Prakładka maršrutu praz Rasiju, jakuju Minsk abmiarkoŭvaje z Maskvoj užo niekalki hadoŭ, vyhladaje niemahčymaj. U rasijskich partach niama takoha abjomu svabodnych mahutnaściaŭ (maksimum na 2-3 młn ton u hod zamiest nieabchodnych 11 młn ton), a rasijskija kampanii nie chočuć padstaŭlacca pad sankcyi.
Ryzyki samim akazacca ŭ čornym śpisie Minfina ZŠA całkam zabivajuć i ŭsie inšyja tearetyčna mahčymyja schiemy, pra jakija ciapier havorać na rynku — ad kupli «Biełaruśkałija» abo stvareńnia sumiesnaha trejdara z rasijskaj abo zachodniaj kampanijaj da pieravałki biełaruskaha kałiju praz vuhalnyja terminały ŭ bih-behach i svopu z rasijskim kałijem.
Pry hetym, kažuć maje krynicy, Minsk navat nie sprabavaŭ damovicca ab novych schiemach z klučavymi rasijskimi kampanijami, u jakich jość transpartnyja mahutnaści.
Pra takija pieramovy na vyšejšym uzroŭni taksama nichto nie čuŭ, choć ich i nielha vyklučać. Ale navat kali Minsk znojdzie schiemu pastavak, zastajecca adkrytym pytańnie, chto kupić sankcyjny kalij. Narviežskaja Yara, jakaja atrymlivała kala 1,5 młn ton biełaruskaha kałiju, užo zajaviła ab spynieńni zakupak na fonie sankcyj.
Adzinym łahičnym tłumačeńniem biaździejnaści biełaruskaha boku mnie zdajecca cviordaja ŭpeŭnienaść Minska ŭ tym, što ŭžo ŭ bližejšy čas ZŠA i Jeŭropa sami admoviacca ad błakady ekspartu kałiju paśla taho, jak ceny na jaho ŭźlaciać da histaryčnych rekordaŭ.
Užo ciapier u śviecie kaciroŭki kałiju cviorda pieravyšajuć $500 za tonu, a ŭ vypadku spynieńnia pastavak ź Biełarusi, pavodle acenak ekśpiertaŭ, mohuć dasiahnuć $1000.
Ź inšaha boku, krainy Zachadu mohuć zychodzić z taho, što, choć chutka zamiaścić usie 11 młn ton biełaruskich pastavak budzie składana, mahčymaść źmiakčyć udar isnuje.
Kanadskaja Nutrien užo zajaŭlała pra hatoŭnaść chutka ŭvieści dadatkovyja mahutnaści. Akramia taho, što kampanija niadaŭna pašyryła svaju vytvorčaść, u jaje jość zakansiervavanyja aktyvy, jakija pry nizkich cenach na kalij byli nierentabielnyja.
«Usiaho, pavodle acenak maich surazmoŭcaŭ, kanadcy zmohuć davoli apieratyŭna zamiaścić da pałovy ekspartu ź Biełarusi. Ci budzie hetaha dastatkova, kab utrymać ceny na kalij u prymalnych miežach, ci ž ZŠA z časam pryjdziecca asłabić sankcyi, my nieŭzabavie daviedajemsia», — piša Volha Mardziušenka.
Čytajcie taksama:
Premjer Litvy: Jurysty staranna acanili ŭsie ryzyki skasavańnia damovy Litoŭskaj čyhunki z «Biełaruśkałijem»
Hałoŭčanka anansavaŭ «žorstkija miery» ŭ dačynieńni da Litvy
