Muž i žonka piensijnaha ŭzrostu pachavali syna, pradali dom za horadam i ŭpieršyniu pryjechali ŭ aeraport, kab palacieć u Antaliju — tam Alaksandr Račkoŭski chacieŭ kupić što-niebudź ź nieruchomaści, kab zdavać i atrymlivać pasiŭny prybytak. U aeraporcie jon pierastupiŭ zialonuju liniju pry pracedury mytnaha afarmleńnia i farmalna ŭčyniŭ pravaparušeńnie.
Čytajcie taksama:
«Ja dobraachvotna pradjaviŭ usie hrošy». Za ŭvachod na 30 sm u zialony kalidor aeraporta ŭ piensijaniera kanfiskavali $61 tysiaču
10 listapada sudździa suda Partyzanskaha rajona Minska pastanaviŭ pryciahnuć Račkoŭskaha da administracyjnaj adkaznaści pavodle č. 2 art. 15.5 KaAP, aštrafavać na 10 bazavych, ale hałoŭnaje — kanfiskavać 60 800 dalaraŭ i 400 rubloŭ.
Sutnaść skarhi
Na siońniašnim pasiadžeńni abaronca Račkoŭskaha zajaviŭ, što rajonnym sudom nie byli ŭličanyja abstaviny: u Račkoŭskaha byli dakumienty ab pachodžańni hrošaj i jon mieŭ namier, vusna zajaviŭšy pra heta, ich dekłaravać. A pravaparušeńnie było ździejśnienaje pa nieaściarožnaści.
Taksama nie ŭličanyja danyja pra asobu Račkoŭskaha, jaho siamju i stan zdaroŭja, havorycca ŭ skarzie.
Abaronca patłumačyŭ:
— Sud pryjšoŭ da mierkavańnia, što Račkoŭski nie pryznaŭ svajoj viny, ale heta abviarhajecca aŭdyjapratakołam sudovaha pasiedžańnia. Jon svaju vinu pryznaŭ. Na naš pohlad, heta padstava dla admieny pastanovy. Pa-druhoje. Na naš pohlad, nakładzienaje spahnańnie nie adpaviadaje ciažaru złačynstva. Sud zaŭvažyŭ niekatoryja źmiakčalnyja abstaviny, ale nie ŭsie: Račkoŭski — invalid 2-j hrupy, dva miesiacy tamu ŭ jaho pamior syn, plus abstaviny spravy. Farmalna jon ździejśniŭ pravaparušeńnie, ale pa nieaściarožnaści! A kali zrazumieŭ, to dobraachvotna pryznaŭsia i sadziejničaŭ mytnym orhanam. My prasili i prosim vyzvalić Račkoŭskaha ad adkaznaści ŭ suviazi z małaznačnaściu ździejśnienaha. Abo vyklučyć z pastanovy dadatkovaje spahnańnie ŭ vyhladzie kanfiskacyi.
Pazicyja mytni
Pradstaŭnik mytnych orhanaŭ, naadvarot, padtrymała rašeńnie rajonnaha suda:
— Materyjały vyvučanyja, prykmiety dla viadzieńnia administracyjnaha pracesu ustanoŭlenyja i razhledžanyja. Pierastupiŭšy liniju, čałaviek zajaviŭ ab adsutnaści namieraŭ dekłaravać kaštoŭnaści. Pry ahladzie byli znojdzienyja hrošy. Ličym, što padstaŭ dla admieny pastanovy niama.
Rašeńnie suda
Vysłuchaŭšy abodva baki, sudździa Jaŭhien Chatkievič pastanaviŭ admianić rašeńnie rajonnaha suda i vyzvalić Račkoŭskaha ad adkaznaści za małaznačnaściu parušeńnia. Hrošy — viarnuć.
Alaksandr Račkoŭski pad maskaj ledź chavaŭ ździŭleńnie. Paśla pracesu padziakavaŭ usim:
— Dziakuj usim za padtrymku i dobryja vodhuki paśla artykuła. I za niadobryja słovy — taksama dziakuj, kožny pavinien mieć prava na mierkavańnie. Nie abvinavačvajcie rabotnikaŭ mytni — jany pracujuć pa praviłach, ich žorstka kantralujuć. Dziaŭčyna, jakaja mianie spyniła, u kancy pracesu sama vielmi mocna pieražyvała, ja heta bačyŭ i nie vinavaču.
U mytni jość šeść miesiacaŭ na abskardžańnie rašeńnia.
— Abskardzić? Jak kiraŭnictva vyrašyć, — adkazała na pytańnie Onlíner na vychadzie pradstaŭnica mytni.
