Analityki JEABR padviali vyniki ekanamičnaha raźvićcia dziaržaŭ — udzielnic banka ŭ 2021 hodzie. Paviedamlajecca, što ekanomika rehijona aktyŭna adnaŭlałasia paśla pandemii. U cełym pa vynikach hoda rost VUP rehijona prahnazujecca ŭ pamiery 4%: u Armienii — 4,5%, Biełarusi — 2,1%, Kazachstanie — 3,8%, Kyrhyzstanie — 3,7%, Rasii — 4,1%, Tadžykistanie — 7,9%, piša onliner.by.
Paśla zaviaršeńnia aktyŭnaj fazy rostu «dynamika budzie pastupova nabližacca da zbałansavanych tempaŭ», ličać ekśpierty. Pry hetym u Biełarusi ŭ bazavym scenaryi čakajecca minimalny rost VUP u 2022 hodzie — na 0,7%. Paraŭnajcie: dla Rasii prahnazujecca rost na 2,8%, dla Kazachstana — na 4,2%, Armienii i Kyrhyzstana — 4,8 i 4,5% adpaviedna.
Inflacyja ŭ cełym pa rehijonie pavinna zapavolicca i vyjści na ŭzrovień 5,3% u 2022 hodzie ŭ paraŭnańni z 8,2% u 2021-m. Adznačajecca, što ŭ Biełarusi ciapier samaja vysokaja inflacyja ŭ paraŭnańni ź inšymi krainami-udzielnicami banka — 10%. U nastupnym hodzie jana pavinna źnizicca da ŭzroŭniu 7,4%.
Prahnoz JEABR. Asnoŭnyja makraekanamičnyja pakazčyki dziaržaŭ — udzielnic banka (bazavy scenar)
Analityki JEABR nie prahnazujuć istotnych źmianieńniaŭ kursa dalara ŭ adnosinach da nacyjanalnych valut u rehijonie. Rasijski rubiel u bazavym scenaryi pavinien navat źlohku ŭzmacnicca — dalar možna budzie kupić za 72 rubli. Biełaruski rubiel asłabnie, ale šokavaj devalvacyi ekśpierty nie čakajuć. Čakajecca, što ŭ 2022 hodzie kurs u Biełarusi spynicca na ŭzroŭni 2,65 rubla za dalar.
