Spravu razhledzieła sudździa Julija Šut. Bok dziaržabvinavačvańnia padtrymaŭ prakuror Śviatasłaŭ Vialiki.
Alaksieja pryznali vinavatym u tym, što 9-10 žniŭnia 2020 hoda jon prymaŭ udzieł u niesankcyjanavanym mierapryjemstvie ŭ Minsku — u tym liku, na prajeznaj častcy na praśpiekcie Pieramožcaŭ. Zhodna z tekstam abvinavačvańnia, jon «prymaŭ udzieł u hrupavych dziejańniach, jakija hruba parušajuć hramadski paradak, nie padparadkoŭvaŭsia patrabavańniam supracoŭnikaŭ milicyi, a taksama pieraškadžaŭ pracy transpartu i pradpryjemstvaŭ. Taksama jon vykrykvaŭ łozunhi, plaskaŭ u dałoni i vykarystoŭvaŭ «pałotnišča bieł-čarvona-biełaha koleru».
Alaksiej całkam pryznaŭ vinu, nie pahadziŭsia tolki nakont sumy isku «Minsktransa». Jon raspavioŭ, što byŭ na mierapryjemstvie, bo jamu było cikava.
Kali 9 žniŭnia pryjšli siłaviki, jon syšoŭ ź miesca pratestaŭ. Taksama jon raspavioŭ, što dvojčy zatrymlivaŭsia pa administracyjnych spravach za ŭdzieł u «niesankcyjanavanych mierapryjemstvach»: u žniŭni i listapadzie 2020 hoda.
Da materyjałaŭ spravy byli dałučanyja dva fotazdymki, śviedak u spravie nie było. Isk «Minsktransa» — bolš za 25 tysiač rubloŭ — zastaŭsia biez razhladu i moža być vyłučany ŭ asobnuju hramadzianskuju vytvorčaść.
Prakuror paličyŭ, što abvinavačvańnie całkam dakazanaje. U jakaści źmiakčalnych abstavinaŭ jon paprasiŭ uličyć raskajańnie, u jakaści abciažarvalnych — pryciahnieńnie Minava da administracyjnaj adkaznaści. Jon paprasiŭ pakarać chłopca tryma hadami «chimii»: sudździa Šut całkam pahadziłasia z terminam..
Alaksiej Minaŭ — litaratar, nastaŭnik biełaruskaj movy i litaratury.
Byŭ zatrymany 25 žniŭnia 2021 hoda, zatym jamu vystavili abvinavačvańnie pa art. 342 Kryminalnaha kodeksa. Vypusknik fiłfaka BDU, jon pačaŭ pracavać u siaredniaj škole jašče padčas navučańnia.
Dzień zatrymańnia musiŭ stać jaho pieršym dniom raboty ŭ Licei BDU, kudy jon pieraraźmierkavaŭsia na apošni hod svajoj adpracoŭki.
