Emilijana Sała ŭ žoŭtaj formie. Fota commons.wikimedia.org
21 studzienia 2019 hoda pa śviecie raźlaciełasia viestka pra padzieńnie samalota, u vyniku jakoha zahinuŭ małady arhiencinski futbalist Emilijana Sała. Jašče adnoj achviaraj katastrofy, akramia hulca Cardiff City, staŭ piłot samalota Devid Ibatsan. Samalot vykonvaŭ pryvatny čartarny rejs z francuzskaha Nanta ŭ stalicu Uelsa Kardyf.
Amal praz try hady paśla trahiedyi sud horada Kardyf vynies abvinavačvańnie pa spravie. 67-hadovy biznesmien Devid Chiendersan, jaki arhanizavaŭ apošni dla Sały palot, byŭ pryznany vinavatym u tym, što jon padvierh niebiaśpiecy pavietranaje sudna, piša Sky News.
Chiendersan zajmaŭsia arhanizacyjaj palotu razam z ahientam Sały Uiljamam Makiejem. Mienavita biznesmien źviarnuŭsia da Ibatsana z prośbaj piłatavać samalot hulca. Pry hetym Ibatsan, jaki rehularna pracavaŭ piłotam pa zapytach Chiendersana, nie mieŭ licenzii kamiercyjnaha piłota i nie byŭ dastatkova kvalifikavany, kab latać unačy. U dazvołu Ibatsana na kiravańnie samalotam Piper PA-46 Malibu skončyŭsia termin dziejańnia, ale mienavita na sudnie takoha typu piłot advoziŭ Emilijana Sału ŭ Kardyf.
Stała viadoma, što kali Chiendersan atrymaŭ źviestki pra padzieńnie samalota, jon adasłaŭ niekalkim ludziam paviedamleńni z prośbaj zachoŭvać maŭčańnie. Biznesmien papiaredziŭ, što, kali jaho nie pasłuchajucca, heta «adkryje banku z čarviakami».
Chiendersan byŭ vypuščany na volu pad załoh. 12 listapada projdzie pasiadžeńnie suda, na jakim abvieściać vyrak biznesmienu. Jaho moža čakać da piaci hadoŭ pazbaŭleńnia voli pa abvinavačvańni ŭ tym, što jon padvierh niebiaśpiecy samalot. Jašče adno abvinavačvańnie, źviazanaje sa «sprobaj vieźci pasažyra biez naležnaha dazvołu».
28-hadovy Sała hulaŭ na pazicyi napadajučaha ŭ kłubie «Nant» vyšejšaj lihi francuzskaha futbolnaha čempijanatu. Za niekalki dzion da hibieli arhienciniec pierajšoŭ u brytanski «Kardyf Sici», ale zhulać u novaj kamandzie tak i nie paśpieŭ. U pamiać Sały jaho pieršy kłub «San-Marcin de Prahresa» pierajmienavaŭ svoj stadyjon u jaho honar.
Apublikavany dakład ab parušeńniach u biełaruskim futbole
