Eks-reparciorka ANT Natalla Kaziej niadaŭna dała intervju «Biełsatu», u jakim jana raskazała pra pracu na telekanale «Mir» i vypadki charasmienta padčas jaje.
Paśla čaho pra Kaziej vyjšaŭ siužet na «Biełaruś 1»: zhadali jaje apovied pra vykidyš u 2020 i zajavili, što Kaziej chłusić, maŭlaŭ, jana miedykamientozna spyniła ciažarnaść. Navat apublikavali miedycynski dakumient (što parušaje zakon, bo razhałošvaje miedycynskuju tajamnicu).
Paśla čaho Kaziej apublikavała ŭ fejsbuku fota svajoj — užo byłoj — kalehi i siabroŭki Volhi Zabielič, žurnalistki telekanała «Mir». Na fota Volha z bukietam kvietak na tym samym «Maršy za svabodu», jaki prajšoŭ 16 žniŭnia 2020 hoda i byŭ samym masavym u biełaruskaj historyi.
Voś toje fota:
Pikantnaść situacyi ŭ tym, što Zabielič praciahvaje pracavać na «Miry». I praciahvaje zdymać prapahandysckija siužety.
Voś jaje apošnija tvory: «Biaspłatnaja adukacyja i miedycyna: Łukašenka vyznačyŭ kurs na sacyjalnuju aryjentacyju», «Łukašenka zaklikaŭ vyvieści ekanomiku na šlach ŭstojlivaha inavacyjnaha raźvićcia», «Naradžeńnie novaha žyćcia: Łukašenka naviedaŭ centr «Maci i dzicia».
Ale ž Zabielič nie maje nijakaha dačynieńnia da siužeta na BT. Dla čaho Natalla Kaziej vykłała jaje fotazdymak z marša? Tym bolš, što siońnia takoha zdymka dastatkova, kab na čałavieka zaviali kryminałku i adpravili na «chimiju» ci navat u kałoniju.
Natalla Kaziej: «Zdymak ja vykłała, kab pakazać fakty, što ŭ sistemie pracujuć ludzi, jakija suprać samoj sistemy»
«Zaraz vialikaja kolkaść maich siabroŭ, kaleh, siadziać u turmie za svaju praŭdu, — patłumačyła Natalla Kaziej «Našaj Nivie». — Naprykład Ksienija Łuckina, jakaja raniej pracavała na BT. U toj ža čas ludzi, jakija zastalisia pracavać u dziaržSMI — na BT, STV, «Mir» — taksama suprać Łukašenki. I heta ja viedaju nie ź niejkich tam plotak, hetyja ludzi kazali toje sami.
Jany abiacali zvolnicca, chadzili na maršy, raskazvali, jak nienavidziać Łukašenku i chočuć sumlennych vybaraŭ… Ale zaraz jany praciahvajuć dapamahać uładzie, jakuju sami nienavidziać. Bolšaść rabotnikaŭ dziaržaŭnych ŚMI prosta hrajuć rolu, jany nie vierać u toje, što sami kažuć. Na maršach ja sustrakała šmat kaleh, jakija kazali: «My taksama zvolnimsia!»
Ale im paśla prapanavali kvatery — nam z mužam taksama prapanoŭvali, kab my nie zvalnialisia — i jany zrabili svoj vybar. I praciahvajuć rabić hetyja brudnyja siužety.
Natalla Kaziej. Fota: staronka Natalli ŭ Facebook
Za kožnaje słova ŭ maim intervju «Biełsat» ja adkazvaju hałavoju. I pra damahalnictvy, i pra moj vykidyš.
Choć mnie ciažka, ale ja rastłumaču pra toje spynieńnie ciažarnaści. Kali adbyvajecca vykidyš, časam nie da kanca ŭsio vychodzić. Tady žančynie musiać rabić čystku ci pryznačać miedykamienty, kab arhanizm sam pazbaviŭsia.
12 žniŭnia ja trapiła ŭ balnicu i doktar mnie skazaŭ: «Dzicia zhubili, ale ŭ vas nie da kanca vyjšła ŭsio. Treba ci čyścić ci ŭžyć miedykamienty». I było vyrašana pryniać tabletki, bo čystka — horš, moža paŭpłyvać u budučym na mahčymaść mieć dziaciej.
Pra fota i Volhu Zabielič. 16 žniŭnia ja adprasiłasia ŭ daktaroŭ, kab pajści na marš. Volha zajechała za mnoju i my razam pajechali tudy. Jana ŭsio vydatna viedaje, čamu ja była ŭ balnicy, što adbyvałasia — i ciapier jana maŭčyć.
Maŭčać — heta jaje prava. Ale i havaryć — majo prava.
Zdymak ja vykłała, kab pakazać fakty, što ŭ sistemie pracujuć ludzi, jakija suprać samoj sistemy. Zaraz dziaržava namahajecca pierakanać, što ŭsie za Łukašenku, a tyja, chto źjechaŭ — zdradniki, «biehłyja» i chłusy. Ale ž nie. My byli vymušanyja źjechać i my nie chłusy, za svaje słovy my možam adkazać. A chłusicie vy, bo spačatku vychodzicie na maršy, zryvajučy hałasy ŭ kryku «Žyvie Biełaruś!», a paśla kažacie ŭ svaich siužetach jaki Łukašenka vydatny.
Ci budu ja adčuvać vinu, kali ŭ Volhi Zabielič buduć prablemy? A čamu ja mušu adčuvać vinu? Bo jana chadziła na marš? Dyk ci ja ŭ hetym vinavataja?
Za toje, što sistema moža jaje pasadzić u turmu? Dyk siadzić ahromnistaja kolkaść ludziej, jakija byli na maršach. I chto musić adčuvać vinu za heta?
Ja nie chaču, kab Zabielič siadzieła ŭ turmie. Zła joj nie žadaju. Ale, miarkuju, kali jana dva hady vykručvałasia i padmanvała sistemu, to i zaraz vykrucicca».
Volha Zabielič: «Sa mnoj absalutna ničoha nie zdaryłasia. I nie zdarycca»
«Naša Niva» źviazałasia z Volhaj Zabielič, kab pacikavicca, ci nie ŭźnikli ŭ jaje prablemy paśla publikacyi fota z Marša.
«Sa mnoj absalutna ničoha nie zdaryłasia. I nie zdarycca. Kali zdarycca, tady i pahavorym», — adkazała žurnalistka.
Volha Zabielič. Fota: staronka žurnalistki ŭ Facebook
Ale adkazvać, jak užyvajucca pachody na maršy i praca ŭ łukašenkaŭskim pule, Volha Zabielič nie zachacieła:
«Ja nie budu ničoha kamientavać, pahavarycie na hetuju temu z Natallaj Kaziej. Ale ŭsio, što jana vam skaža, budzie poŭnaj łuchtoj».
Čytajcie taksama: Namieśnik hiendyrektara BIEŁTA pa ideałohii źnik z radaraŭ u vieraśni, a znajšoŭsia ŭ sudzie. Padrabiaznaści
