Fota sa staronki Siarhieja Aleksiajonka ŭ Fejsbuku.
U Kazachstanie niama arhanizavanaj palityčnaj apazicyi, a hramadzianskaja supolnaść praktyčna nie isnuje. Ludzi masava vyjšli na vulicy bieź lidaraŭ.
Čatyry słovy pa-kazachsku, dva łozunhi kazachskaha pratestu: «Ałha, Kazachstan» — «Napierad, Kazachstan!», anałah biełaruskaha «Žyvie Biełaruś!», i «Šał kiet!», što aznačaje «Sychodź, stary!». Apošniaje — na adras Nursułtana Nazarbajeva.
Narodnych vystupaŭ takoha maštabu i hieahrafii ŭ Kazachstanie raniej nie było nikoli.
Učora i pazaŭčora na vulicach kazachskich abłasnych haradoŭ pratestavali sotni. Siońnia tysiačy ludziej vyjšli na vulicy Ałmaty, Aktabie, Taraza, Kyzył-Ardy, Aktau, Atyrau, Kakšetau, Žanaaziena, Šymkienta, sotni — u Astanie, Karahandzie, Ekibastuzie, Žetysau, Saryahašy, miarkujučy pa paviedamleńniach telehram-kanała @orda_kz.
Ludzi nie tolki pratestujuć suprać rostu cen i štrafaŭ, ale i patrabujuć adchileńnia ad ułady Nursułtana Nazarbajeva i jaho spadkajemcaŭ.
Hladzicie, što siońnia rabiłasia ŭ sercy Azii.
U Ałmaty, samym vialikim horadzie Kazachstana i jaho byłoj stalicy, pratesty pieraraśli ŭ sutyčki sa śpiecnazam.
U centry Ałmaty doŭha hučali vybuchi, centralnaja płošča Respubliki była zaciahnutaja dymam.
Jak pieradaje kazachskaje vydańnie @orda_kz, hrupy ludziej adkazali na razhon padpałam mašyn palicyi, bićciom vitryn.
U vialikich haradach krainy adklučyli internet, zabłakavali Telehram i Votsap, previentyŭna zatrymlivali patencyjnych demanstrantaŭ.
Raźvitych niezaležnych ŚMI ŭ Kazachstanie niama, kali nie ličyć kazachskuju słužbu «Radyjo Svaboda». Bolšaść videa z Kazachstana źniatyja prostymi ludźmi.
Prezident Kazachstana Kasym-Žamart Takajeŭ źviarnuŭsia da naroda z telezvarotam. U Kazachstanie, u adroźnieńnie ad Biełarusi, prezident zaŭsiody vystupaje na dźviuch movach, i na nacyjanalnaj, i na ruskaj.
Voś ruskamoŭnaja viersija vystupu.
Takajeŭ paabiacaŭ uličyć «usie zakonnyja prośby i patrabavańni» pratestoŭcaŭ i zaklikaŭ «nie paddavacca na pravakacyi». «Ułada nie padzie», — zajaviŭ prezident Kazachstana.
Varta adznačyć, što naziralniki razychodziacca ŭ mierkavańniach ci maje Takajeŭ realnuju ŭładu, ci jaje ŭsio dahetul kantrale Nursułtan Nazarbajeŭ i nabližanyja da jaho siłaviki. Nazarbajeŭ kiravaŭ Kazachstanam z 1990 hoda i stvaryŭ kult svajoj asoby. Navat stalica krainy pierajmienavanaja ŭ Nursułtan, a sam jon nosić tytuł «Jełbasy» — «Baćka nacyi».
Kazachstan byŭ uzornaj, reśpiektabielnaj aŭtakratyjaj. Nazarbajeŭ bałansavaŭ miž Maskvoj, Piekinam, Ankaroj i Zachadam. Pry im dola kazachaŭ u nasielnictvie krainy vyrasła z 48 da 70%.
Vybuch narodnaha niezadavalnieńnia ŭ Kazachstanie pakazaŭ, što žadańnie źmieny režymu pranikła navat u samaje serca Jeŭrazii.
«Nas natchnili biełarusy», — kažuć niekatoryja z demanstrantaŭ.
