Jak raskazała Maryna Adamovič, sustrečy z mužam adbyvajucca ŭ aharodžanaj škłom kabincy, razmaŭlać možna tolki praz telefon. Z saboj na spatkańnie nie dazvalajuć brać papieru i inšyja rečy, tolki butelku vady i leki. Kab trapić u pamiaškańnie SIZA na sustreču z rodnym čałaviekam, čarhu la budynka turmy zajmajuć a 5-j ranicy.
«Mikoła vyhladaje, jak zaŭsiody, — kaža Maryna Adamovič. — Mnie zdajecca, što jon absalutna nie mianiajecca. Jak byccam voś tolki ŭčora my ź im raźvitalisia, a siońnia jon znoŭ taki samy — viasioły i ŭpeŭnieny.
Adzinaje, što mnie kinułasia ŭ vočy, — u Mikoły śviežy i zahareły tvar i bieła-žoŭtyja ruki. Jak byccam z vosku.
Heta vyklikana tym, što prahułačnyja dvoryki SIZA raźmieščanyja na dachu budynku, a źvierchu jašče nakrytyja pavietkaj. I sonca amal nie traplaje tudy, vyklučna redka. Mikoła kaža, što kali sonca traplaje, to jon starajecca tam prahulvacca. Ale jaho chapaje tolki na tvar, ruki ŭžo nie dastajuć».
Jak kaža Maryna Adamovič, muž nadziva dobra aryjentujecca ŭ padziejach u krainie i śviecie. Mikoła Statkievič pa-raniejšamu adzin u kamiery i maje dostup tolki da dziaržaŭnych haziet i televizii, ale navat hetaha jamu chapaje, kab razumieć, što adbyvałasia ŭ Kazachstanie.
«Mikoła navat žartavaŭ i mnie tłumačyŭ, jak pravilna ich treba razumieć, — dzielicca Maryna Adamovič. — Skłaŭ svoj słoŭničak. Maŭlaŭ, kali tam havorać pra «vonkavaje ŭmiašańnie» i «lalkavodaŭ», to heta treba razumieć jak «niezadavolenaść narodu». Kali pra demakratyju, to heta taksama adpaviedna treba razumieć. Ja navat paprasiła mnie ŭ liście hety słoŭnik pierasłać, kab samoj možna było hladzieć dziaržaŭnyja ŚMI».
Maryna Adamovič kaža, što Mikołu Statkieviča najbolš cikaviać padziei ŭ krainie. Praz žonku palitviazień «praviaraje» svaje vysnovy, zroblenyja na padstavie toj infarmacyi, jakaja traplaje da jaho ŭ kamieru.
«Raspytvaŭ pra padziei ŭ Kazachstanie, — havoryć Maryna Adamovič. — Pryhadaŭ, što kali tam u 2019 hodzie pačynaŭsia tranzit ułady, to jašče tady jon skazaŭ, što heta samaja niaŭstojlivaja kanstrukcyja. Bo luby, samy łajalny i biazvolny novy lidar niepaźbiežna budzie naroščvać muskuły, abrastać chaŭruśnikami. Takaja kanstrukcyja nie moža być ustojlivaj. Pra novuju Kanstytucyju taksama šmat pytaŭ. Ličyć jaje vielmi varjackaj kanstrukcyjaj».
Jak kaža Adamovič, Mikoła Statkievič pa-raniejšamu nie sumniavajecca ŭ źmienie ŭłady ŭ Biełarusi i nazyvaje ciapierašnija padziei «našaj adterminavanaj pieramohaj i ichniaj adkładzienaj parazaj».
«Mnie zdajecca, što Mikałaj navat u tych umovach zdolny dzialicca aptymizmam z nami ŭsimi, — kaža Maryna Adamovič. — Jakoj by ja stomlenaj nie była, ledźvie žyvoj navat, ja z sustreč ź Mikołam vypyrchvaju. Tak i paśla prysudu było, i zaraz».
Pa słovach Maryny Adamovič, pra mahčymy termin pieravodu ŭ kałoniju pakul ničoha nie viadoma. Heta moža adbycca tolki paśla razhladu apielacyi, što moža zaniać praciahły čas.
Za kratami Mikoła Statkievič znachodzicca z 31 traŭnia 2020 hoda. 14 śniežnia 2021 sudździa Mikałaj Dola pryznaŭ jaho vinavatym u arhanizacyi masavych biesparadkaŭ i prysudziŭ 14 hadoŭ pazbaŭleńnia voli ŭ kałonii asablivaha režymu.
