«Zaniepakojenaść, biezumoŭna, vyklikaje vyklučeńnie praktyčna pałovy tavaraŭ ź pieraliku. Heta pradukty pieršaj nieabchodnaści — krupy, niekatoryja vidy harodniny, kaŭbasnyja vyraby, ryba i inšyja, — zajaviŭ namieśnik staršyni Fiederacyi prafsajuzaŭ Biełarusi Uładzimir Paźniakoŭ. — Usio, što nieabchodna dla paŭnavartasnaha racyjonu charčavańnia.
Treba razumieć, što za admienaj abmiežavańniaŭ moža pajści rost koštaŭ na hetuju hrupu tavaraŭ. Tym bolš, što pastanova pryniataja napiaredadni navahodnich śviataŭ, kali adznačajecca pavyšany popyt na pradukty i na hetym fonie zaŭsiody jość ryzyka štučnaha zavyšeńnia cen».
Prafsajuzy zajaŭlajuć, što niahledziačy na suśvietny rost koštaŭ i pavyšeńnie vydatkaŭ vytvorcaŭ, tak prosta admianiać pastanovu №100 nie varta. Na ich dumku, «patrebnyja dadatkovyja miechanizmy, jakija zachavajuć stabilnuju situacyju na rynku i nie paciahnuć za saboj značnaha rostu koštaŭ».
«Pakolki, jak pakazvaje praktyka pracy prafsajuznaha manitorynhu, nie zaŭsiody za pavyšeńniem koštaŭ na tavary stajać abjektyŭnyja pryčyny, — paviedamlajecca na sajcie fiederacyi. — Jość i subjektyŭnyja faktary jak z boku vytvorcaŭ, tak i handlu. U dadzienym vypadku nieabchodna pracavać na apiaredžańnie i svoječasova ŭžyvać dadatkovyja miechanizmy.
Naprykład, heta i ŭdaskanaleńnie padychodaŭ pracy stabilizacyjnych fondaŭ, a taksama dakładnaje ŭrehulavańnie ŭzajemaadnosin pamiž vytvorcami i pradaŭcami. Vytvorcy ŭ dadzienym vypadku buduć upeŭnienyja, što ich pradukcyju vykupiać na praciahu siezona pa damoŭnaj canie, a heta harantuje spažyŭcam tavar i stabilnuju canu».
Fiederacyja zajaŭlaje, što biare na kantrol ceny na tyja tavary, jakija buduć rehulavacca ź siońniašniaha dnia.
«Siońnia ŭžo jość damoŭlenaść z Kamitetam dziaržkantrolu, MARH, što my sumiesna, praktyčna ŭručnuju budziem adsočvać, kab nie było nieabhruntavanaha rostu cen, — adznačyŭ namieśnik staršyni FPB. — Pry nieabchodnaści budziem infarmavać Ministerstva handlu i antymanapolnaha rehulavańnia, urad u cełym, bo mienavita jany źjaŭlajucca rehulatarami ŭ hetaj śfiery.
Kab apieratyŭna spynialisia sproby śpiekulatyŭnaha rostu, a ŭ vypadku abjektyŭnaha pavyšeńnia koštaŭ na pradukty byli pryniatyja rašeńni ab pavyšeńni dachodaŭ hramadzian, asabliva najbolš uraźlivych hrup. Pakolki ŭžo ciapier my bačym ryzyku źnižeńnia pakupnickaj zdolnaści zarabotnaj płaty i piensij».
Pa danych manitorynhu prafsajuzaŭ za listapad, u canie nie vyraśli kisłamałočnyja pradukty, piarłovaja krupy, marharyn, masła z małaka žyvioł, pšaničnaja muka, ryba (žyvaja, zamarožanaja), cukar, salonyja sieladcy, fruktovyja soki, jajki.
Miž tym, tolki ŭ listapadzie, pa danych manitorynhu, amal na 11% padaraželi hračanyja krupy i babovyja, na 9,8% stali daražejšymi buraki, 8,5% dadała ŭ košcie kapusta, amal na 5% padaraželi ahurki, rys dadaŭ u košcie 4%, aŭsianaja krupy — 3,6% i małako — 3,2%.
Niaznačna źnizilisia ceny na bulbu, kaŭbasnyja vyraby, kurycu, subpradukty, sadavinu, čaj čorny bajchavy.
Za hod (ź listapada 2020 pa listapad 2021) padaraželi ŭsie vidy praduktaŭ, jakija padlahajuć manitorynhu, adznačajuć prafsajuzy. Najbolš istotny rost koštaŭ naziraŭsia na harodninu — kapusta padaražeła ŭ 2,5 raza, bulba — na 73,3%, buraki — u 2,1 raza, morkva — na 74,6%, pamidory — na 19,6%, ahurki — na 6,4%, zielanina — na 22,4%.
