Jak raspavioŭ Markin Reform.by, jon prylacieŭ u Kijeŭ z Hruzii, dzie znachodziŭsia sa žniŭnia.
«Z dakumientami ŭ mianie było ŭsio ŭ paradku — u płanie PŁR-testa i strachoŭki. Na pašpartnym kantroli ŭ Kijevie pamiežnik raptam spytaŭ, ci byli ŭ mianie prablemy na terytoryi Ukrainy. Prablem nie było, ni da jakoj adkaznaści ja nie pryciahvaŭsia, tak jamu i skazaŭ. Jon paklikaŭ kalehu, jany zabrali moj pašpart i skazali pačakać. Zatym mianie adviali ŭ kabiniet načalnicy źmieny. Jana vydała mnie papieru, što mnie zabaronieny ŭjezd va Ukrainu. Pryčynu mnie nie patłumačyli, mnie zdajecca, načalnica była ŭ kursie, ale ahučvać mnie nie zachacieła», — kaža małady čałaviek.
Načalnica źmieny prapanavała Arciomu adpravicca nazad u Batumi za košt avijakampanii, što jamu i daviałosia zrabić.
«Pa prylocie ŭ Hruziju la trapa mianie sustreli palicejskija», — dadaje chłopiec. — «Pašpart adrazu nie addali. Adviali taksama da načalnika źmieny, jon spytaŭ, čamu mianie nie ŭpuścili va Ukrainu, pacikaviŭsia, što mnie pahražaje ŭ Biełarusi. Paśla hetaha mnie ŭručyli akt ab viartańni pasažyra, addali pašpart i adpuścili biez pretenzij».
Markin pakazaŭ rašeńnie ab admovie ŭ pierasiačeńni miažy, jakoje jamu vydali ŭ Ukrainie. Pryčynaj admovy tam paznačana: «U dačynieńni da asoby majecca rašeńnie ŭpaŭnavažanaha dziaržaŭnaha orhana ab zabaronie ŭjezdu ŭ Ukrainu». Što heta za orhan, kali i čamu jon nakłaŭ zabaronu, na jaki termin — usio heta ŭ dakumiencie nie paznačana, vusna biełarusu hetaha taksama nichto nie patłumačyŭ. Arciom Markin maje namier źviartacca ŭ Słužbu biaśpieki Ukrainy, kab atrymać adkazy na hetyja pytańni.
Źjechać ź Biełarusi Markin pryjšłosia z-za surjoznaj pahrozy aryštu. Arciom — anarchist. Jaho adnadumcaŭ u Biełarusi pieraśledujuć pad roznymi padstavami daŭno. U Minsku jon byŭ aktyvistam inicyjatyvy «Ježa zamiest bombaŭ» — razdavaŭ ježu biazdomnym.
Ale ŭ sakaviku ŭ kvateru, jakuju Markin zdymaŭ razam ź siabrami-anarchistami, pryjšoŭ ź pieratrusam HUBAZiK. Arcioma i susiedziaŭ zatrymali i asudzili pa artykule ab niesankcyjanavanym pikietavańni, chłopcu dali 15 sutak. A ŭ pačatku žniŭnia hetych ža susiedziaŭ Arcioma zatrymali ŭžo pavodle kryminalnaha artykuła za ŭdzieł u pratestach (č. 1 art. 342 KK). I 4 žniŭnia Markin śpiešna pakinuŭ Biełaruś. Praz šeść dzion siłaviki pryjšli ŭ hetuju ž kvateru ź pieratrusam pavodle kryminalnaha artykuła ŭžo ŭ dačynieńni da samoha Arcioma.
U tyja ž dni siłaviki kančatkova razhramili i drukarski kaapieratyŭ «Listoŭka», dzie Markin da viasny pracavaŭ.
