Getty Images
Prynamsi čatyry členy Kabinieta ministraŭ byli zatrymanyja nieapaznanymi vajennymi niezadoŭha da śvitańnia ŭ paniadziełak. Pavodle adnaho z paviedamleńniaŭ, premjer-ministr Abdała Chamduk taksama aryštavany.
Telekanał Al Hadath pieradaje, spasyłajučysia na nienazvanyja krynicy, što Chamduk byŭ źmieščany pad chatni aryšt. Pa danych kanała, uzbrojenyja farmiravańni aryštavali nie tolki čatyroch ministraŭ, ale taksama adnaho hramadzianskaha člena kirujučaj rady, niekalkich hubiernataraŭ štataŭ i kiraŭnikoŭ palityčnych partyj.
Ahienctva Rejter, spasyłajučysia na try krynicy, piša, što aryštavana ŭžo bolšaść členaŭ urada Sudana i vialikaja kolkaść lideraŭ praŭradavych partyj u vyniku «vidavočnaha pieravarotu».
Nieviadoma, chto mienavita pravodziŭ aryšty. Vajskoŭcy aficyjna nie kamientujuć hetyja paviedamleńni.
Vidavočcy paviedamlajuć, što ŭ sudanskaj stalicy Chartumie nie pracuje Internet, pry hetym u sacsietkach źjavilisia fota, na jakich razhnievanyja natoŭpy palać šyny na vulicach. Pa paviedamleńni telekanała «Al-Arabija», zakryty staličny aeraport, prypynienyja mižnarodnyja rejsy.
U Chartumie razhornutyja ŭzbrojenyja siły i vajenizavanyja farmavańni, jany abmiažoŭvajuć pieramiaščeńnie hramadzianskich asob, u toj čas jak pratestoŭcy z nacyjanalnymi ściahami palać šyny ŭ roznych častkach horada.
Asnoŭnyja hramadzianskija demakratyčnyja hrupy ŭ Sudanie zaklikali svaich prychilnikaŭ supraciŭlacca lubomu vajskovamu pieravarotu. Premjer Chamduk taksama zaklikaŭ narod vyjści na vulicy, kab mirna abaranić revalucyju, paviedamlaje telekampanija «Al-Arabija» sa spasyłkaj na Ministerstva infarmacyi krainy.
Paviedamleńni ab aryštach pastupili na fonie rostu napružanaści pamiž vajskoŭcami i hramadzianskimi pierachodnymi ŭładami, jakija padzialili ŭładu paśla źviaržeńnia prezidenta Amara al-Bašyra ŭ 2019 hodzie paśla niekalkich miesiacaŭ vuličnych pratestaŭ.
