Minzdaroŭja Šviecyi paviedamiła, što bolš nie budzie vakcynavać maładych ludziej, jakija naradzilisia paśla 1991 hoda, bo apošniaje daśledavańnie pakazała ryzyku mijakardytu i pierykardytu siarod moładzi paśla pryščepki. To-bok vakcynacyja moža pryvieści da zapaleńnia sardečnaj myšcy ci abałonki serca, piša Reuters.
U toj ža čas u Ministerstvie achovy zdaroŭja Šviecyi pryznajuć, što ryzyka takoha pabočnaha efiektu małaja.
Paśla hetaj naviny akcyi Moderna na mižnarodnaj biržy ŭpali na 4,9%.
U adkaz na admovu vykarystoŭvać vakcynu dla maładych ludziej pradstaŭnik Moderna raspavioŭ, što takija vypadki redkija, zachvorvańnie prachodzić u lohkaj formie, dastatkova standartnaha lačeńnia i adpačynku.
«Ryzyka mijakardytu značna pavialičvajecca dla tych, chto chvareŭ na COVID-19, a vakcynacyja — lepšaja abarona ad jaho», — dadaŭ pradstaŭnik Moderna.
Pa źviestkach amierykanskaha daśledavańnia, jakoje jašče nie prajšło ekśpiertyzu, dla mužčyn va ŭzroście da 20 hadoŭ, jakija pierachvareli na karanavirus, da šaści raz bolšaja vierahodnaść atrymać mijakardyt, čym dla tych, chto pryščapiŭsia.
U Danii z-za «mieraŭ zaściarohi» vyrašyli prypynić vakcynacyju pryščepkami Moderna niepaŭnaletnich. Dla padletkaŭ 12-17 hadoŭ tut vykarystoŭvajuć vakcynu Pfizer.
Što ŭ inšych krainach?
Danyja śviedčać ab tym, što zarehistravanyja vypadki zapaleńnia serca adnosna vyšejšyja paśla vakcyny Moderna ŭ paraŭnańni z pryščepkami Pfizer, jak zajavili na minułym tydni pradstaŭniki kanadskaj sistemy achovy zdaroŭja.
Choć abiedźvie vakcyny zasnavanyja na technałohii mRNK, injekcyja Pfizer źmiaščaje 30 mikrahram vakcyny na dozu, a Moderna — 100 mikrahram.
U Złučanych Štatach vakcyna Moderna nie ŭchvalena dla ludziej va ŭzroście da 18 hadoŭ.
Narviehija rekamienduje niepaŭnaletnim vakcynu Pfizer/BioNTech. Toje ž tam prapanujuć vybirać mužčynam va ŭzroście da 30 hadoŭ.
Jeŭrapiejskaja ahiencyja lekavych srodkaŭ uchvaliła vykarystańnie vakcyny ad Pfizer/BioNTech jašče ŭ mai. Vakcynu Moderna ŭchvalili dla vakcynacyi dziaciej, starejšych za 12 hadoŭ, u lipieni.
Pieravahi vakcyn, zasnavanych na tak zvanaj technałohii mRNK (jakaja vykarystoŭvajecca i ŭ Moderna, i ŭ Pfizer/BioNTech), pa-raniejšamu pieravažvajuć ryzyki, zajavili ŭ Złučanych Štatach, ES i Suśvietnaj arhanizacyi achovy zdaroŭja.
Čytajcie taksama: Doŭha zasynajecie pa načach? Voś što možna z hetym zrabić — karysnyja parady
