Pra vychad knihi napisała ŭ Fejsbuku fiłosaf Iryna Dubianieckaja.

«Jana vyjšła! «Troški bližej da sonca, troški dalej ad miesiaca» — pieršaja ŭ našych (i nie tolki) šyrotach kniha pa etnafiłasofii, nad jakoj ja siadzieła apošnija miesiacy dniami i načami da poŭnaha vypadzieńnia z žyćcia.

10 aŭtaraŭ, 2 redaktary (Siarhiej Sańko i ja), 5 častak — pra suśviet, sakrum, čałavieka, hramadstva i kaštoŭnaści. Bolš za 160 artykułaŭ, jakija razam składajucca ŭ daśledavańnie biełaruskaj karciny śvietu. U artykułach mnostva cytat z žyvoj narodnaj dumki z falkłarystyčnych zapisaŭ 19—21 st.

Ja kožnamu artykułu dała nazvu ź biełaruskaj litaratury i epihrafy, ź jakich vidać, jak naša kultura ŭzajemadziejničaje z narodnaj tradycyjaj, reahuje na jaje, raźvivaje, adprečvaje, pierajnačvaje. Takaja sabie intelektualnaja i mastackaja refleksija na narodnuju fiłasofiju, a taksama jaje praciah u biełaruskim aŭtarskim piśmienstvie.

Usiaho kala 700 epihrafaŭ z tekstaŭ ad 12 da 21 stahodździa. Heta jašče j samakaštoŭny cytatnik biełaruskaj dumki!

Aŭtary epihrafaŭ — biełaruskija myślary i tvorcy ad Siaredniaviečča, Renesansu, Refarmacyi, Aśvietnictva da našych dzion. Jany śviedčać, što idei i vobrazy, na jakich hruntujecca staražytnaje aŭtentyčnaje myśleńnie, praciahvajuć farmavać intelektualny dyskurs, utvarajučy niepieraryŭny kulturny dyjałoh, supolny i indyvidualny rozdum nad asnoŭnymi pytańniami, što viaredziać usie pakaleńni nacyjanalnaj supolnaści. Takim čynam stvarajecca abjomnaja karcina biełaruskaha śvietamyśleńnia i śvietaadčuvańnia.

Afarmleńnie knihi dadaje jašče adnu płyń biełaruskaha śvietabačańnia — vizualnuju, uziatuju ź biełaruskaj knižnaj ilustracyi 15—17 st. Vydavieckaja (palihrafičnaja) praca nie idealnaja, ale ŭ cełym knižka pryhožaja.

Spadziajusia, čytačy atrymajuć ad jaje zadavalnieńnie.

Darečy, kali chto nie paznaŭ, nazva ŭziataja z Karatkieviča i apisvaje miesca Biełarusi ŭ suśviecie», — napisała jana.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?