Spravakavaŭ DTZ lehkavy aŭtamabil. Jon vyskačyŭ na sustrečnuju pałasu i łob u łob sutyknuŭsia z aŭtobusam. Kiroŭca «Reno», žychar Kryčava, zahinuŭ na miescy. Paranienych rasijan dastavili ŭ Viciebskuju abłasnuju balnicu. Piać čałaviek u ciažkim stanie.
«U asnoŭnym usie spali, my siadzieli zzadu, tolki paśla śniadanku jechali», — raspavioŭ Ihar Šyšoŭ u siužecie ANT.
«Heta byli doli siekundy, my ŭsie spali, pračnulisia ad padzieńnia. Chutka vybralisia z aŭtobusa, chto jak moh, śpiecsłužby zreahavali chutka», — dadała Taćciana Apuryna.
Siarod paciarpiełych jość dzieci. Na ekskursiju ŭ Biełaruś jechali žychary Razani, Čarapaŭca, Jarasłaŭla, Ivanava. Jany pačali padarožža pa Biełarusi z Oršy, u abied pavinny byli pryjechać u Viciebsk, a zatym — pierajezd u stalicu.
«Pieraprafilavanaja častka chirurhičnaha adździaleńnia dla pryjomu ŭsich paciarpiełych, usim akazana dapamoha. Pacyjenty ŭ asnoŭnym z traŭmami skivična-tvarnaj vobłaści, ź pierałomami. Niekalki ciapier prachodziać apieratyŭnaje lačeńnie. Taksama pastupiła dzicia 2013 hoda naradžeńnia, jaho stan zdavalniajučy», — raspavioŭ Jaŭhien Matusievič, hałoŭny ŭrač Viciebskaj abłasnoj kliničnaj balnicy.
Na dapamohu kaleham vyjechali chirurhi i traŭmatołahi ź Minska. Paciarpiełym akazvajecca i psichałahičnaja dapamoha. Śledčyja raspačali kryminalnuju spravu ab parušeńni praviłaŭ darožnaha ruchu sa śmiarotnym zychodam.
