Valer Karbalevič
- Jarmošyna pryjšła na svaju pasadu z parušeńniem zakonu. Pryznačeńnie staršyni CVK było prerahatyvaj Viarchoŭnaha Savietu. Łukašenka svaim ukazam z parušeńniem zakonu pryznačyŭ jaje na pasadu staršyni zamiest Viktara Hančara.
- Pry Jarmošynaj, jaje vysiłkami była stvoranaja amal idealnaja mašyna dla atrymańnia patrebnych vynikaŭ hałasavańnia. Jarmošyna — heta ŭžo nie proźvišča, heta brend stvareńnia paralelnaj realnaści, ničym nie padobnaj da taho, jak ludzi realna hałasujuć i jakija ličby ahučvajuć. Paralelnych realnaściaŭ, jakija pamiž saboju nie pierasiakajucca.
Naziralnik na vybarach-2020. Fota apublikavaŭ u Facebook Juryj Vaskrasienski. «Naziralnik na ŭčastku. Viadoma, heta fota ablacić uvieś śviet. Čarhovy štrych da cyničnaha śpiektakla pad nazvaj «vybary», — napisaŭ jon.
- Čamu jaje adpravili ŭ adstaŭku? Tut i ŭzrost, i zakančeńnie kantraktu.
- Łukašenka stajaŭ pierad niaprostym vybaram. Z adnaho boku, kali Jarmošyna — heta brend biełaruskich vybaraŭ, to mianiać brend napiaredadni važnaj elektaralnaj kampanii trochi niebiaśpiečna. Heta niezrazumieły sihnał «viertykali». Mianialisia kiraŭniki ŭradu, ministry, staršynia KDB, a Jarmošynu nie čapali. Kali jaje mianiać, to dasyłajecca čynoŭnikam niezrazumieły sihnał: u nas pa-inšamu buduć vybary prachodzić ci što?
- Druhaja prablema, jakaja ŭźnikła pierad Łukašenkam, — heta hranična nizki davier da CVK. Zamiena Jarmošynaj na Karpienku — niejkaja sproba viarnuć CVK davier hramadstva.
Adkrytyja kabinki - novaje na vybarach-2020
Vital Cyhankoŭ
- Ja nie liču, što sychod Jarmošynaj zusim ničoha nie aznačaje. Jak minimum, heta aznačaje, što ŭłady paličyli, što nastupnuju kampaniju (refierendum) jana ŭžo nie paciahnie, nie praviadzie na «naležnym uzroŭni».
- U apošnija hady, asabliva paśla letašnich vybaraŭ Jarmošyna pačała demanstravać stomlenaść, abyjakavaść.
- 10 žniŭnia 2020-ha jana abviaściła spuščanyja joj źvierchu ličby i navat nia stała davać nijakich istotnych kamientaroŭ, nie praviała tradycyjnaj presavaj kanfierencyi. Jak śviedčyć Aleś Pilecki, 10 žniŭnia jana zahavaryła tolki z adnym žurnalistam, jakomu paviedamiła, što na vybarach 2020 hodu jaje najbolš uraziŭ učynak mastaka-akcyjanista Kuźmiča, jaki namalavaŭ na svaim vybarčym biuleteni fałas. Kramolnyja dumki vykazała da hetaj usioj kampanii.
- Taksama jana nieadnojčy kazała, što joj zastałosia tolki «dažyvać žyćcio». Mahčyma, taki nastroj byŭ u jaje źviazany i sa śmierciu syna ŭ 2017 hodzie. Jana ŭžo nie prajaŭlała raniejšaha entuzijazmu, a dla kampanii nastupnaha hodu jon uładzie na hetaj pasadzie spatrebicca.
- Karpienku daviadziecca nanoŭ farmavać vybarčyja kamisii ŭsich uzroŭniaŭ, vyčyščajučy adtul niełajalnych. Treba čałaviek, jaki budzie adnaŭlać toje, što złamałasia ŭ 2020 hodzie. Treba čałaviek bolš aktyŭny.
Milicyi na vybarčych učastkach na vybarach-2020 časam było bolš, čym naziralnikaŭ, a zatrymańni pačalisia zadoŭha da dnia vybaraŭ.
Jury Drakachrust
- Z punktu hledžańnia niezaležnaha hramadstva vybary 2020 hodu vyznačalisia šalonym ciskam na naziralnikaŭ, fantastyčnymi, ničomu nieadpaviednymi vynikovymi ličbami: za Łukašenku — zvyš 80%.
- Ź inšaha boku, kala 200 učastkovych kamisijaŭ u vynikovych pratakołach zafiksavali, što Cichanoŭskaja nabrała bolš za 50%, a jašče kala 100 — što jana nie dasiahnuła 50%, ale nabrała bolš, čym Łukašenka. I hetyja dadzienyja zrabili svoj upłyŭ na hramadskija nastroi i na pavodziny ludziej. Z vynikaŭ pa hetych 300 učastkach stali rabić vysnovu, što mienavita takija sapraŭdnyja vyniki i pa ŭsioj krainie. Z punktu hledžańnia ŭłady — chto ŭ hetym vinavaty? Jarmošyna!
Daviedka
13 śniežnia Łukašenka pryznačyŭ Ihara Karpienku na pasadu staršyni Centrvybarkamu. Papiaredniaj staršynioj Centralnaj kamisii pa vybarach i praviadzieńni respublikanskich refierendumaŭ Biełarusi 25 hadoŭ była Lidzija Jarmošyna.
Jana ŭznačaliła strukturu paśla adchileńnia ad pasady Viktara Hančara, jaki paźniej źnik razam ź biźniesoŭcam Anatolem Krasoŭskim.
Ihar Karpienka — były lidar praŭładnaj Kamunistyčnaj partyi. Da hetaha pryznačeńnia jon zajmaŭ pasadu ministra adukacyi.
5 faktaŭ pra kamunista Ihara Karpienku, jakomu davieryli miesca staršyni CVK
«Ja syšła, jak sychodziać mužyki». Praviły žyćcia Lidzii Jarmošynaj
