Viaršynina abvinavacili ŭ aktyŭnym udziele ŭ dziejańniach, jakija hruba parušajuć hramadski paradak — va ŭdziele ŭ Maršach 23 i 30 žniŭnia ŭ Minsku. Hałoŭnymi dokazami viny Jahora stali dva fotazdymki z Maršu, jakija pravaachoŭnym orhanam z zakrytaj asabistaj staronki ŭ fejsbuku pradastaviŭ mužčyna, suprać jakoha kaliści vioŭ spravu jak śledčy Viaršynin. Jahor vinu nie pryznaŭ. Na sudzie ŭ kajdankach dapytali siabra abvinavačanaha Jaŭhiena Juškieviča, jakoha vinavaciać u teraryźmie.
Jahor Viaršynin bolš za šeść hadoŭ adpracavaŭ u Śledčym kamitecie, zajmaŭsia rasśledavańniem ekanamičnych złačynstvaŭ. Zvolniŭsia ŭ 2019 hodzie, zajmaŭsia spartyŭnaj analitykaj i płanavaŭ iści ŭ IT. 11 červienia 2021 hoda Jahora zatrymali.
Na sudzie Jahor Viaršynin zajaviŭ, što pryniaŭ udzieł u mirnym šeści, realizujučy svajo prava, harantavanaje Kanstytucyjaj.
Što kazaŭ u apošnim słovie palitviazień?
«2020 hod dla biełarusaŭ byŭ dosyć składanym i padzialiŭ ludziej na dźvie hrupy, heta značyć, što adna — heta tyja, kaho ŭsio zadavalniaje i chto nie vykazvaje nijakich pohladaŭ i mierkavańniaŭ. I tyja, chto nie zmoh upisacca ŭ hetuju karcinu. Miarkuju, što ja dałučyŭsia da druhoj hrupy, to-bok da hrupy, jakaja nie zusim zhodnaja z tym, što adbyvałasia. Ja kankretna maju na ŭvazie toj hvałt, jaki adbyvaŭsia ŭ post-elektaralny pieryjad, adsutnaść pravavoj acenki i reakcyi na hety hvałt. Heta toje, što zaachvociła mianie dałučycca da hetych Maršaŭ. Zaŭvažu taksama, što inkryminavanaje mnie ŭ jakaści złačynstva całkam upisvajecca ŭ formu masavych schodaŭ: šeścia, demanstracyj i mitynhaŭ. U toj častcy, kali hetyja formy niesankcyjanavanyja adpaviednym čynam i orhanami vykanaŭčaj ułady, jak praviła niasuć administracyjnuju adkaznaść. Taksama adznaču, što mnohija z udzielnikaŭ padobnych masavych schodaŭ, vuličnych šeściaŭ, demanstracyj i mitynhaŭ, zhodna z zakanadaŭčaj definicyjaj, mohuć iści jak pa tratuary, tak i pa prajeznaj častcy.
Na moj pohlad, da pryčyn i ŭmoŭ možna adnieści elektaralnuju kampaniju i post-elektaralnyja padziei, taksama hvałt, jaki adbyvaŭsia ŭ dačynieńni da hramadzianskich asob. Akramia taho, ja chacieŭ by zaŭvažyć, što orhanami papiaredniaha śledstva dapuščanaja pamyłka, i mnie inkryminavany aktyŭny ŭdzieł u dziejańniach, jakija hruba parušajuć paradak, pry parušeńni artykuła 10 zakona ab masavych schodach. Varta ŭličyć, što hety artykuł praduhledžvaje praviły arhanizacyi, praviły ŭdziełu ŭ masavych schodach dla arhanizataraŭ. Ja nie źjaŭlaŭsia arhanizataram masavych schodaŭ, i maja rola śledstvam vyznačana jak aktyŭny ŭdzielnik, znoŭ ža, nie arhanizatar.
Dla ŭdzielnikaŭ masavych schodaŭ jość administracyjny artykuł. Tamu liču, što ŭ maich dziejańniach adsutničaje skład złačynstva, praduhledžany artykułam 342 Kryminalnaha kodeksa. Hetaha złačynstva ja nie ździajśniaŭ i liču, što moj kryminalny pieraśled nie abjektyŭny, nie ŭsiebakovy, praduziaty, i, mahčyma, jon ažyćciaŭlaŭsia pa matyvach hramadska-palityčnych mierkavańniaŭ, dla čaho i pravodziacca masavyja schody. Liču, što prysud pavinien być apraŭdalnym, i nie tolki ŭ dačynieńni da mianie, ale i ŭ dačynieńni da inšych asob, jakija pryznanyja palityčnymi źniavolenymi, jakija pieraśledujucca z hetaj ža metaj».
Sudovaje śledstva pa kryminalnaj spravie pa art. 342 Kryminalnaha kodeksa suprać Jahora Viaršynina ciahnułasia tolki dzień: ranicaj sud pačaŭsia, a ŭviečary ŭžo abviaścili prysud. Sudździa Dźmitryj Karsiuk pryznaŭ Viaršynina vinavatym i pakaraŭ jaho dvuma hadami pazbaŭleńnia voli va ŭmovach uzmocnienaha režymu.
Na Vaładarcy pa «narodnym» artykule siadzić były śledčy Jahor Viaršynin. Što pra jaho viadoma?
Na sud nad palitźniavolenym byłym śledčym Jahoram Viaršyninym pryviali ŭ jakaści śviedki źniavolenaha Jaŭhiena Juškieviča
