Padraście zbor dla ahrasiadzib. Ciapier heta dźvie bazavyja vieličyni na hod (58 rubloŭ), a z nastupnaha hoda — 31 rubiel u miesiac (372 rubli ŭ hod).
Istotna pavialičycca adziny padatak: u 2-4 razy ŭ zaležnaści ad vidu dziejnaści.
Razhledzim na prykładzie stavak dla Minska. Tak, dla IP, jakija handlujuć adzieńniem sa skury, dyvanami, składanaj bytavoj elektratechnikaj, padatak z nastupnaha hoda składzie 1260 rubloŭ (zamiest ciapierašnich 315). Dla inšych IP źmieny taksama zaŭvažnyja. Dla pradprymalnikaŭ u miedycynie i stamatałohii padatak vyraście z 208 da 832 rubloŭ, cyrulnikaŭ — sa 135 da 540 rubloŭ, tych, chto zajmajecca hruzavoj transpartnaj dziejnaściu, — sa 187 da 535 rubloŭ, budaŭničymi rabotami — sa 155 da 478, zdaje ŭ arendu kvatery — z 37 da 148 rubloŭ.
A voś jak pavialičacca adzinyja padatki dla fizičnych asob (samazaniatych). U pradaŭcoŭ vypiečki i kandytarki staŭka vyraście z 47 da 96 rubloŭ, videaapierataraŭ — sa 129 da 263 rubloŭ, pierakładčykaŭ — z 83 da 169 rubloŭ. Cyrulniki i manikiurščycy buduć płacić 226 rubloŭ u hod (ciapier 111), a vytvorcy adzieńnia — 135 rubloŭ (zamiest 66).
Źmieny čakajuć taksama tych, chto viadzie padsobnuju haspadarku na svaim učastku i paśla pradaje harodninu, miasa ci inšuju sielhaspradukcyju. Kali ich dachody ad hetaj dziejnaści buduć pieravyšać 200 bazavych vieličyń na hod (na siońnia heta 5800 rubloŭ), to daviadziecca płacić 10% ad sumy pieravyšeńnia. Ciapier hetyja dachody padatkam nie abkładajucca.
Toje ž i dla fizičnych asob, jakija źbirajuć i pradajuć dzikarosłyja jahady, hryby, lekavyja travy, arechi.
Z nastupnaha hoda sproščany padatak dla IP składzie 6%. Ciapier pradprymalniki, jakija pracujuć pa sproščanaj sistemie, mohuć abirać — płacić 5% padatku abo 3% plus padatak na dadadzienuju vartaść (PDV).
Sproščanym padatkaabkładańniem nie zmohuć karystacca IP, jakija akazvajuć pasłuhi. Vyklučeńnie dla tych, chto zajmajecca turystyčnaj dziejnaściu, achovaj zdaroŭja, suchaputnym transpartam, hramadskim charčavańniem, pracuje ŭ halinie kampjutarnaha prahramavańnia.
Nie zmohuć joj karystacca taksama arhanizacyi, dzie štat pieravyšaje 50 čałaviek (ciapier abmiežavańnie ŭ 100 čałaviek). Ale, pa słovach kiraŭnicy biznes-sajuza pradprymalnikaŭ i najmalnikaŭ imia Kuniaŭskaha Žanny Tarasievič, heta źmiena nie krytyčnaja.
«U nas siaredniaja kolkaść rabotnikaŭ na małych pradpryjemstvach, jakija karystajucca sproščanaj sistemaj padatkaabkładańnia, — 8-9 čałaviek. Tamu heta nie nadta paŭpłyvaje», — kaža jana.
Z 2023 hoda sproščanaha padatku dla IP nie budzie (tolki dla mikrarhanizacyj). Pradprymalnikam treba budzie pierajści abo na adziny padatak, abo na padachodny.
Z 2023 hoda dla samazaniatych i ramieśnikaŭ uviaduć prafiesijny padatak. Jakija vidy dziejnaści pad jaho padpaduć, pakul nieviadoma. Padatak zamienić padachodny i ŭznosy ŭ fond sacyjalnaj abarony nasielnictva. Pamier jaho budzie zaležać ad vyručki — 10%, kali jana mienšaja za 60 tysiač rubloŭ u hod, i 20%, kali bolšaja.
«Niekatoryja rečy, pra jakija my kazali, užo realizavali. Tolki nie ŭ samym lepšym varyjancie, — kaža Tarasievič. — Arhanizavany biznes zaŭsiody staviŭ pytańnie ab tym, što pavinny vyraŭnivacca padatki. Ale heta nie aznačaje, što jany pavinny pavyšacca.
Padatkovaja nahruzka na biznes nie źnizicca. My kazali, što varta jašče na hod pakinuć sproščanuju sistemu z mahčymaściu spłaty PDV — heta taksama nie pačuli».
