«29.12.2021 № 345 SIZA № 2
Pišu tabie z novaha adrasa, chacia jon, spadziajusia, taksama nienadoŭha. Pasprabuju raskazać u ahulnych rysach svaje ŭražańni ad pajezdki. Tezisna, abryŭkami dumak.
1. Zima dla niekatorych narodaŭ zaŭsiody prychodzić niečakana. Voś i ja — rychtavaŭsia lehčy spać. A raptam vyjaviŭ siabie, jaki nosicca ŭ zamknionaj prastory i dumaje, a čaho b jašče ŭziać, a lepš vykinuć.
2. I ŭsio ž pačućcio, što zima — blizka, było. Jano i niadziŭna: ) Apošnija tydni try ja zajmaŭsia tym, što robić sabaka, kali rabić niama čaho. Tolki nie farbavaŭ budku, a pierabiraŭ uvieś svoj nazapašany skarb i raściahvaŭ jaho pa fajlikach, pakunačkach, miašečkach, torbačkach. Pakavaŭ, vysmoktvaŭ pavietra, ukłaŭsia ŭ dźvie vializnyja torby, ale čaho mnie heta kaštavała!
Ciapier u mianie 4 torby zamiest 2, a maje pažytki ŭjaŭlajuć zachaplalny puzzle. Ciapier doŭhimi zimovymi viečarami ja budu adździalać (jak Papiałušok) «Što? Dzie? Kali? ad johi i Poła Bredli, listy ad malavańnia, aniekdoty ad paštovak, karciny ad karcinak.
Cudoŭny chaos i mahčymaść pierasiahnuć podźvih Hierakła ŭ Aŭhijevych stajniach. Praŭda, u jaho tam vadu možna było puścić, a tut usio ž daviadziecca znoŭ usio pierabrać i razabrać. Zrešty, čas, musić, u mianie budzie.
3. Vykreślivaj sa śpisu knih (śpis nie dajšoŭ) i «Arenu» i «Proby» - na žal, nie paśpieŭ. Pastaviŭ kropku pa ŭčorašnim liście i paniesłasia. Za siońnia pračytaŭ vydadzienuju sa składu «Pašto idzieš voŭča» — vielmi spadabałasia. Taki Mielež u ekspres-varyjancie — stahodździe žyćcia ludziej na bałocie za sotniu staronak. Jość i mahija, i naša niaščasnaja historyja va ŭsioj krasie — kudy ŭžo bieź jaje.
Uvohule, ja siońnia nie sumavaŭ u tyja momanty, jakija byli adviedzieny dla sumavańnia. Ale stamiŭsia davoli mocna: usio ž padarožža ŭ śpiecyjalnym SV vahonie śpiecyfičnaje, navat kali ŭ ciabie asobnaje kupe. A zabieh z čatyrma torbami, kali ty krychu skavana siabie adčuvaješ (i niezdarma) — heta ŭžo zusim zajmalny fitnes. Zatoje zvyčajnym pasažyram navat darahoha SV-vahona nikoli tak blizka nie padavali aŭtamabilaŭ da ciahnika. Amal trap da trapa — uzrovień!
4. Jašče z uražańniaŭ dnia — ja ŭpieršyniu za vielmi doŭhi čas trapiŭ u miesca, jakoje było pabudavana paźniej za 1826 hod. Tamu ŭsie plusy afarmleńnia ja ŭsprymaju jak adkryćcio. A paśla abiedu prasiŭ pieradać šef-kucharu kamplimienty. Zrešty, maja chata bolš rodnaja i miłaja (rodny kut).
5. Cikava, što ŭčora byŭ roŭna hod, jak ja pierajechaŭ u № 58 na «Vaładarcy». I paciešna, što narod prapanavaŭ «adznačyć» i my adznačyli z pažadańniami. I tut ja — chobana — sieŭ i pajechaŭ. Zručna atrymałasia!
6. Dobra, zakruhlajusia, napišu kali-niebudź, choć vidavočna, što miesiac-druhi listy mianie, chutčej za ŭsio, nie znojduć: ja budu pierasoŭvacca chutčej za ich. Na biahučy momant lik 5789:7191. Adhadaj, na čyju karyść?: )
PS: Susiedzi raspaviali, što siadzim u Kaciaryninskich stajniach. Voś tabie raz! Atrymlivajecca, što «Vaładarka» — novabud? A ja tut tabie pišu, što ŭ novy zajechaŭ: ) Iho-ho!
Da! Abdymaju! 29.12.2021 Maksim Znak».
***
Jurysta štaba Viktara Babaryki Maksima Znaka zatrymali 9 vieraśnia 2020 hoda. 6 vieraśnia 2021 hoda jon byŭ asudžany na 10 hadoŭ kałonii za «zakliki paškodzić biaśpiecy Respubliki Biełaruś», «zmovu z metaj zachopu ŭłady» i «stvareńnie ekstremisckaha farmiravańnia». Razam ź im asudzili Maryju Kaleśnikavu na 11 hadoŭ źniavoleńnia.
Maksima Znaka adpravili ŭ kałoniju
Maksim Znak pra papraŭki: U stalinskija represii ŭ SSSR dziejničała samaja prahresiŭnaja ŭ śviecie Kanstytucyja
