Pra situacyju raspaviadaje Onliner.
Uviečary 25 śniežnia Maryna ź siamjoj i sabakam hulała pa Kastryčnickaj płoščy. U niejki momant syn žančyny razam z žyviolinaj zajšli pad ustalavanyja na płoščy śvietłavyja arki — i sabaka pavaliłasia, jak u sutarhach, pačała skavytać, abkusała sabie łapy i jazyk. Adciahnuŭšy sabaku ad arki, muž Maryny padyšoŭ zabrać pakinutyja tam rečy, i jaho taksama ŭdaryła tokam.
U toj ža dzień muž i žonka napisali dźvie zajavy ŭ RUUS Centralnaha rajona: adnu z apisańniem situacyi, a druhuju — z prośbaj pryciahnuć da administracyjnaj adkaznaści asobu, adkaznuju za biaśpiečnuju ekspłuatacyju śvietłavoj arki. Na 28 śniežnia adkazu na zajavy niama.
Pa kamientaryj z nahody zdareńnia Onlíner źviarnuŭsia ŭ pres-słužbu HUUS Minharvykankama. «Minskenierha» pravodzić pravierku», — patłumačyła aficyjny pradstaŭnik HUUS Minharvykankama Natalla Hanusievič.
Taksama žurnalisty vyśvietlili, što pryhožyja śviatočnyja arki — votčyna «Minskrekłamy». «Usie niepaładki likvidavanyja, arki pracujuć, ludzi mohuć hulać na płoščy i nie bajacca za svajo zdaroŭje. Ciapier my raźbirajemsia ŭ hetaj situacyi, zrabili zapyt u «Minharśviatło», chutka nam pavinny dać infarmacyju. Ale pakul kančatkovych vynikaŭ pravierki niama», — rastłumačyli ŭ arhanizacyi.
