Siarhieju prysudzili bolš za ŭsich: 18 hod kałonii ŭzmocnienaha režymu. Paprasili Śviatłanu Cichanoŭskuju prakamientavać pryhavor mužu i, karystajučysia mahčymaściu, zadali joj jašče paru pytańniaŭ.
Śviatłana Cichanoŭskaja.
«Naša Niva»: Siońnia biełaruskija sudy nie vynosiać apraŭdalnyja prysudy, tym bolš pa palityčnych spravach. I navat viedajučy, što Siarhieja čakaje termin, jakija emocyi vy adčuvajecie ciapier, kali voś-voś ahučać prysud? Ci budziecie vy niejkim asablivym čynam siońnia adnaŭlacca, kab stabilizavacca psichałahična?
Śviatłana Cichanoŭskaja: Hety hod i minuły krychu zahartavali mianie psichałahična. Kaniečnie, da ŭsiaho hetaha apryjory niemahčyma stavicca narmalna, tamu što heta nie toje, z čym možna mirycca.
Ale voś siońnia ŭ mianie čarhovy pracoŭny vizit, u Brusiel, tamu smutkavać, pryśviačać ceły dzień psichałahičnamu samakatavańniu ja dakładna nie budu.
Ciapier treba jašče bolš pracavać, sustrakacca, padymać hetuju temu va ŭsich ŚMI — zvanić va ŭsie zvany. Raskazvać, što takoje adbyvajecca ŭ Biełarusi. Ja budu siońnia rabić toje, što mahu ŭ hetaj situacyi. Ale nie płakać, nie hałasić dakładna — nikomu heta nie dapamoža.
«NN»: Ci budziecie novuju infarmacyju pra Siarhieja niejak danosić dzieciam?
SC: Maja małodšaja dačka nie viedaje i nie asensoŭvaje, dzie jaje tata. Starejšy syn razumieje, što adbyvajecca. Ale ja nie maju prava kazać im, što voś stolki nastupnych hod jany nie ŭbačać baćku, tamu što ja sama ŭ heta nie vieru. I nanosić psichałahičnuju traŭmu svaim dzieciam ja nie budu.
Siarhiej Cichanoŭski.
«NN»: Što b skazali sudździam, prakuroram, usim tym, chto datyčny da źniavoleńnia muža, kali b sustrelisia ź imi vočy ŭ vočy?
SC: Mabyć, kali b ja ŭbačyła hetych ludziej žyŭcom, emacyjna b niešta i skazała. Ale ciapier zaklikać da sumleńnia ludziej, u jakich jaho niama, biessensoŭna.
Ja razumieju, što tyja, chto siońnia pryhavorvaje našych blizkich da hadoŭ turmy — heta ludzi, jakija byli tudy pastaŭlenyja, jakija išli na pasady sudździaŭ i prakuroraŭ asensavana.
Kazać im, sudzicie pa sumleńni, sensu niama. Jany biaruć na dušu vialiki hrech, i ja dumaju, što pryjdzie čas — jany ŭsio ŭśviadomiać. Pakul ža jany prosta nibyta «vykonvajuć svaju pracu».
«NN»: Što ŭsio ž pavinien rabić kožny biełarus, kab Siarhiej i inšyja palitviaźni vyjšli na volu chutčej, usie viarnulisia dadomu?
SC: Zrazumieła, što niama čaroŭnaj knopki, jakaja ŭsio imhnienna źmienić. Biełarusy pakazali svaju mužnaść, moc, adzinstva ŭ minułym hodzie i praciahvajuć pakazvać u hetym.
Niama niejkaha adzinaha dziejańnia, jakoje adnaznačna pryviadzie nas da pieramohi, da vyzvaleńnia ludziej. Heta štodzionnaja praca, štodzionny cisk.
Što možna zrabić? Zaležyć ad taho, dzie vy znachodziciesia. Kali vy ŭ Biełarusi, to, u pieršuju čarhu, bieražycie siabie: my i tak stračvajem šmat ludziej. Ale navat ź Biełarusi možna napisać list palitźniavolenamu, sabrać pieradaču dla ludziej, padtrymać siamju asudžanaha, jaho dziaciej.
Vy možacie dałučycca da šerahu karysnych inicyjatyŭ, abraŭšy niešta svajo na sajcie, dzie jany pieraličanyja.
Kali vy znachodziciesia za miažoj i byli vymušanyja vyjechać, nie dazvalajcie sabie viarnucca da zvyčajnaha žyćcia całkam. Vaš pramy abaviazak — praciahvać baraćbu, tamu što za vas, jak i za mianie, siadziać ludzi.
Davajcie intervju, pryciahvajcie hramadskuju ŭvahu da taho, što adbyvajecca ŭ krainie, i taksama dałučajciesia da inicyjatyŭ, jakija dapamahajuć biełarusam, što pracujuć na mižnarodnaj arenie.
Navat maleńki cisk nie dazvalaje režymu pieraharnuć staronku: režym viedaje, što ludzi nie źmianili svajo staŭleńnie da taho, što adbyvajecca.
«NN»: Hod byŭ ciažki, jon praciahvajecca. Ale što vy možacie adznačyć z pazityŭnaha, što ŭ im było, jakija vyniki pracy sa znakam «+»?
SC: Hałoŭny vynik pracy — toje, što my zmahli praz hod zachavać adzinstva, jak by prapahanda ni kryčała, što jaho niama, što biełarusy razyšlisia pa svaich damach. Heta ŭsio niapraŭda.
Bolšaść biełarusaŭ bačyć adnu metu i stratehiju, u miežach jakoj kožny moža rabić toje, što moža. I toje, što my nie rassvarylisia, što nichto nie supraćstaić adno adnamu — hałoŭnaje naša dasiahnieńnie.
Režymu nie ŭdałosia raździalić ludziej. I jany adčuvajuć hetuju moc: toje, što my vystupajem adzinym frontam.
Siarhieja Cichanoŭskaha zatrymali ŭ traŭni 2020 hoda na pikiecie pa zbory podpisaŭ u padtrymku Śviatłany. Spačatku jamu pradjavili abvinavačvańnie pavodle č. 1 art. 342 Kryminalnaha kodeksa (arhanizacyja dziejańniaŭ, što hruba parušajuć hramadski paradak). Paźniej tudy dadalisia novyja artykuły: č. 1 art. 293 (arhanizacyja masavych biesparadkaŭ), č. 3 art. 130 (raspalvańnie sacyjalnaj varožaści), č. 2 art. 191 (pieraškoda pracy CVK).
Raniej u AAN advakatka Cichanoŭskaha vyjhrała jaho spravu: na padstavie rašeńnia Pracoŭnaj hrupy pa advolnych zatrymańniach Rady pa pravach čałavieka AAN Siarhiej musiŭ być vyzvaleny.
Cichanoŭskamu — 18 hadoŭ, Łosiku — 15, Statkieviču — 14. Vyniesienyja žachlivyja prysudy pa «spravie Cichanoŭskaha»
Darja Łosik pra prysud mužu: «Ja ni razu nie paškadavała, što Ihar moj muž, što ja addała jamu svajo serca»
«Mikałaj paŭtaraje: u ich niama stolki času, kolki jany spadziajucca». Žonka Statkieviča pra pryhavor mužu
Što treba viedać pra «spravu Cichanoŭskaha»
