Fota: ria.ru
Ź Biškieka paviedamili pra pierastrełku na miažy dźviuch krain. Pryčynaj abvastreńnia tam nazvali dziejańni tadžykskaha boku, jaki ŭ adnabakovym paradku pierakryŭ učastak darohi ŭ miascovaści Tort-Kačo Batkienskaha rajona, jakaja złučaje kirhizskija harady Batkien i Isfanu, čym i spravakavała kanflikt.
Kyrhyzy kažuć, što tadžykski bok vykarystoŭvaje minamioty i hranatamioty.
Tadžykskija pamiežniki, u svaju čarhu, śćviardžajuć, što pieršymi stralbu pačaŭ kyrhyzski bok, a jany sami tolki adkryli ahoń u adkaz.
«Troje tadžykskich vajskoŭcaŭ paranienyja, ich dastavili ŭ Centralnuju kliniku horada Isfara», — paviedamlaje «Sputnik Tadžykistan».
Paźniej Sputnik paviedamiŭ, što tadžykski bok spyniŭ ahoń. Pry hetym ułady krainy abviaścili ŭ hetym rehijonie kazarmiennaje stanovišča i ściahnuli tudy siły Dziaržkamiteta nacbiaśpieki, milicyi i armii.
Miaža Kyrhyzstana i Tadžykistana pieryjadyčna stanovicca zonaj kanfliktaŭ pamiž miascovymi žycharami i pamiežnikami dźviuch krain, jakija ŭźnikajuć z-za niedelimityzavanych učastkaŭ. Na ich niemahčyma vyznačyć, jak pralahaje miaža pamiž dziaržavami.
U kancy krasavika minułaha hoda ŭ tym ža samym rajonie kanflikt žycharoŭ na vodazabory «Hałaŭny» pieraros va ŭzbrojenaje supraćstajańnie vajskoŭcaŭ dźviuch krain. Zahinuli 36 hramadzian Kyrhyzstana, jašče kala 200 paciarpieli. Tadžykistan paviedamiŭ pra 19 zahinułych i 87 paciarpiełych, bolš za 300 damoŭ i infrastrukturnych abjektaŭ byli razburanyja ci spalenyja.
