U samym pačatku artykuła Ben Uoles zaklikaje nie abmiarkoŭvać zajavy Kramla, što Rasija byccam by znachodzicca pad pahrozaj z boku NATA, ci kamientar ministra abarony Rasiei pra toje, što ZŠA «rychtujuć pravakacyju z chimičnymi kampanientami na ŭschodzie Ukrainy». Heta ŭsio, na dumku Uolesa, apisvajecca trapnym anhlijskim frazieałahizmam straw man, jaki dasłoŭna pierakładajecca jak «sałamianaje pudziła», a abaznačaje saboj takuju formu arhumientacyi, kali supraćlehłym bokam stvarajecca ŭražańnie abviaržeńnia arhumienta, u toj čas jak realny pradmiet arhumientacyi navat nie byŭ razhledžany abo abvierhnuty, a prosta zamienieny na łžyvy.
«Vidavočna, što Kreml choča, kab my ŭsie zanialisia abviaržeńniem hetych iłžyvych śćvierdžańniaŭ, zamiest taho, kab asprečvać realny paradak dnia prezidenta Rasiejskaj Fiederacyi».
Pa-pieršaje, NATA pa svajoj sutnaści nosić abarončy charaktar, nahadvaje ministr i źviartajecca da artykuła 5 Paŭnočnaatłantyčnaj damovy, jaki abaviazvaje ŭsich členaŭ pryjści na dapamohu inšamu členu, kali jon padviarhajecca napadu. «Nijakich «kali» i nijakich «ale». Uzajemnaja samaabarona źjaŭlajecca krajevuholnym kamieniem NATA. Heta abaviazacielstva abaraniaje ŭsich nas. Sajuźniki, jakija znachodziacca tak daloka adzin ad adnaho, jak Turcyja i Narviehija, abo tak blizka, jak Łatvija i Polšča, — usie jany atrymlivajuć vyhadu ad pakta i abaviazany reahavać. Heta sapraŭdy abarončy sajuz», — piša Uoles.
Pa-druhoje, padkreślivaje ministr, byłyja savieckija dziaržavy nie byli ŭklučanyja ŭ NATA, a dałučylisia pa ich ułasnaj prośbie. Kreml sprabuje pakazać NATA jak zmovu Zachadu z metaj zamachu na jaho terytoryju, ale nasamreč rost kolkaści členaŭ aljansu źjaŭlajecca naturalnaj reakcyjaj hetych dziaržaŭ na jaho ŭłasnuju škodnasnuju dziejnaść i pahrozy, tłumačyć ministr abarony Vialikabrytanii.
Pa-treciaje, davodzić Uoles, śćvierdžańnie Kramla, što NATA imkniecca akružyć Rasijskuju Fiederacyju, taksama nie vytrymlivaje krytyki: tolki piać z tryccaci členaŭ NATA susiedničajuć z Rasiejaj i tolki 1/16 jaje miežaŭ miažuje z NATA.
«Kali akružeńnie — heta błakavańnie 6% vašaha pierymietra, to, biez sumnievu, advažnyja ludzi, jakija zmahalisia ŭ Arniemie abo Leninhradzie padčas Druhoj suśvietnaj vajny, mahli b vykazacca pra heta rezka».
Na samaj spravie Kramlu pahražaje nie raźmiaščeńnie sił NATA, a pryvabnaść jaho kaštoŭnaściaŭ, ličyć Ben Uoles, a dziejańni Rasii pieradusim źviazanyja ź interpretacyjaj historyi prezidentam Pucinym i jaho ambicyjami ŭ dačynieńni da Ukrainy. Kab pierakanacca ŭ hetym, ministr abarony raić aznajomicca ź letašnim artykułam Pucina «Ab histaryčnym adzinstvie ruskich i ŭkraincaŭ», u jakim mała dakładnaści, zatoje šmat supiarečnaściaŭ.
Z artykuła vynikaje, što ŭ centry ambicyj Pucina — etnanacyjanalizm. Jaho skažonyja razvažańni apraŭdvajuć, u najlepšym vypadku, padparadkavańnie Ukrainy, a ŭ najhoršym — pryjadnańnie hetaj suvierennaj krainy siłaj. Pry hetym artykuł Pucina całkam ihnaruje žadańni samich hramadzian Ukrainy, vykazvaje zaniepakojenaść Uoles.
Čytačy buduć nie tolki šakavanyja tonam artykuła, ale i ździŭleny tym, jak mała ŭ im zhadvajecca NATA: jamu pryśviečany ŭsiaho adzin abzac.
