Leanidu Zajcu 62 hady. Jon rodam ź vioski Hacuk Słuckaha rajona. Pracavaŭ traktarystam, bryhadziram, śpiecyjalistam pa kormavytvorčaści.
U 89-m skončyŭ sielskahaspadarčuju akademiju ŭ Horkach pa śpiecyjalnaści «Ahranomija», paśla čaho pracavaŭ hałoŭnym ahranomam u saŭhasie «Słuck».
Potym kiravaŭ susiednim kałhasam «Biełaruś». Z 1998 — dyrektar Słuckaha kambinata chlebapraduktaŭ. Z 1999 pa 2001 — staršynia Maładziečanskaha rajvykankama. Adtul jaho ŭžo vyniesła ŭ vyšejšyja ešałony ŭłady: z 2001-a staŭ namieśnikam staršyni Minskaha abłvykankama.
Rassvaryŭsia ź lepšym siabram Siamionam Šapiram
Krynicy «Našaj Nivy» kažuć, što va ŭładnych kołach Zajac zapomniŭsia tym, što rassvaryŭsia sa svaim lepšym siabram — Siamionam Šapiram, jakoha sam ža pryznačyŭ hienieralnym dyrektaram «Ahrakambinata Dziaržynski».
«Šapira adpracavaŭ tam da 2008 hoda, paśla čaho na hetaje miesca pryjšoŭ pracavać sam Zajac. Voś tut siabry i pasvarylisia: akazałasia, Šapira panabiraŭ sprečnych kredytaŭ, što dazvoliła jamu na papiery pakazać dobryja pakazčyki i rvanuć na pasadu ministra.
A voś Zajcu daviałosia z hetymi pazykami raźličvacca, spravazdačnaść «Dziaržynskaha» stała ŭžo nie takoj sałodkaj, dapamohi ad siabra jon nie dačakaŭsia. Ale, zrešty, z hetaj pazicyi i jamu ŭ 2012 hodzie ŭdałosia skočyć u ministerskaje kresła, patłumačyŭšy abstaviny, ź jakimi sutyknuŭsia», — raskazvajuć abaznanyja.
Admaŭlajecca ad ałkaholu, kaža, što zakadziravaŭsia
Na čas Zajcavaha Ministerstva pryjšlisia ciažkija vieterynarnyja vojny z Rasijaj. Pa słovach našych surazmoŭcaŭ, čynoŭnik vielmi nie lubiŭ jeździć u Maskvu na pieramovy. Jaho tam marynavali ŭ pryjomnych, ź jaho tam śmiajalisia za vyrazny biełaruski akcent i niaŭmieńnie piśmienna havaryć.
Ahułam u rabotu haliny, kažuć, «nie asabliva ŭmiešvaŭsia, što dla haliny vielmi važna».
U adzin z hadoŭ raboty Zajac pieranios ciažkuju apieracyju i amal hod narmalna nie chadziŭ, ledź pierasoŭvaŭsia, ale adužaŭ.
Taksama pierastaŭ pić. Udzielniki ahulnych mierapryjemstvaŭ kažuć, što Zajac admaŭlajecca ad ałkaholu, kaža, što zakadziravaŭsia, i ciapier pje tolki «trošku šampanskaha».
Apytanyja «Našaj Nivaj» kiraŭniki haspadarak dajuć Zajcu ŭ bolšaści niehatyŭnyja charaktarystyki: «Pryjazdžaŭ da mianie na fiermu, vystupaŭ, jak i Łukašenka: manałoh, daviadzieńnie pakazčykaŭ. Spačatku trochu ź im paspračaŭsia, ale potym mnie stała jasna: jon viedaje, što karovu treba karmić. A astatniaje…
Dla słuchača zboku mo i zdajecca, što jon va ŭsim raźbirajecca, ale nasamreč viedy paviarchoŭnyja abo, pravilniej skazać, sastarełyja. Aktualnyja na dziesiacihodździ tamu. Jak narychtavać jakasnyja karmy, skłaści pravilny racyjon, prakantralavać fizijałohiju karovy — heta ŭsio jamu nieviadoma», — raskazaŭ «NN» adzin z kiraŭnikoŭ haspadarki, kudy pryjazdžaŭ były ministr.
