Fota: Reuters.com
Viarchoŭny pradstaŭnik Jeŭrasajuza pa zamiežnaj palitycy i biaśpiecy Žazep Barel adpraviŭ adziny adkaz ES na list ministra zamiežnych spraŭ RF Siarhieja Łaŭrova, u jakim toj prasiŭ adkazać kožnuju krainu Jeŭropy asobna na pytańni, źviazanyja ź mižnarodnaj biaśpiekaj, piša Deutsche Welle.
«U Jeŭrasajuza adzinaja źniešniaja palityka i palityka biaśpieki, i naša meta — dziejničać sumiesna pa ŭsich klučavych pytańniach. Heta ŭklučaje ŭ siabie i skaardynavanyja adkazy na listy, kali spatrebicca. Tolki tyja, chto choča raźjadnać nas, mahli b pastavić pad sumnieŭ hetaje rašeńnie», — padkreśliŭ Barel. Jon adznačyŭ, što hetaje rašeńnie pryniali ŭsie 27 krain-udzielnic ES.
Z nahody źmiestu lista ŭ paviedamleńni viedamstva havorycca tolki, što ŭ im jość adkazy na ŭźniatyja Łaŭrovym pytańni, a taksama paćviardžajecca hatoŭnaść Jeŭrasajuza «praciahvać dyjałoh z Rasijaj, kab umacoŭvać usieahulnuju biaśpieku». Pavodle ahienctva AFP, Barel u svaim liście zaklikaŭ Maskvu nieadkładna advieści vojski ad miažy z Ukrainaj i vyvieści rasijskich vajennych ź Biełarusi.
A dla abmierkavańnia pytańniaŭ biaśpieki «prydatnymi forumami» źjaŭlajucca ABSIE, Rada Rasija — NATA i inšyja isnujučyja placoŭki, cytuje ahienctva adkaz Jeŭrasajuza.