Da NATA ŭ Pucina try pretenzii. Pieršaja: Zachad imkniecca vykarystoŭvać roznahałośsi va ŭzajemaadnosinach, kab «kiravać» Rasijaj. Ale jak tady być z zadakumientavanymi šmatlikimi sprobami HRU i inšych rasijskich viedamstvaŭ umiešvacca ŭ demakratyčnyja vybary i ŭnutranyja sprečki?
Druhoje: usio, akramia tak zvanaha «Ruskaha śvietu» (vialikarosaŭ, małarosaŭ, biełarusaŭ), źjaŭlajecca štučnaj kanstrukcyjaj i supiarečyć žadańniam adzinaha naroda z adzinaj movaj i carkvoj.
Pa-treciaje, luby, chto nie zhodny z Kramlom, robić heta ź nianaviści da Rasii abo pa pryčynie rusafobii.
Tut Ben Uoles čarhovy raz nahadvaje, što Rasija sama pryznała suvierenitet Ukrainy jak niezaležnaj dziaržavy i harantavała jaje terytaryjalnuju cełasnaść, padpisaŭšy nie tolki Budapiešcki miemarandum u 1994 hodzie, ale i damovu ab siabroŭstvie ŭ 1997 hodzie. A kali paličyć, to vychodzić, što Ukraina była niezaležnaj ad Rasii značna daŭžej u svajoj historyi, čym kali była ŭ adnoj dziaržavie ź joj.
Razburaje ministr abarony Vialikabrytanii dovad z artykuła Pucina pra toje, što narody Biełarusi, Rasii i Ukrainy źjaŭlajucca naščadkami «Staražytnaj Rusi» i tamu niejkim čynam źjaŭlajucca ruskimi. Jon pryvodzić słovy prafiesara historyi Endru Uiłsana, jaki ŭ ese pad nazvaj «Rasija i Ukraina: «adzin narod», jak śćviardžaje Pucin?» dakazvaje, što ŭ lepšym vypadku heta svajaki, ale nie adzin i toj samy narod.
Kali Ukraina i Rasija — adna kraina, jak patłumačyć isnavańnie Savieckaha Sajuza, razryŭ rasiejska-ŭkrainskaj damovy ab siabroŭstvie i akupacyju Kryma, pytajecca Uoles.
Pa ironii losu, sam Pucin pryznaje ŭ svaim artykule, što «ŭsio mianiajecca: krainy i supolnaści nie źjaŭlajucca vyklučeńniem. Viadoma, niejkaja častka naroda ŭ pracesie svajho raźvićcia, pad upłyvam šerahu pryčyn i histaryčnych abstavinaŭ, moža ŭ peŭny momant uśviadomić siabie asobnaj nacyjaj. Jak my pavinny stavicca da hetaha? Jość tolki adzin adkaz: z pavahaj!» Adnak zatym jon praciahvaje adkidać niekatoryja z hetych «histaryčnych abstavinaŭ», kab adpaviadać svaim ułasnym śćvierdžańniam.
Apošniaje abvinavačvańnie ŭ adras Zachadu z boku mnohich pradstaŭnikoŭ rasiejskaha ŭrada zaklučajecca ŭ tym, što tyja, chto nie zhodny z Kramlom, u niejkaj stupieni źjaŭlajucca rusafobami. Pry hetym jany nie ŭličvajuć toj fakt, što aficery HRU vykarystoŭvali niervova-paralityčnyja rečyvy na brytanskich vulicach abo što nieadnarazovyja kibierataki i metanakiravanyja zabojstvy zychodziać mienavita ad rasijskaj dziaržavy, źviartaje ŭvahu Uoles.
U kancy svajho artykuła Ben Uoles nahadvaje, što u Rasii i Vialikabrytanii doŭhaja i niaredka ŭzajemavyhadnaja historyja: mienavita ŭ sajuzie z Brytanijaj Rasija raźbiła Napaleona i Hitlera, ad epochi Piatra Vialikaha da XIX stahodździa brytancy słužyli pry rasijskim dvary admirałami, hienierałami, chirurhami i architektarami, a baćkam ruskaha fłotu źjaŭlajecca uradženiec šatłandskaha Invierkitynha Semiuel Hrejh. Adnak, adznačaje ministr, brytanski ŭrad «nie maje namieru mirycca sa złamysnaj dziejnaściu Kramla».
«Kali adnojčy chałodnaj studzieńskaj abo lutaŭskaj nočču rasiejskija ŭzbrojenyja siły znoŭ uvarvucca ŭ suvierennuju Ukrainu, ihnarujcie historyi pra «sałamianaha čałavieka» i pra ahresiju NATA, a ŭspomnicie słovy prezidenta Rasii ŭ jaho letašnim ese. Zapomnicie heta i spytajcie siabie, što heta značyć nie tolki dla Ukrainy, ale i dla ŭsich nas u Jeŭropie», — zaścierahaje ministr abarony Vialikabrytanii.
