Fota Bloomberg

Fota Bloomberg

Uładzisłaŭ Klušyn — zasnavalnik IT-kampanii «M13», jakaja na zamovu rasijskich uładaŭ raspracoŭvaje sistemy manitorynhu sacyjalnych sietak i ŚMI. Naprykład, jana dała Kramlu i Ministerstvu abarony sistemu manitorynhu ŚMI «Kaciuša».

Klušyna, jakoha 18 śniežnia ekstradziravali sa Šviejcaryi ŭ ZŠA, abvinavacili ŭ niezakonnym zarobku dziesiatkaŭ miljonaŭ dalaraŭ na handli ŭzłamanaj infarmacyjaj ab dachodach karparacyj.

U dadatak da hetaha Klušyn akazaŭsia kramloŭskim insajdaram. Jaho praca ŭ halinie kibierbiaśpieki i suviazi z Kramlom mohuć zrabić jaho karysnaj krynicaj infarmacyi dla aficyjnych asob ZŠA, na dumku niekalkich ludziej, znajomych z pytańniami rasijskaj vyviedki. Što najbolš važna, hetyja ludzi skazali, što kali jon vyrašyć supracoŭničać, to zmoža dać amierykancam samaje blizkaje ŭjaŭleńnie ab manipulacyjach na vybarach 2016 hoda.

Sa słoŭ ludziej u Maskvie, blizkich da Kramla i słužbaŭ biaśpieki, rasijskaja vyviedka pryjšła da vysnovy, što 41-hadovy Klušyn maje dostup da dakumientaŭ, jakija majuć dačynieńnie da rasijskaj kampanii ŭzłomu siervieraŭ Demakratyčnaj partyi padčas vybaraŭ u ZŠA ŭ 2016 hodzie.

Hetyja dakumienty, pa ich słovach, śviedčać, što ŭzłomam kiravała kamanda rasijskaj vajennaj vyviedki HRU, jakuju amierykanskija kampanii pa kibierbiaśpiecy achryścili «Fancy Bear» abo APT28. Takaja schovanka zabiaśpiečyła b ZŠA ŭpieršyniu padrabiaznymi dakumientalnymi dokazami mierkavanych namahańniaŭ Rasii paŭpłyvać na vybary.

Za dva hady da jaho adjezdu z Rasii da Klušyna źviarnulisia špijonskija ahienctvy ZŠA i Vialikabrytanii, i jon atrymaŭ pavyšany ŭzrovień biaśpieki ŭ Šviejcaryi. Ale jon prapuściŭ apošni šaniec abskardzić svaju ekstradycyju, niedahlad, jaki azadačyŭ mnohich naziralnikaŭ u Maskvie. Niekalki čałaviek zajavili, što jaho pieravod u ZŠA ŭjaŭlaje saboj surjozny vyviedvalny ŭdar pa Kramli, jaki ŭzmacnicca, kali Klušyn vyrašyć damahčysia łaski ad amierykanskich prakuroraŭ, padaŭšy infarmacyju ab unutranaj pracy Maskvy.

Troje z hetych ludziej dadali, što, na ich dumku, Klušyn maje dostup da sakretnych zapisaŭ pra inšyja apieracyi HRU vysokaha ŭzroŭniu za miažoj. Ahienty rasijskaj vajskovaj vyviedki ŭ apošnija hady byli źviazanyja ź sieryjaj chakierskich napadaŭ, a taksama sa sprobaj chimičnaha atručvańnia eks-pałkoŭnika HRU Siarhieja Skrypala i jahonaj dački ŭ Vialikabrytanii ŭ 2018 hodzie. Rasija admaŭlaje svaju datyčnaść.

IT-firma Klušyna M-13 pracavała na prezidenta Rasii, Urad i Ministerstva, pavodle abvinavačvańnia ŭ insajdarskim handli. Siarod jaho padnačalenych byŭ były supracoŭnik vajennaj vyviedki pa imieni Ivan Jermakoŭ, jakomu razam z Klušynym pradjaŭlenaje abvinavačvańnie.

Advakat Klušyna ŭ Šviejcaryi Olivier Čyryk skazaŭ u intervju, što ŭłady ZŠA šukali jaho klijenta, tamu što jany ličać, što ŭ jaho jość unutranaja infarmacyja ab uzłomie vybaraŭ u Rasii ŭ 2016 hodzie, jakuju jon moža dać, kab paźbiehnuć dziesiacihodździaŭ za kratami pa abvinavačvańni ŭ insajdarskim handli. Čyryk dadaŭ, što Klušyn kaža, što jon nievinavaty ŭ insajdarskim handli i ŭ «hipatetyčnym umiašańni ŭ vybary».

Pa słovach advakata, amierykanskaja i brytanskaja vyviedki dvojčy sprabavali zavierbavać Klušyna. Vyviedka ZŠA pasprabavała pryciahnuć jaho letam 2019 hoda na poŭdni Francyi, a brytanskaja vyviedka źviarnułasia da jaho ŭ sakaviku 2020 hoda ŭ Edynburhu, skazaŭ Čyryk.

Klušyn uviekaviečyŭ hetuju druhuju sustreču ŭ zapiscy, jakuju jon napisaŭ praź niekalki tydniaŭ paśla sustrečy i zachavaŭ na svaim kampjutary. Heta adbyłosia ŭ aeraporcie Edynburha, kali Klušyn lacieŭ nazad u Rasieju. Klušyn napisaŭ, što dva ahienty brytanskaj vyviedki — adzin z MI5, a druhi z MI6 — niekalki chvilin razmaŭlali ź im u pakoi, kudy jaho pryviali paśla pravierki pašparta.

Dva ruskamoŭnyja aficery, mužčyna i žančyna, spytali jaho, ci budzie jon «supracoŭničać» sa śpiecsłužbami Vialikabrytanii, i ŭziali jaho numar telefona, kab pryznačyć sustreču padčas jaho nastupnaj pajezdki ŭ Łondan, zapłanavanaj na maj, zhodna z raniej nie apublikavanym dakumientam, jaki byŭ razhledžany Bloomberg. Klušyn napisaŭ, što, choć jon i nie adkazaŭ na prapanovu ab supracoŭnictvie, jon skazaŭ, što chacieŭ by znoŭ sustrecca z ahientami, kab abmierkavać prodaž pradukcyi M-13 brytanskaj vyviedcy.

Niajasna, ci infarmavaŭ Klušyn rasijskuju vyviedku pra vysiłki ZŠA i Vialikabrytanii pa viarboŭcy. Ministerstva zamiežnych spraŭ Vialikabrytanii, jakoje zajmajecca zapytami ŚMI dla MI6, admoviłasia ad kamientaroŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?