«Vizit Makrona ŭ Maskvu i jaho zajavy pa Biełarusi nielha razhladać pa-za kantekstam, — skazaŭ analityk Jeŭrapiejskaj Rady pa mižnarodnych adnosinach (ECFR). — Francyja, jak i piersanalna Makron, na praciahu mnohich hadoŭ vystupaje za bolšuju aŭtanomiju ES u pytańniach jeŭrapiejskaj biaśpieki. Eskałacyja kryzisu na miežach z Ukrainaj jašče bolš aktualizavała hety paradak.
Pasyłajučy svoj ultymatum pa pytańniach biaśpieki ŭ Jeŭropie ŭ Vašynhton, a nie ŭ Bierlin ci Paryž, Maskva demanstratyŭna padkreślivała, što nie razhladaje jeŭrapiejskija krainy jak samastojnyja subjekty ŭ vajennaj śfiery. A značyć, i pieramovy treba vieści nie ź imi, a naŭprost z ZŠA.
U vyniku heta stvaryła situacyju, u jakoj upieršyniu z časoŭ chałodnaj vajny budučynia Jeŭropy abmiarkoŭvałasia biez samoj Jeŭropy.
Heta vymusiła jeŭrapiejskich palitykaŭ, asabliva takich, jak Makron, jakija pretendujuć na rolu lidara ŭ ES paśla sychodu Mierkiel ź vialikaj palityki, farmulavać ułasnyja prapanovy. Vobrazna kažučy, «pasadzić» Jeŭropu za stoł pieramovaŭ.
Naturalna, kab zacikavić Maskvu, hetyja prapanovy pavinny byli b nie prosta dublavać pazicyju ZŠA, ale i mieć niejkija ŭłasnyja idei, u tym liku vyhadnyja dla Rasii.
Vychodzić, Emaniuel Makron na pieramovach u Kramli nie vystupiŭ viaščalnikam niejkaj kalektyŭnaj, kansalidavanaj pazicyi Jeŭrasajuza, u jakoj ciapier upieršyniu za paŭtara dziasiatka hadoŭ staršyniuje Francyja, a pasprabavaŭ hulać svaju hulniu, zarablajučy palityčnyja bały ŭ dypłamatyčnym vyrašeńni kryzisu».
Adnak, kaža analityk, mnohimi takaja indyvidualnaja inicyjatyva Paryža «razhladajecca skieptyčna, kali nie skazać, krytyčna».
«Pa-pieršaje, tamu što jana patencyjna moža drenna adbicca na i tak chistkim adzinstvie ŭnutry ES u pytańni dyjałohu z Rasijaj i abjomach vajskovaj dapamohi Ukrainie. Pa-druhoje, bo ŭ inšych jeŭrapiejskich krain, asabliva tych, chto znachodzicca hieahrafična bližej da Rasii, jość abhruntavanyja sumnievy ŭ tym, nakolki dobra Makron padrychtavany dla takoj misii,
— tłumačyć Pavieł Śluńkin. — Čutki pra toje, što jon pryvioz z Maskvy niejkuju damovu, jakaja «značna źniziła pahrozu vajny», užo pryviali da paraŭnańniaŭ ź miunchienskimi «pośpiechami» Čembierlena ŭ 1938 hodzie.
Pa-treciaje, u Francyi prosta niama takoha mandata, tamu jaje prezident moža pradstaŭlać na pieramovach z Maskvoj tolki i vyklučna svaju krainu.
Pry hetym u samoj Francyi chutka pavinny adbycca prezidenckija vybary, i adnym z asnoŭnych kankurentaŭ Makrona na ich budzie Maryn Le Pen, papularny prarasijski palityk i jeŭraskieptyk. Tak što, da hetaha šyrokaha hieapalityčnaha kantekstu dadajecca jašče i ŭnutrany.
Malujučy kanstruktyŭny dyjałoh z Maskvoj, demanstrujučy svaju palityčnuju samastojnaść i ŭmieńnie vyrašać hłabalnyja prablemy, Makron sprabuje zaručycca padtrymkaj vybarščykaŭ, jakija patencyjna mohuć schilicca na karyść Le Pen».
Što tyčycca roli i temy Biełarusi ŭ minułych pieramovach Makrona i Pucina, na dumku analityka, demakratyja i pravy biełarusaŭ u hetym abmierkavańni nasili fakultatyŭny charaktar, kali naohuł padymalisia.
«Prezident Francyi vykazvaŭ Pucinu svaje aściarohi nie pra niedemakratyčny charaktar plebiscytu, a pra toje, što jon na zakanadaŭčym uzroŭni lehalizuje patencyjnaje raźmiaščeńnie rasijskaj jadziernaj zbroi ŭ Biełarusi i likviduje pałažeńnie ab imknieńni krainy da niejtralitetu, prasiŭ vyvieści rasijskija vojski paśla vučeńniaŭ i pierakonvaŭ u nieabchodnaści zachavać Biełaruś jak niezaležnuju dziaržavu.
Na žal, takaja realnaść biahučych raskładaŭ u rehijonie. Svaimi dziejańniami Alaksandr Łukašenka ŭmacavaŭ pierakananaść ES u jaho poŭnaj padkantrolnaści Kramlu. Bolš za toje, jaho lehitymnaść nie pryznajecca ŭ Jeŭropie. Tamu biełaruskaja tema ciapier abmiarkoŭvajecca z tym, u kaho jość realnaja mahčymaść upłyvać na situacyju — z prezidentam Rasii.
Budučynia tych, chto nie biare jaje ŭ svaje ruki, zaŭsiody vyznačajecca kimści inšym. Na žal, takija sumnyja i surovyja ŭroki historyi. I ich čarhovy raz davodzicca vučyć na svaim prykładzie biełarusam», — kanstatuje eks-dypłamat.
Čamu Makron havoryć z Pucinym pra Biełaruś?
«1938 hod». Premjerka Litvy paraŭnała naroščvańnie rasijskich vojskaŭ u Biełarusi ź pieradvajennymi padziejami
«Łukašenku dali zrazumieć, što jon — adna ź fihuraŭ u vialikaj hulni». Jak źviazany «siryjski kiejs» ź pieramovami ŭ Maskvie
