Užo bolš za hod «ananimnyja» praŭładnyja telehram-kanały i błohiery zajmajucca zvykłaj dla siabie spravaj. Jany publikujuć sacsietki biełaruskaj znakamitaści, jakaja padtrymała pratesty, zaklikajuć svaich niešmatlikich padpisčykaŭ prademanstravać abureńnie ŭ kamientarach. Nu i paralelna naŭprost abražajuć samich śpievakoŭ, viadoŭcaŭ, artystaŭ.
Ale ž ciapier jany zanialisia bolš pradmietnymi spravami. «Błohiery-jabaćki» adsočvajuć sacsietki amal luboha vystupoŭcy, jaki płanuje dać kancert ci ŭziać udzieł u publičnym mierapryjemstvie. Jak tolki ŭ čałavieka znachodziać fotazdymki ź bieła-čyrvona-biełym ściaham abo asudžeńnie hvałtu siłavikoŭ — padymajecca viskat.
I heta pracuje.
«Vyvučyli materyjały i teksty piesień» Dakoty, paśla čaho joj anulavali «hastrolku»
Pieršaj zoračkaj stała admiena vystupu śpiavački Ryty Dakoty ŭ Minsku. Dakota — uradženka Biełarusi, jakaja daŭno ŭžo žyvie i pracuje ŭ Maskvie. Ale padčas pratestaŭ 2020 hoda jana asudžała dziaržaŭny hvałt, pisała i vykazvałasia pra represii, danaciła fondam padtrymki.
Vokładka sinhła Dakoty «Sychodź»
Vystup Dakoty ŭ 2020 nie adbyŭsia, jaho pieranieśli na vosień 2021. I ŭ kancy vieraśnia stała viadoma, što i hety kancert nie adbudziecca: va ŭpraŭleńni kultury Minharvykankama paviedamili, što «vyvučyli materyjały i teksty piesień» Dakoty, paśla čaho joj anulavali «hastrolku».
Ale ž vielmi vierahodna, što na Rytu Dakotu vykankamaŭskija cenzary i tak by źviarnuli ŭvahu, biez błohieraŭ. Dy i dla samoj śpiavački, jakaja žyvie i hastraluje ŭ Rasii, admiena minskaha kancerta — nie trahiedyja, budziem ščyryja.
Ekstranna zakryli placoŭku, dzie pavinien byŭ być Global Women Forum 2.0
Voś tolki kali kancert Dakoty admianili chacia b za dva tydni da vystupu, to nastupnaje mierapryjemstva — za noč da pačatku.
Hutarka pra Global Women Forum 2.0: vialiki žanočy forum, zapłanavany na 16 kastryčnika ŭ Minsku. Uviečary 15 kastryčnika stała viadoma, što forumu nie dajuć placoŭku.
«My sami ŭ poŭnym šoku, da 16:00 siońniašniaha dnia my byli całkam upeŭnienyja ŭ tym, što mierapryjemstva adbudziecca. U nas byŭ dazvoł na praviadzieńnie mierapryjemstva.
My pačali mantaž placoŭki, pryjechali partniory, prylacieli śpikiery. Usio było hatova i biez zabaronaŭ. Na žal, siońnia ŭ 16:00 nam paviedamiŭ Pałac sportu, što jany ekstranna zakryvajuć placoŭku z-za składanaj epidemijałahičnaj abstanoŭki», — napisali arhanizatary.
Tłumačeńnie pra epidemijałahičnuju abstanoŭku choć i vyhladaje łahičnym u śviecie ciažkaj situacyi z «karonaj» u Biełarusi, ale ž inšyja mierapryjemstvy i vystupy ŭ tym ža Pałacy sportu čamuści nie admianili.
Bolš łahičnaj pryčynaj admieny žanočaha forumu bačycca asoba adnoj z udzielnic. Chedłajnierkaj mierapryjemstva arhanizatary zaprasili błohierku Alaksandru Mitrošynu. U jaje 2,5 miljona padpisčykaŭ.
Mitrošyna — rasijanka, ale ŭ adnym ź intervju vykazałasia pra represii ŭ Biełarusi, dadaŭšy, što baicca takoha ž u Rasii. Jak tolki pra heta zašumieli ŭ dziaržaŭnym siehmiencie biełaruskaha telehrama, Global Women Forum zhubiŭ placoŭku.
