«Siaredni ŭzrost pacyjentaŭ u reanimacyi — kala 40 hod. Raniej jon byŭ kala 50»
Daktary adznačajuć, što napłyŭ pacyjentaŭ bolšy, čym u papiaredniuju chvalu. Tak, viciebskaja balnica chutkaj dapamohi pieršy korpus pad kavid pieraprafilavała ŭ pačatku vieraśnia. A ŭžo da kanca miesiaca pad pacyjentaŭ z karanavirusam addali ŭsiu balnicu, choć płanavałasia, što heta adbudziecca na paŭtara tydnia paźniej.
«Situacyja pa horadzie całkam ciažej u tym płanie, što ciapier naohuł nie zastałosia nivodnaha stacyjanara, u jakim by nie lačyli karanavirusnych pacyjentaŭ. Raniej u nas zaŭsiody zastavaŭsia čystym kardyjałahičny dyspanser. A litaralna tydzień tamu navat jaho častkova pieraprafilavali», — kaža reanimatołah Raścisłaŭ Savicki.
U balnicy chutkaj dapamohi kala 500 łožkaŭ. Za apošni čas ich stała bolš, bo dastavili dadatkovyja — u niekatorych pałatach, naprykład, zamiest troch pa čatyry. Dadaktovyja miescy razharnuli na paviersie ŭ radzilni, dzie musiła być kafiedra i pravodzicca zaniatki.
«U papiarednija chvali ŭ nas było kala 30 reanimacyjnych łožkaŭ. Ciapier 46. Takoj kolkaści nie było nikoli. Heta vielmi šmat, i, sychodziačy z hetaha, možna mierkavać pra ciažkaść zachvorvańnia. Pryčym łožki zapoŭnieny praktyčna zaŭsiody. Kožnuju ranicu my dajem spravazdaču pa ich — u nas maksimum volnaje adno miesca. Zapoŭnieny jany zvyčajna ludźmi, jakija majuć patrebu ŭ kisłarodnaj padtrymcy i ŭ jakich pahražalny stan.
Maładych stała bolš. Siarod tych, chto pamiraje, pracentaŭ 70 — ludzi, starejšyja za 70. Ale byvajuć i 30-hadovyja — heta davoli ciažka dla nas maralna i fizična. Kali pahladzieć pa reanimacyi, dźvie traciny zajmajuć ludzi da 65 hod. Siaredni ŭzrost tych, chto lažyć tam, — kala 40. Raniej hety ŭzrost byŭ kala 50 hod», — źviartaje ŭvahu doktar na tendencyju.
Zvyčajna pacyjentaŭ trymajuć u balnicy kala 10 dzion (tak pradpisvaje pratakoł). Kali stan niepahražalny, vypisvajuć. Časam hetych dzion nie chapaje na lačeńnie, ale z ulikam vialikaha napłyvu pacyjentaŭ davodzicca vypisvać ludziej, kab nabirać novych.
«Taki vialiki napłyŭ, chutčej za ŭsio, źviazany z novym štamam, jaki pryjšoŭ u Biełaruś ci vypracavaŭsia ŭłasna ŭ nas. U pryncypie prahnazavali, što ŭvosień pačniecca pik infiekcyi. Ale što jon budzie nastolki ciažki, nichto dapuścić nie moh.
Kali mierkavać pa administracyjnych rašeńniach, jakija prymalisia, my nie byli całkam hatovyja. Ničoha radykalna novaha nie prymałasia, kab zaścierahčy nasielnictva ad infiekcyi.
Dyj ludzi, jakoje pražyli ŭžo paŭtara hoda ŭ karanavirusnym etapie, prosta stamilisia ad usiaho hetaha. Bačna, što ŭśviadomlenaść, jakaja była ŭ pieršuju chvalu, źniziłasia. Tady ludzi bajalisia zarazicca bolš i bolš aktyvizavalisia na baraćbu z karanavirusam — i nasili maski, i vytrymlivali dystancyju. Ciapier mnohija stali stavicca naŭdałuju. I heta taksama maje svaje niehatyŭnyja nastupstvy».
«Častka studentaŭ-miedykaŭ raźjechałasia pracavać pa svaich haradach»
U abłasnoj balnicy čystym zastajecca tolki hałoŭny korpus.
«Asobnyja adździaleńni zabity kavidnymi pacyjentami. Reanimacyja zapoŭniena. Adkryli jašče adno adździaleńnie reanimacyi, na vosiem łožkaŭ, i pavialičyli reanimacyju va ŭrałahičnym korpusie da 12 čałaviek. Daktary starajucca, ale miescaŭ usio adno mała», — kaža miedyk, jaki pracuje ŭ hetaj ustanovie.
U dapamohu daktaram pryciahvajuć šmat studentaŭ — i ŭ palikliniku, i ŭ abłasnuju balnicu, i na abzvon ludziej. Častka moładzi raźjechałasia pa svaich haradach. Tych, chto dapamahaje z pacyjentami, pieraviali na dystancyjnaje navučańnie.
«Ja pačaŭ pracavać u papiaredniuju chvalu, ale heta bolš maštabnaja, kali nie chapaje łožka-miescaŭ, jakija byli raniej. Chod chvaroby padobny — tempieratura, niedachop pavietra, kisłarodazaležnaść. Kłasičnaja karcina pnieŭmanii», — kaža surazmoŭca.
Sam jon pierachvareŭ na karonu ŭ listapadzie.
«Ź mier prafiłaktyki — myju ruki, našu masku i pieryjadyčna mianiaju jaje, vitaminy prymaju. Antyseptyk pa-za pracaj nie vykarystoŭvaju».
Aficyjna: kavidnych pnieŭmanij bolš, čym u papiarednija chvali
U Viciebskaj vobłaści pad pacyjentaŭ z kavid pieraprafilavana 4100 łožkaŭ (heta 35% ad usich miescaŭ u stacyjanarach rehijona), ź ich u Viciebsku — 2178.
Karanavirusnych chvorych u horadzie prymaje abłasnaja balnica, abłasnaja infiekcyjonka, haradskaja balnica chutkaj dapamohi, abłasny skurviendyspanser, abłasnaja radzilnia, centr pulmanałohii i ftyzijatryi, centr miedreabilitacyi, dziciačy kliničny centr, kliničny onkadyspanser, 1-ja haradskaja balnica, abłasny kliničny śpiecyjalizavany centr.
Kali ŭ minułyja chvali na piku z kavidnymi pnieŭmanijami lažała 3,5 tysiačy pacyjentaŭ, to ciapier takich — 3,8 tysiačy čałaviek. Takija ličby niadaŭna ahučyŭ staršynia abłvykankama Mikałaj Šarstnioŭ. U balnicach zadziejničana 84% kisłarodnych kropak ad usioj kolkaści.
Pa statystycy, vakcynavanych siarod tych, chto lažyć u stacyjanarach, 2-3%.
Bolš za 200 studentaŭ Viciebskaha mieduniviersiteta ŭładkavany ŭ palikliniki i balnicy.
Čytajcie taksama:
«U nas pazicyja — nie treba masak, ničoha, samo projdzie». Što dumajuć miedyki pra rezanansnaje pasiadžeńnie pa karanavirusie
