U toj dzień u Baranavičach prajšła chvala zatrymańniaŭ i pieratrusaŭ, jakija pravodzili supracoŭniki druhoha adździaleńnia šostaha ŭpraŭleńnia HUBAZiK. Spravy vioŭ sudździa Siarhiej Danilčyk, paviedamlajuć pravaabaroncy.
Natallu Roślik pakarali za padpisku na čat-bot, jaki ŭłady pryznali ekstremisckim. Paśla pieratrusu Natallu advieźli ŭ HAUS, dzie ŭ telefonie znajšli padpisku na kanał. Za heta na žančynu skłali pratakoł pa art. 19.11 KaAP (zachoŭvańnie z metaj raspaŭsiudžvańnia infarmacyjnaj pradukcyi, jakaja źmiaščaje zakliki da ekstremisckaj dziejnaści abo jakaja prapahanduje takuju dziejnaść).
U Natalli jość dvoje niepaŭnaletnich dziaciej, tamu jaje paśla pieratrusu adpuścili dadomu. Siońnia sudździa pryznačyŭ Roślik štraf u pamiery 522 rubloŭ (18 bazavych vieličyniaŭ).
Piensijanierku Volhu Zajac aštrafavali na 435 rubloŭ (15 bazavych vieličyniaŭ). Žančynu abvinavacili ŭ padpiscy na ekstremisckija telehram-kanały. Paśla pieratrusu ŭ Volhi doma ŭ HAUSie na jaje skłali pratakoł pa art. 19.11 KaAP. Svaju vinu na sudzie Zajac pryznała. U žančyny taksama kanfiskavali telefon.
Taksama aštrafali maci dvuch niepaŭnaletnich dziaciej Darju Nieścier. 18 listapada HUBAZiK pravioŭ u kvatery pieratrus, paśla čaho jaje dastavili ŭ HAUS. Zhodna z pratakołam, jana była padpisanaja na dva ekstremisckija kanały. Sudździa Danilčyk pastanaviŭ pryznać Darju vinavataj i aštrafavać na 522 rubli (18 bazavych vieličyniaŭ) z kanfiskacyjej telefona i noŭtbuka.
Na hety momant pravaabaroncam viadomyja proźviščy 15 zatrymanych 18 listapada žycharoŭ Baranavič, piaciarych ź jakich pakarali aryštami ad 6 da 15 sutak, i jašče čytyry čałavieki byli aštrafavanyja.
