Padatki ŭsio ž pierahledzieli
«U nas ustalavany maratoryj na źmianieńni padatkovaha zakanadaŭstva, tamu nijakich pavyšeńniaŭ stavak padatku, akramia indeksacyi na paramietry inflacyi (u tym liku ekałahičny padatak, akcyzy i inšaje), što praduhledžana ŭ 7-m dekrecie, nie budzie, — kazaŭ u 2018 hodzie Dźmitryj Kijko, namieśnik ministra finansaŭ. — Takich płanaŭ niama i na 2020 hod, i na 2021 hady nie płanujecca».
Ale ž u 2021 hodzie padatkovy kodeks pierahledzieli, źmieny pačali dziejničać sa studzienia 2022 hoda.
Nacyjanalny stadyjon nie pabudavali
Pra toje, što stadyjon budzie hatovy ŭ najbližejšyja dva hady, kazaŭ sam Łukašenka ŭ 2019 hodzie. Abiacańni nie spraŭdzilisia.
Inflacyja nie apraŭdała čakańniaŭ
U 2017 hodzie ministr ekanomiki (užo były) Zinoŭski kazaŭ: u ideale inflacyja musić być 2-3%, na hetyja ličby Biełaruś «prosta abaviazana» vyjści ŭ 2020-21 hadach.
Ničoha nie vyjšła. Čakańni samoj siońniašniaj ułady pa vynikach 2021 hoda — inflacyja kala 9%.
«Nie budzie deficytu u sadkach i škołach Minskaj vobłaści». Budzie
Vyrašyć nabalełuju prablemu ciaham troch hadoŭ abiacali ŭ 2018 hodzie.
«Na praciahu najbližejšych troch hadoŭ u Minskaj vobłaści płanujecca całkam zakryć patrebnaść u miescach u dziciačych sadkach i škołach, choć siońnia deficyt składaje adpaviedna 5 tysiač i 3 tysiačy miescaŭ», — kazaŭ kiraŭnik Minabłvykankama Anatol Isačanka ŭ intervju prahramie «Kontury» telekanała ANT. — «Heta vielmi surjoznaja zadača, ale, uličvajučy srodki inviestaraŭ, bankaŭskija kredyty i dziaržaŭnyja resursy, my jaje vyrašym».
Atrymałasia? Pakul nie.
Alaksandr Turčyn, novy kiraŭnik Minskaj vobłaści, u kancy 2020 hoda paviedamiŭ, što prablemu vyrašać ciaham nastupnych dvuch-troch hadoŭ.
«Kožny zmoža atrymać bijamietryčny pašpart u studzieni». Nie, nie zmoža
Sa studzienia 2021 hoda luby hramadzianin zmoža źviarnucca i atrymać bijamietryčnyja dakumienty: ID-kartu i bijamietryčny pašpart, — abiacaŭ uvosieni 2020 hoda načalnik departamienta pa hramadzianstvie i mihracyi Ministerstva ŭnutranych spraŭ Alaksiej Biahun.
«Dla hetaha treba źviartacca na pieršym etapie ŭ terytaryjalnaje padraździaleńnie pa hramadzianstvie i mihracyi pa miescy rehistracyi. Druhi zvarot pa atrymańnie inšaj ID-karty abo bijamietryčnaha pašparta moža adbyvacca ŭ lubym padraździaleńni pa hramadzianstvie i mihracyi», — kazaŭ jon.
Na spravie ž dakumienty na afarmleńnie bijamietryčnaha pašparta pačali prymać tolki z 1 vieraśnia 2021 hoda. I toje, nie biez prablem.
Z kapramontam Minsk nie spraviŭsia
Pa stanie na pačatak 2021 hoda abiacali ŭvieści 1,4 młn kvadratnych mietraŭ žylla paśla kapramontu. I heta tolki ŭ Minsku. Vyrašać prablemu musili ciaham 2020 hoda.
Vynik?
«Z ustalavanym na hod zadańniem nie spravilisia Minsk i ŭsie vobłaści, akramia Hrodzienskaj i Mahiloŭskaj», — adznačyŭ Andrej Ramaška, načalnik upraŭleńnia žyllovaj haspadarki Minžyłkamhasa.
Zapusk pieršaha enierhabłoka AES — mima terminaŭ
«Staić zadača ŭ 2021 hodzie (u pieršym kvartale, pa mienšaj miery) całkam zapuścić u pramysłovuju ekspłuatacyju pieršy enierhabłok», — abiacaŭ pasoł Biełarusi ŭ Rasii Siamaška.
Ale paśla enierhabłok to ŭklučali, to adklučali, bolš-mienš stabilna jon zapracavaŭ tolki ŭvosień 2021 hoda.
Darečy, druhi enierhabłok abiacajuć uvieści ŭ ekspłuatacyju «pad leta 2022-ha».
Kardon trochi spaźniŭsia
Pieršy miełavany kardon na novym zavodzie pa vytvorčaści krejdavanych i niekrejdavanych vidaŭ kardona na bazie filijała «Dobrušskaja papiarovaja fabryka «Hieroj pracy» płanavałasia atrymać u I kvartale 2021 hoda.
Zavod zapuścili, ale ŭ abiacanyja terminy nie ŭkłalisia — jon zapracavaŭ ź leta 2021 hoda.
Łukašenka nie pryjechaŭ na «Iŭjeŭski pamidor»
U 2019 hodzie Alaksandr Łukašenka abiacaŭ naviedać pamidorny fiestyval va Iŭi:
«Akazvajecca, vy pieražyli našeście ŭboračnaj kampanii, u vas byli «Dažynki», i paśla hetaha ŭ vas zastalisia taki centr i miastečka. Vy małajcy, ja naziraju (bolš pa televizary), vy ŭžo pačynajecie pierajmać ispancaŭ: hubicie pamidory. Pahladzieŭ: škada stała, ja ž viaskovy čałaviek, škada pamidoraŭ. A vy tut kidajecie ŭ adzin adnaho, topčacie ich. Ale, napeŭna, uradžaj dobry. Paabiacaŭ, što pryjedu, ale nie viedaju, ci budu ja bicca z vami na pamidorach hetych, ale pryjechać pahladzieć — moža być».
Ale ž hetaha tak i nie adbyłosia.
U 2020 hodzie fiestyval admianili, u 2021 jon prajšoŭ biez udziełu Łukašenki.
