rassyłaŭ u haziety San-Francyska listy z pahrozami zabojstvaŭ, ale praź niejki čas raptoŭna pierastaŭ vychodzić na suviaź. U svaich listach zabojca vykarystoŭvaŭ šyfry i śćviardžaŭ, što kali niechta zdoleje ich rasšyfravać, heta dapamoža raskryć asobu Zadyjaka. U adnym ź listoŭ zabojca raspavioŭ, što jon zabiŭ 37 čałaviek, adnak aficyjna heta nie paćvierdžana.
Nie ŭsio tak prosta
Niahledziačy na vyniki rasśledavańnia, ekśpierty z palicyi i inšych dziaržaŭnych słužbaŭ ZŠA ličać, što vysnovy The Case Breakers niepraŭdapadobnyja. U adkaz na publikacyju kamandy ofis FBR u San-Francyska vypuściŭ zajavu pra toje, što sprava Zadyjaka ŭsio jašče zastajecca adkrytaj i ŭ FBR niama novaj infarmacyi pra jaje.
Ciapierašniaja teoryja častkova zasnavanaja na tym, što fota Hery Posta padobnaje da fotarobata 1969 hoda, na jakim namalavany Zadyjak.
Ekśpierty kamandy kažuć, što kryptahramy ŭ listach Zadyjaka taksama ŭkazvajuć na asobu Posta. Zhodna z rasśledavalnikami, treba viedać poŭnaje imia Hery Posta, kab rasšyfravać kryptahramy.
Kožny hod palicyja i miascovaja hazieta San Francisco Chronicle atrymoŭvajuć sotni zdahadak pra toje, chto b moh być Zadyjakam i jak rasšyfravać kryptahramy ŭ jaho listach. Siarod ich było, naprykład, paviedamleńnie ad čałavieka, jaki ličyŭ Zadyjakam ułasnaha baćku-niabožčyka. Inšy čałaviek śćviardžaŭ, nibyta jaho siabar pryznaŭsia ŭ zabojstvach pierad svajoj śmierciu ŭ 2002 hodzie.
Hery byŭ zdolny «zabivać biez razboru»
Ekśpierty The Case Breakers upeŭnienyja, što ŭ Posta była i šostaja achviara — žycharka horada Ryviersajd, jakuju zvali Čery Džo Bejts. Ekśpierty navat chacieli, kab DNK Posta paraŭnali z DNK mierkavanaha zabojcy Bejts, adnak palicyja Ryviersajda nie zhodnaja z vysnovami kamandy.
Jość i inšyja dokazy, što źviazvajuć asoby malara z Hroŭlenda i lehiendarnaha zabojcy, ale jany zbolšaha adsyłajuć da historyi Čery Džo Bejts. Naprykład, heta hadzińnik znojdzieny na miescy zabojstva Bejts, jaki nibyta byŭ kupleny ŭ armiejskim mahazinie. Pry hetym Bejts była zabitaja niedaloka ad špitala, dzie Post u toj čas rehularna prachodziŭ miedyčnyja pravierki.
Narešcie, čałaviek, jaki asabista viedaŭ Posta, raspaviadaje, što Hery byŭ zdolny «zabivać biez razboru». Praŭda, śviedka asabista bačyŭ tolki toje, jak Post zabivaŭ žyvioł i jak jon zakopvaŭ zbroju.