Darečy, siońnia na sajcie forumu zajaŭlajecca, što mierapryjemstva nie admianili, a pieranieśli. A Mitrošyna raptam źnikła z afiš i sa śpisa śpikieraŭ. Napeŭna, taksama praz epidemijałahičnuju abstanoŭku?
«Naša Niva» źviazałasia z arhanizatarami mierapryjemstva, ale adkaznyja za PR tak i nie vyjšli na zvarotnuju suviaź.
Kancerty komikaŭ admianili: adzin pažartavaŭ pra inaŭhuracyju, druhi sfotkaŭsia z Bahinskaj
Taksama praŭładnyja telehram-kanały źviarnuli svaju ŭvahu na komikaŭ. Spačatku admianiŭsia vystup u Barysavie. Tam u spartovaj kaviarni «Barysaŭ-areny» płanavałasia «salanka» ź niekalkich minskich humarystaŭ.
Jabaćki padniali šum: bečebiesy!
Što złačynnaha zrabili humarysty? Adzin z komikaŭ sfatahrafavaŭsia z Bahinskaj, vykładvaŭ vieršy Niaklajeva i pisaŭ «hani bykoŭ, viarniecca dola» ŭ svaim instahramie. Ciapier hetyja dopisy vydalenyja, sam komik adkazaŭ «Našaj Nivie»: «Lišniaja ŭvaha mnie ni da čaho».
Druhi praśpiavaŭ pieśniu i niešta tam pažartavaŭ pra inaŭhuracyju. «Usie skrynšoty pajšli ŭ HUBAZ!» — rapartuje pra takija «złačynstvy» čarhovy praŭładny błohier z šaściu sotniami padpisčykaŭ.
Trecim komikam byŭ Andrej Makajonak, były rabotnik BT. Jaho, pa patryjatyčnaj tradycyi biełaruskaj pradziaržaŭnaj błahaśfiery, achryścili «iudam» i «ŭpyrom».
Fota: promoter.by.
Ale ž samaje sumnaje i pakazalnaje tut, što vystupy komikaŭ byli admienienyja. A paśla adzin z humarystaŭ znoŭ trapiŭ pad razdaču, jak tolki jaho imia źjaviłasia ŭ afišy minskaha bara. Ciapier hetaja afiša źnikła z sacsietak.
«Ci admianiŭsia vystup u bary ja nie viedaju, chutčej za ŭsio, taho vystupoŭcu prosta zamieniać na inšaha komika.
Tak, u abodvuch vypadkach heta błohiery, i jany prosta pišuć u roznyja instancyi listy, z-za čaho na miescach ludziam dastajecca i im davodzicca admianiać našy vystupy. Mnie tak i tłumačać: prabač, takaja voś situacyja. Ja ŭsio vydatna razumieju», — kaža «Našaj Nivie» adzin z humarystaŭ.
«Na žal, u hetaj krainie ja bolš vystupać nie mahu», — łakanična adkazaŭ Andrej Makajonak.
Kurjanu, što syšoŭ ź dziaržaŭnaha telebačańnia, dastałasia za «Savuškaŭ produkt»
Tym časam praŭładnyja błohiery namiecili sabie novuju achviaru. Były televiadoŭca Dzianis Kurjan, jaki cicha i spakojna syšoŭ ź dziaržaŭnaha telebačańnia, apošnim časam prasoŭvaŭ svoj jutub-kanał.
Fota: ilinterviews.com
U jaho bok i tak pieryjadyčna lacieli paproki z boku praŭładnych błohieraŭ. Ale apošnim tryhieram stała toje, što kamanda Kurjana zdymaje dakumientalnuju stužku da 45-hoddzia «Savuškavaha produktu» na zamovu samoj kampanii.
Da ckavańnia dałučyłasia i Ludmiła Hładkaja z «Sovietskoj Biełoruśsii». Da taho ž žonku Kurjana — plamieńnicu mera Hrodna Miečysłava Hoja — taksama abvinavacili ŭ niedastatkova patryjatyčnych kamientarach.
***
Vyhladaje, što situacyja z cenzuraj vystupaŭ i kancertaŭ budzie tolki paharšacca. Ciapier ideałahičnaje ŭpraŭleńnie Minharvykankama, jakoje i vydaje «hastrolki», uznačaliła byłaja milicejskaja pres-sakratarka Čamadanava. Naŭrad ci varta čakać «adlihi» ad žančyny, jakaja ŭ aficyjnych milicejskich zvodkach užyvała słova «zmahary».
