U sudzie Bresckaha rajona 15 listapada pa «spravie karahodaŭ» vynieśli prysudy adrazu 15 bieraściejcam. Ich usich pryznali vinavatymi pa č. 1 art. 342 Kryminalnaha kodeksa (udzieł u dziejańniach, jakija hruba parušajuć hramadski paradak).
Nahadajem, 13 vieraśnia minułaha hoda na Maršy hierojaŭ u Breście na skryžavańni bulvara Kasmanaŭtaŭ i praśpiekta Mašerava pratestoŭcy vadzili karahod, śpiavali pieśni «Mury» i «Try čarapachi», tančyli. Pratestoŭcaŭ razahnali vadamiotam, a potym uzbudzili kryminalnuju spravu. Siońnia 15 čałaviek (dziaviatuju i dziasiatuju partyju) asudzili na terminy ad hoda «chatniaj chimii» da 1,5 hady kałonii.
Palitźniavolenych Hannu Baran i Uładzimira Hančarova, jakija ŭtrymlivajucca pad vartaj, asudžanyja da paŭtary hady kałonii. Spravu razhladała sudździa Kaciaryna Ramaška, dziaržaŭnaje abvinavačvańnie padtrymlivali Alaksiej Baranoŭski i Vadzim Bahatka. Heta adna z samych masavych «palityčnych spravaŭ» u historyi Biełarusi — prysudy vyniesienyja ŭžo 102 čałaviekam.
Kamu vyniesieny prysudy hety raz?
15 listapada byli asudžanyja pa «spravie karahodaŭ»:
- Palitźniavolenaja Hanna Baran — 1,5 hady kałonii ahulnaha režymu (z 14 kastryčnika pad vartaj);
- Alaksandr Vialička, Vieranika Klimovič, Volha Hačynskaja, Śviatłana Jakimovič, Kaciaryna Hančarova — 2 hoda «chatniaj chimii»,
- palitźniavoleny Uładzimir Hančaroŭ — 1,5 hady kałonii ahulnaha režymu (z 24 lipienia pad vartaj);
- Siarhiej Jaroškin, Pavieł Kraŭčuk — 2,5 hoda «chimii»;
- Valancina Korsak — 2,5 hady «chatniaj chimii»;
- Siarhiej Łapko, Cimur Łompik, Alaksiej Jakimovič — 2 hady «chimii»;
- Alaksandr i Taćciana Paŭlučyki — 1 hod «chatniaj chimii».
Jak piša bresckaja «Viasna», hetym razam sudzili adrazu čatyry siamiejnyja pary: Paŭlučykaŭ, Jakimavičaŭ, Hačynskich i Hančarovych. Adnak Rusłana Hačynskaha, jakoha pačali sudzić u hetaj ža hrupie, praciahnuć sudzić potym: jaho sprava vyniesiena ŭ asobnuju vytovrčaść pa pryčynie chvaroby Rusłana.
