Fota: depositphotos.com.
U śniežni Nacyjanalny centr statystyki achovy zdaroŭja (ZŠA) pradstaviŭ kančatkovy analiz danych pa śmiarotnaści ŭ krainie za 2020 hod. Zhodna ź im, chvaroby serca i rak byli ŭ tym hodzie hałoŭnymi pryčynami śmiarotnaści, na trecim ža miescy apynuŭsia kavid, piša New York Times.
Śmiarotnaść ad sardečna-sasudzistych chvarob vyrasła na 9%, ad sindromu Alchiejmiera — na 8,7%. Siarod dyjabietykaŭ rost śmiarotnaści ŭvohule skłaŭ 15%. Usie hetyja chvaroby — faktary ryzyki pry kavidzie, jaki moža praciakać u takich ludziej asabliva ciažka. Navukoŭcy taksama dapuskajuć, što hetych śmierciaŭ mahło b nie być, kali b tyja ž dyjabietyki naviedvali daktaroŭ svoječasova — mahčymaść, jakuju šmat u kaho zabrała pandemija i łakdaŭny.
Jašče adna vierahodnaja pryčyna rostu śmierciaŭ — źmieny ŭ ładzie žyćcia. Amierykanskaja Asacyjacyja Alchiejmiera śćviardžaje, što sacyjalnaja izalacyja, paharšeńnie lačeńnia chraničnych chvarobaŭ i parušeńnie zvykłaha ładu žyćcia mahli vyklikać rost śmiarotnaści ad sindromu Alchiejmiera. Što da dyjabietu i sardečna-sasudzistych chvarobaŭ, žyćcio ź imi pavinna ŭklučać zdarovaje charčavańnie, fizičnuju nahruzku, kantrol uzroŭniu stresu i stabilny pryjom lekaŭ, i łakdaŭny mahli paŭpłyvać na ŭsio heta nie ŭ lepšy bok.
Nas čakaje jašče bolš śmierciaŭ, jakich mahło b nie być biez pandemii. Naprykład, kali na pikach chvalaŭ kavidu špitali mieli spravu z napłyvam pacyjentaŭ, im prychodziłasia admianiać płanavyja apieracyi. Ale ž kali apieracyja płanavaja, heta nie aznačaje, što jana niepatrebnaja. Siarod takich apieracyj moža być i vydaleńnie rakavaj puchliny, i zamiena sustava, i kali takija važnyja apieracyi adkładajuć, heta moža pahoršyć stan pacyjenta.
Toje ž samaje datyčyć prafiłaktyki raku. Miljony amierykancaŭ prapuścili praz pandemiju rehularnyja pravierki ŭ daktaroŭ na pradmiet najaŭnaści raku hrudziej i prastaty, a taksama kałarektalnaha raku. Tyja vypadki ankałohii, jakija byli b vyjaŭlenyja na hetych pravierkach, usio roŭna prajaviacca. Ale heta adbudziecca na bolš poźniaj stadyi, kali chvarobu ŭžo budzie bolš ciažka vylečyć.
