Fota: cri.it
U Sanhara i Kanar troje dziaciej — 12-hadovy Charyjad, 9-hadovy Taman i Tania, jakoj jašče nie spoŭniłasia i hoda. Siamja žyła ŭ horadzie Sulejmanija na ŭschodzie Iraka, adkul i prylacieła ŭ Biełaruś.
Pa adnoj ź viersij, Taman try hady tamu trapiŭ u aŭtakatastrofu; jaho nie zmahli svoječasova praapieravać i tamu amputavali nohi.
U toj ža čas u adnym ź intervju mama chłopčyka kazała, što paśla naradžeńnia ŭ dziciaci dyjahnastavali zachvorvańnie noh.
— My vielmi staralisia trapić na lačeńnie za miažoj, ale nam nie dazvolili pakinuć krainu. Nam pryjšło zaprašeńnie na lačeńnie ŭ Niamieččynu, ale my nie mahli źjechać z Kurdystana, — raskazvała maci dziciaci. Baćka adznačaŭ, što siamja niekalki razoŭ padavałasia na atrymańnie šenhienskich viz, ale atrymlivała admovy.
Sa słoŭ Sanhara, jany pradali ŭsio, što ŭ ich było, kab pasprabavać pierabracca ŭ Jeŭropu. Hałoŭnaja pryčyna takoha imknieńnia — atrymańnie dziećmi nieabchodnaj miedycynskaj dapamohi.
Na biełaruska-polskaj miažy jany spačatku žyli ŭ impravizavanych łahierach, što byli raźbityja ŭ lesie. Ab siamji pisali polskija žurnalisty, a krychu paźniej — dziaržaŭnyja ŚMI Biełarusi, kažučy pra «žorstkaść i nialudskaść» Jeŭrasajuza.
U niejki momant u Tamana złamalisia pratezy. Jak paviedamlali biełaruskija dziaržaŭnyja ŚMI, baćka źviarnuŭsia pa dapamohu da miascovych daktaroŭ. U łahier biežancaŭ pryjazdžała śpiecyjalnaja bryhada razam z dyrektaram Hrodzienskaha filijała Biełaruskaha pratezna-artapiedyčnaha adnaŭlalnaha centra Valeryjem Vitkoŭskim.
Taman na biełaruska-polskaj miažy. Fota: wyborcza.pl
U vyniku pratez adramantavali. Ale heta było časovaje rašeńnie: dzieciam treba mianiać ich prykładna raz u hod. Taman svaimi karystaŭsia da taho momantu ŭžo vosiem miesiacaŭ.
Pra toje, kab pamianiać pratezy ŭ Biełarusi, śpiecyjalisty ničoha nie kazali. Va ŭsiakim razie ŭ siužetach pra heta ničoha nie było.
Potym cikavaść da kurdskaj siamji źnikła. Ale ich historyja nie skončyłasia. Spačatku jany byli ŭ lasnym łahiery, potym pierasialilisia ŭ łahistyčny centr «Bruzhi». Krychu paźniej ich vyvieźli ŭ Minsk, kab viarnuć u Irak, ale siamja navažyłasia zastacca ŭ biełaruskaj stalicy, dzie praviała bolš za miesiac.
Fota: Wyborcza.pl
— Heta byli žudasnyja dni — raspaviadaŭ Sanhar. — My byli z tysiačami inšych ludziej u lesie na miažy z Polščaj, kali tempieratura dasiahała -18 hradusaŭ. Jeŭropa, pra jakuju tak maryli, była ŭsiaho ŭ niekalkich mietrach, ale miaža achoŭvałasia, tamu dabracca da jaje było niemahčyma.
Polskija hramadskija arhanizacyi i aktyvisty źviartalisia da miascovaha ŭrada i lidaraŭ inšych jeŭrapiejskich dziaržaŭ z prośbaj adkryć humanitarny kalidor nie tolki dla siamji Tamana, ale i dla inšych: starych, dziaciej i žančyn, jakija na toj momant znachodzilisia kala biełaruska-polskaj miažy.
Sam Taman i jahony siabar zapisali videa, dzie źviartalisia da futbalista Kryšcijanu Ranałdu. Dzieci raspaviadali pra žadańni Tamana: «dapamoha naham» i «chacieŭ by ciabie ŭbačyć», «pajechać u Jeŭropu».
Fota: cri.it
U vyniku historyjaj siamji zacikavilisia ŭ Italii. U situacyju ŭmiašaŭsia miascovy ŭrad, a taksama italjanski Čyrvony Kryž.
U siaredzinie studzienia hetaha hoda za kurdskaj siamjoj u Minsk vylecieli daktary-dobraachvotniki italjanskaha Čyrvonaha Kryža. Na rukach u ich byli ŭsie nieabchodnyja dakumienty dla lehalnaha pierasiačeńnia miažy.
Fota: cri.it
Siamja palacieła ź Minska 15 studzienia. Ciapier znachodzicca ŭ Bałońji, dzie śpiecyjalisty artapiedyčnaha instytuta Rycali buduć zajmacca zdaroŭjem Tamana i śpiecyjalna dla chłopčyka zrobiać novyja sučasnyja pratezy.
