Padvodny kabiel suviazi. Fota depositphotos.com.
Pakul uvieś śviet sočyć za kryzisam vakoł Ukrainy, irłandskija vajskoŭcy fiksujuć u svaim rehijonie pavyšanuju aktyŭnaść rasijskaha fłotu. VMF Rasii płanuje pravieści tam vučeńni, pry hetym manieŭry Maskvy projduć zanadta blizka da stratehična važnych padvodnych kabielaŭ suviazi, piša analityčny centr Atlantic Council.
Raniej Maskva časta ładziła bujnyja kibierataki — siarod ich, naprykład, maštabnaja ataka 2015 hoda na enierhasistemu Ukrainy, albo ataka ŭ 2004 hodzie na Estoniju. Ale ž kali Rasija pažadaje pierajści ad chakierstva da fizičnaha źniščeńnia infrastruktury internetu, heta moža vyklikać sapraŭdny chaos u śviecie. Razryŭ padvodnych kabielaŭ, jakija dapamahajuć spałučać praź internet roznyja častki śvietu, pryviadzie da paniki i biazładździa, padarvie ekanamičnuju aktyŭnaść i parušyć miždziaržaŭnyja i ŭnutranyja kamunikacyi.
16 takich kabielaŭ znachodziacca kala bierahoŭ Irłandyi. Kali Rasija pierareža niekatoryja ź ich, što złučajuć Irłandyju z Narviehijaj, Brytanijaj, Isłandyjaj i ZŠA, heta paškodzić suśvietny internet-trafik. Na ramont spatrebicca niekalki hadzin ci navat dzion, padčas jakich zakranutym avaryjaj krainam budzie nie da inšych padziej u śviecie.
Ekśpierty papiaredžvajuć i pra inšy kabiel — toj, što byŭ prakładzieny praz Kierčanski praliŭ u 2014 hodzie. Zaraz ad jaho zaležać internet-karystalniki ŭ Krymu, ale razryŭ kabielu moža paškodzić suviaź ź internetam i na macierykovaj Ukrainie. Heta vyklikała b paniku va ŭkrainskim hramadstvie i spryjała b ustanaŭleńniu Kramlom kantrolu nad krainaj.
Maskva ŭžo dziejničała takim čynam. Kali ŭ 2014 hodzie Rasija akupavała Krym, adnym ź jaje pieršych dziejańniaŭ było pierarazańnie kabielu, jaki złučaŭ Krym sa źniešnim śvietam. Heta parušyła padklučeńnie da internetu i spryjała častkovaj infarmacyjnaj błakadzie Kryma, a taksama dało Maskvie jašče adzin ryčah upłyvu na rehijon.
Takija dziejańni adpaviadajuć rasijskaj vajennaj daktrynie, u jakoj nadajecca ŭsio bolš uvahi ŭ sučasnych kanfliktach kantrolu nad aparatnym i prahramnym zabieśpiačeńniem, a taksama nad virtualnym asiarodździem. Zachodnija čynoŭniki heta zaŭvažajuć. Niadaŭna kiraŭnik brytanskaj armii papiaredziŭ, što dziejnaść rasijskaha VMF moža pahražać padvodnym kabielam i daść mahčymaść Maskvie parušyć suśvietny internet-trafik.