Źniali ź ministerskaj pasady Leanida Zajca paśla skandału z «abasranymi karovami» na fiermie «Śližy» ŭ Škłoŭskim rajonie — jon pierastaŭ być ministram na nastupny ž dzień.
Ale krynicy «Našaj Nivy» ličać, što heta ŭsio było teatralnaj pastanoŭkaj, arhanizavanaj pres-słužbaj Łukašenki. U realnaści ž Zajca źniali za pravaleny sielskahaspadarčy siezon 2018-ha.
Jak akazałasia, tady sabrali tolki trochi bolš za 6 miljonaŭ ton ziernievych i zierniebabovych na fonie amal 8 miljonaŭ ton u 2017.
«Ale źniali navat nie za sam nieŭradžaj, a za toje, što schavaŭ maštab, i kali hlanuli ŭ zapasy — akazałasia, što niama. A sama schiema źniaćcia «praz abasranych karoŭ» — nie novaja. Tak ministraŭ zdymali i da Zajca», — adznačajuć našy krynicy.
Užo na nastupny dzień, 27 sakavika 2019-ha, Zajac ź ministra staŭ hubiernataram Mahiloŭskaj vobłaści.
«Jak hubiernatar — ničoha ŭ im nie naziraju, jak vysakakłasny vykanaŭca — tut trapna»
Na pasadzie hubiernatara davaŭ intervju dziaržaŭnamu telebačańniu, bolšaja častka jaho — raskaz pra sielskuju haspadarku. Z ulikam prafiesijnaj defarmacyi, Zajac vielmi śpiecyfična bačyć instrumienty ekanamičnaha rostu.
«My płanujem pavialičyć u 1,8 razu zarobki ludziam. […] Dla hetaha raspracavany kompleksny płan raźvićcia z metaj vychadu na zadadzienyja paramietry. Dla hetaha nieabchodna vyjści na miljon ton małaka! Treba pavyšać udoi, palapšać technałohiju!» — havaryŭ jon.
Jak hubiernatar jon vystupaje pierad pracoŭnymi kalektyvami. Možna znajści šedeŭralnaje videa, jak jon raskazvaje rabočym z Kaściukovickaha cemientnaha zavoda, što «vałavy ŭnutrany pradukt vyras na 21%, […] a praź piać hod buduć jeździć elektryčnyja aŭtobusy pa krainie».
«Byvajuć kiraŭniki horšyja, što majem. Jak hubiernatar — ničoha ŭ im nie naziraju, jak vysakakłasny vykanaŭca — tut trapna», — kaža adzin ź jaho ciapierašnich padnačalenych.
Ale čamu hety, ničym nie admietny, vykanalny i nie inicyjatyŭny čynoŭnik vyrašyŭ takim aryhinalnym čynam «pakarać» susieda dački? Spytali ŭ blizkaha da Zajca čałavieka.
«Kali b nie źliŭ aŭdyjo, to ja b nikoli nie pavieryŭ by, što Zajac moža takoje zrabić, jak čałaviek jon nie samy kiepski, — ličyć surazmoŭca. — Ja dumaju, tłumačeńnie tut takoje: jon, jak baćka, ličyć siabie vinavatym, što ŭzdymaŭsia pa dziaržaŭnaj słužbie canoj siamji. Nu i ciapier voś pasprabavaŭ zrabić pryjemnaje dačce, abaranić jaje pa-baćkoŭsku. A vyjšła tak, što samomu ad soramu niama kudy dziavacca, i dačce ŭsio sapsavaŭ — joj ža tam dalej žyć».
Čytajcie taksama:
«Susied adnoj z dačok ministra sielskaj haspadarki. Zadača — jaho na miesca pastavić». Źjaviŭsia novy źliŭ ad byłych siłavikoŭ
