Praktyčny centr u Dačanie. Fota: shbsq.gov.cn.
Kampaniju pa stvareńni «praktyčnych centraŭ novaj ery cyvilizacyi» zapuścili ŭ 2018 hodzie. Z taho času bolš za sto tysiač takich ustanoŭ źjaviłasia ŭ sielskich i haradskich rajonach Kitaja, piša chinafile.com.
U takich centrach i akazvajuć bytavyja pasłuhi, i dajuć mahčymaść kulturna pravodzić čas, i, u adnym pakiecie z hetym, pravodziać palitinfarmacyi i tłumačać «palityku partyi». Kankretnaja prahrama zaležyć ad taho, u jakim rehijonie znachodzicca kožny centr.
Naprykład, u bahatym horadzie Huančžoŭ naviedvalniki centraŭ mohuć navučycca asnovam kulinaryi ŭ prafiesijnaha šef-kuchara, paznajomicca z apošnimi technałohijami ŭ śfiery dronaŭ i ździejśnić virtualnaje padarožža pa abjekcie dla ačyščeńnia vady.
U biednaj pravincyi Hujčžoŭ centry pasyłajuć aktyvistaŭ vučyć sielskich žycharoŭ, jak pravilna rasparadžacca hrašyma.
Adzin šanchajski centr biaspłatna ramantavaŭ ludziam parasony i hadzińniki. U inšy raz hetaja ž ustanova prapanoŭvała miascovym žycharam pa butelcy aleju i pačku pralnaha parašku ŭzamien za bustarnyja pryščepki ad kavidu.
Čamu Kampartyja Kitaja tracić stolki namahańniaŭ na dziejnaść takich centraŭ? Praź ich pabudovu partyja choča pakazać narodu, jakaja jana ščodraja, a zaadno i pavysić svoj rejtynh. Toje, što mahła b rabić dziaržava, robić partyja.
Anałahičnyja ŭstanovy dziejničali ŭ epochu Mao, tam taksama adnačasova i zajmalisia prapahandaj, i akazvali sacyjalnyja pasłuhi. Ideałahičny kantrol nad rozumami kitajcaŭ za čas paśla śmierci Mao asłab, i voś — z kufra vyciahnuli staruju sacyjalnuju technałohiju.
