Mahutnaść linij elektrapieradač, jakija viaduć u abiedźvie krainy, składaje 900 MVt. Pavodle źviestak krynicy, ź ich płanujecca zadziejničać minimum pałovu.
Hetyja pastaŭki zaklikany dapamahčy Ukrainie vyjści z enierhietyčnaha kryzisu, u jakim kraina apyniecca ŭ kancy kastryčnika — pačatku listapada, kali čakajecca ŭnutrany rost popytu na elektraenierhiju. Zadavolić jaho za košt unutranych vytvorcaŭ enierhii kraina nie zdolnaja praz pravalenuju prahramu pa nazapašvańni vuhalu.
Pavodle źviestak Minenierha, u vypadku palityčnaj admovy Biełarusi pradavać elektraenierhiju Ukraina z vysokaj stupieńniu vierahodnaści budzie vymušana pačać štučnaje abmiežavańnie ŭnutranaha spažyvańnia.
Pieršymi pad katehoryju abmiežavańniaŭ patrapiać pramysłovyja spažyŭcy: im budzie prapanavana dobraachvotnaje skaračeńnie abjomaŭ spažyvańnia na 10—20%.
«Kali dobraachvotnaha skaračeńnia nie adbudziecca, pramysłovaść budzie abmiežavanaja prymusova», — kaža krynica.
U pres-słužbie ministerstva vydańniu abvierhli infarmacyju ab mahčymym imparcie ź Biełarusi.
«Dla płanavaha prachodžańnia aciaplalnaha siezona ŭ Minenierha pytańnie kamiercyjnaha impartu z Rasii i Biełarusi nie razhladajecca. Minenierha źviartałasia ŭ Nacyjanalnuju kamisiju, jakaja ažyćciaŭlaje dziaržaŭnaje rehulavańnie ŭ śfierach enierhietyki i kamunalnych pasłuh, z prapanovaj zabarony impartu z Rasii i Biełarusi.
Što tyčycca stanu nazapašvańnia vuhalu, to pavialičany amal u 2 razy ŭ žniŭni hrafik nazapašvańnia praduhledžvaje mahčymaść ustojlivaha prachodžańnia asieńnie-zimovaha pieryjadu ŭ samych krytyčnych umovach. Finansavaja mahčymaść hienieracyi dla zakupki vuhalu stabilizavanaja. Što było zroblena, u pryvatnaści, dla pavieličeńnia impartu vuhalu. Pytańni dobraachvotnaha abo prymusovaha abmiežavańnia spažyvańnia elektraenierhii nie stajać na paradku dnia».
