Prezident ZŠA Džo Bajden razhladaje mahčymaść raźmiaščeńnia ŭ krainach Bałtyi i Uschodniaj Jeŭropy niekalkich tysiač amierykanskich vajskoŭcaŭ, a taksama karabloŭ i avijacyi, paviedamlaje The New York Times sa spasyłkaj na krynicy ŭ amierykanskaj administracyi. Ułady ZŠA razhladajuć mahčymaść pašyreńnia vajennaj prysutnaści ŭ rehijonie na fonie aściaroh nakont vierahodnaha «ŭvarvańnia» Rasii va Ukrainu, piša vydańnie.
U subotu, 22 studzienia, na sustrečy ŭ zaharadnaj rezidencyi prezidenta ZŠA Kemp-Devid vysokapastaŭlenyja pradstaŭniki Pientahona pradstavili Bajdenu niekalki varyjantaŭ dziejańniaŭ, paviedamili surazmoŭcy vydańnia. Jany ŭklučajuć adpraŭku ad 1 tys. da 5 tys. vajskoŭcaŭ u krainy Uschodniaj Jeŭropy z mahčymaściu «dziesiacirazovaha pavieličeńnia» ich kolkaści, kali situacyja pahoršycca.
Pa słovach krynic haziety, Bajden, jak čakajecca, prymie rašeńnie ŭžo na hetym tydni.
Vydańnie ŭdakładniaje, što nivodny z razhladanych varyjantaŭ nie praduhledžvaje razhortvańnie dadatkovych amierykanskich vojskaŭ na terytoryi samoj Ukrainy.
Hety krok, piša NYT, stanie «pavarotnym momantam» dla administracyi amierykanskaha prezidenta, jakaja da hetaha momantu zajmała strymanuju pazicyju ŭ dačynieńni da Ukrainy, bajučysia spravakavać Rasiju. Ale pakolki pieramovy pamiž pradstaŭnikami Rasii i ZŠA nie prynieśli vynikaŭ, administracyja vyrašyła admovicca ad hetaj stratehii.
