Pres-sakratar apieratara mabilnaj suviazi A1 Mikałaj Bredzieleŭ

Pres-sakratar apieratara mabilnaj suviazi A1 Mikałaj Bredzieleŭ

Niekalki biełaruskich supracoŭnikaŭ bujnych mižnarodnych kampanij zatrymanyja ŭ Biełarusi za apošnija dni. Na minułym tydni — pres-sakratar apieratara mabilnaj suviazi A1 (uvachodzić u A1 Telekom Austria Group) Mikałaj Bredzieleŭ, dyrektar pa markietynhu i prodažy aŭtamabilaŭ «Chionde AŭtaHrad» (aficyjny dyler Hyundai u Biełarusi) Siarhiej Babaškoŭ i hałoŭny biźnies-analityk IT-kampanii EPAM Dzianis Nasura.

U praŭładnych Telegram-kanałach zjavilisia ich tak zvanyja «pakajannyja» videazvaroty, jakija, pa ŭsioj vierahodnaści, zroblenyja pad prymusam, i ŭ jakich zatrymanyja paviedamlajuć, što byli padpisanyja na pryznanyja ŭ krainie ekstremisckimi resursy, nazyvajuć pamier svaich zarobkaŭ, a Bredzieleŭ i Babaškoŭ raskazvajuć padrabiaznaści asabistaha žyćcia.

Bredzielevu dali 15 sutak administracyjnaha aryštu za niepadparadkavańnie supracoŭnikam milicyi, Nasuru — 13 sutak za raspaŭsiudžvańnie ekstremisckich materyjałaŭ.

U paniadziełak, 13 śniežnia, stała viadoma ab zatrymańni vienčurnaha inviestara, dyrektara IT-kampanii Aivitam Dźmitryja Dosava. Siłaviki taksama zapisali ź im anałahičnaje videa i raspaŭsiudzili jaho. Čamu biełaruskija ŭłady atakujuć supracoŭnikaŭ mižnarodnych kampanij, i da čaho heta moža pryvieści?

Ułady ŭ Minsku chočuć pakarać niełajalny bujny biznes?

«Prapahandysckaja kampanija, jakaja supravadžaje zatrymańnie mieniedžara A1, vyhladaje jak ataka na samu kampaniju, jaje abvinavačvajuć u źlivie źviestak, u dapamozie pratestam, ci, jak heta nazyvaje ŭłada, «teraryzmu»», — adznačaje biełaruski palityčny analityk Arciom Šrajbman.

Na jaho dumku, takim čynam ułady žadajuć pakarać biznes, jaki moh dazvolić sabie niełajalnaść, i zachodnija krainy, ź jakich jon pryjšoŭ na biełaruski rynak.

«Daciahnucca da zachodnich uradaŭ Minsk niazdolny, ale moža daciahnucca da biznesu. Ułady šmatkroć pahražali, što ŭ adkaz na ekanamičnyja sankcyi buduć atakavać zachodnija kampanii», — dadaje Šrajbman.

U svaju čarhu, dyrektar Centra jeŭrapiejskaj transfarmacyi Andrej Jahoraŭ ličyć, što

zatrymańnie top-mieniedžaraŭ mižnarodnych kampanij — heta sihnał biznesu: vy pavinny siadzieć cicha i ni ŭ jakim razie nie mieć nijakich suviaziaŭ z palitykaj.

«Nie dumaju, što heta naŭprost źviazana z sankcyjami, chacia ŭłady jany niervujuć. U stanie hetaj niervovaści robiacca dziejańni represiŭnaha charaktaru ŭ styli «bambić Vałožyn». Pieraśledujucca mižnarodnyja kampanii. Ułady pakazvajuć, što nichto nie zjaŭlajecca niedatykalnym, u tym liku ź mieniedžmientu bujnych kampanij. Usie, chto tak ci inakš padtrymlivaŭ abo simpatyzavaŭ pratestam, buduć pakaranyja», — tłumačyć Jahoraŭ.

Zatrymańni ŭdarać pa inviestycyjnym klimacie ŭ Biełarusi

Ekśpiert upeŭnieny, što takija dziejańni ŭdarać pa inviestycyjnym klimacie ŭ krainie. Akramia taho, kampanii buduć bolš aktyŭna pieradysłakavać svaich supracoŭnikaŭ i vyvodzić aktyvy ź Biełarusi.

«Heta padryvaje biełaruskuju ekanomiku, ale nie jana ciapier cikavić ułady, a ich ustojlivaść u siarednieterminovaj pierśpiektyvie. Jany ličać, što biznes moža mieć dačynieńnie da padtrymki ahulnaha demakratyčnaha ruchu ŭ Biełarusi, i pasyłajuć vyrazny sihnał, što ŭ pierśpiektyvie nie buduć dapuskać pieraciakańnia kapitału ź biznes-siektara ŭ hramadzianski», — miarkuje Jahoraŭ.

Na dumku ž Arcioma Šrajbmana, pakul ciažka skazać, jakija mienavita kampanii mohuć paciarpieć, zachočuć syści ź Biełarusi, buduć vycisnutyja z krainy ci nacyjanalizavanyja: «Nakont kampanii A1 — sumniavajusia, što jana dobraachvotna pakinie Biełaruś. Heta moža zdarycca, kali tut stvorać nievynosnyja ŭmovy dla pracy, ci joj budzie pahražać poŭnaja nacyjanalizacyja».

Prapahanda nakinułasia na A1 i zaklikaje nacyjanalizavać kampaniju. Nakolki heta mahčyma?

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?