«Nielha było admovicca. Nie iduć tolki tyja, chto chvareje, i ciažarnyja»
U palikliniki adpravili ŭvieś šosty kurs lačebnaha fakulteta BDMU. Adna sa studentak raskazvaje, što dziažuryć z hetaha paniadziełka.
«U našaj paliklinicy nas usich aficyjna pracaŭładkavali na pałovu staŭki. Adpaviedna, pracujem my 3,5 — 4 hadziny. Zvyčajna studentaŭ biaruć ci na pasadu miedsiastry, ci pamočnikam urača.
Nie ŭsim tak pašancavała. Mnohich admovilisia pracaŭładkoŭvać, ale pracy dali šmat — adpravili na damašnija vizity, — dzielicca dziaŭčyna. — Šostamu kursu nielha było admovicca. Nam pieršapačatkova kazali: nie iduć tolki tyja, chto chvareje, i ciažarnyja».
Studentka pracuje ŭ kavidnym štabie. Heta nakštałt koł-centra, biez kantaktu z chvorymi. Treba abzvońvać pacyjentaŭ, rehistravać vykliki na dom, tłumačyć praviły samaizalacyi. Mahčyma, pieryjadyčna dapamahać z vypiskaj receptaŭ.
«Rankam zvankoŭ šmat, mnohija chočuć vyklikać na dom doktara. Da nas telefanujuć pacyjenty z paćvierdžanym kavidam, tamu jany vyklikajuć śpiecyjalnuju bryhadu, a nie zvyčajnaha terapieŭta.
Ale ŭ suviazi z nahruzkaj kažuć nie rehistravać vykliki, a ŭhavaryć ludziej samastojna pryjści ŭ infiekcyjny kabiniet, kali jość mahčymaść. Kali ŭžo zusim nijak, kiepska adčuvaje siabie čałaviek, adpraŭlajem bryhadu. Bryhada moža pryjazdžać nie dzień u dzień. Z-za hetych ukazańniaŭ z boku pacyjentaŭ byvajuć da nas pretenzii», — dzielicca studentka.
Pary va ŭniviersitecie ŭ ich hrupy chutka pačnucca, ale buduć dystancyjnymi. Ciapier u ich musili b być zaniatki profilnaha cykłu, adnak ich niama.
Tym, kaho adpravili jeździć pa vyklikach, niaprosta.
«Pa dvaccać vyklikaŭ na studenta byvaje. Adnakurśniki vielmi niezadavolenyja, bo heta siem-vosiem hadzin nie samaj prostaj pracy zabiaspłatna».
Studentka kaža, što ŭ papiaredniuju chvalu ich taksama zdymali z zaniatkaŭ — u kastryčniku na paŭtara miesiaca. Jana tady paralelna pracavała ŭ stacyjanary i dapamahała ŭ paliklinicy.
Inšyja zaŭvažajuć, što navat kali ich uładkoŭvajuć aficyjna na pałovu staŭki, jašče paru hadzin jany musiać adpracavać jak vałanciory. Pa nazirańniach studentaŭ, najbolšaja zahruzka ŭ paliklinikach była ŭ paniadziełak.
«Kali bačyš ščyruju ŭdziačnaść daktaroŭ za tvaju dapamohu, chočacca rabić jašče bolš»
Apošni kurs piedyjatryčnaha fakulteta minskaha mieduniviersiteta taksama całkam pryciahnuli ŭ dapamohu daktaram.
«Nas adpravili z hetaha paniadziełka. Ale heta ž nie pieršy hod, kali studentaŭ zdymajuć u palikliniki — zaŭsiody tak było. Tolki raniej heta byŭ hryp, — dzielicca šaścikurśnica. — U minułuju chvalu karanavirusa mnie dazvolili dapamahać u samoj paliklinicy — niešta na kampjutary nabirać, raznosić dakumienty. I ŭ hety raz rablu hetuju ž pracu. Mianie taki raskład zadavalniaje.
Kali patrebna, dapamahaju na pryjomie doktaru (pahladzieć horła, pasłuchać lohkija) ci miedsiastry (vypisać daviedku, nakiravańnie na analizy). Ja nie chadžu na vykliki, ale heta bolš vyklučeńnie, čym praviła.
Mianie nie trymajuć da kanca źmieny. Byvała, sama siadzieła bolš, kab zakončyć pracu, a mnie ŭsie kazali: «Idzi ŭžo dadomu, i tak šmat dapamahła».
Vučacca budučyja piedyjatry dystancyjna. Vykładčyk dasyłaje karysnuju infarmacyju pa temie, jakuju jany razhladajuć samastojna.
Naša surazmoŭca za pracu ŭ paliklinicy nie atrymlivaje nijakich hrošaj.
«Nichto i nie abiacaŭ apłaty, — uśmichajecca jana. — U paliklinicy ŭ našym adździaleńni niama volnych pasad, tamu nas nie mohuć aficyjna ŭziać na pracu. My heta viedali adrazu, jak išli tudy. Zaliki aŭtamatam za pracu nie pastaviać — prosta ŭ nas u hetym paŭhodździ niama zalikaŭ, tamu što apošni kurs».
Srodkami indyvidualnaj abarony dziaŭčynu ŭ paliklinicy zabiaśpiečyli.
«Zachvareć ja nie bajusia. Kali nie kryvić dušoj, my možam usie zachvareć u lubym miescy, — kaža jana. — U mianie ŭ kvatery jość maja siamja, jany taksama mohuć prynieści virus. Ad hetaha nichto nie zastrachavany. Na maju dumku, kožny pavinien prymać tyja miery aściarožnaści, jakija ad jaho zaležać».
Šaścikurśnikam kazali, što, chutčej za ŭsio, u paliklinikach jany buduć pracavać dva tydni.
«Nie viedaju, ci možna było admovicca, nie cikaviła hetaje pytańnie. U nas cudoŭnaja zahadčycca adździaleńnia i staršaja miedsiastra, dyj naohuł kalektyŭ. Kali jość umovy, kab pracavać, kali ty bačyš ščyruju ŭdziačnaść daktaroŭ za tvaju dapamohu, dyk chočacca rabić jašče bolš.
Tym bolš, što, jak chryścijanka, ja chaču dapamahać tym, kamu nasamreč heta nieabchodna», — dzielicca studentka.
Čytajcie taksama:
«Kładziom ludziej na padstaŭnyja łožki ŭ pałaty, u kalidory, na maleńkija kanapki». Miedyki — pra situacyju z COVID-19 u stacyjanary
Jak karanavirus upłyvaje na zuby? Raskazvajuć miedyki
Čamu tak rezka vyrasła kolkaść vypadkaŭ karanavirusa? Voś što adkazali ŭ Minzdaroŭja
