Pavieł Batujeŭ sustreŭsia ź dziećmi paśla miesiaca źniavoleńnia i jašče miesiaca znachodžańnia ŭ padpolli, paśla jakoha jon pierasiok miažu ŭ Rasii. Fota: Fejsbuk.
23 listapada 2021 u 17:25 ja byŭ zatrymany ŭ dvary svajho doma, kali išoŭ zabirać ź dziciačaha sadka dačku.
Brali mianie prafiesijna i vokamhnienna. Źbili z noh, zašpilili kajdanki za śpinaj, naciahnuli na vočy šapku i užo praz paru siekundaŭ ja byŭ u busiku, dzie mianie adrazu ž pačali źbivać, patrabujučy parol ad telefona i telehrama.
Chto mianie zatrymlivaŭ i kolki ich było, ja nie bačyŭ, ale pa «aščuščenijam» heta byli nie supracoŭniki salihorskaha RAUS.
Napadniki fizičnym uździejańniem i pahrozami dapamahli mnie ŭzhadać nieabchodnyja paroli. Ź ich słovaŭ, telehram adnaho pryznanaha ekstremisckim pablika byŭ zarehistravany na maju sim-kartku adnaho z zamiežnych apierataraŭ. U mianie z časoŭ pracy ŭ Polščy była sim-kartka polskaha apieratara i jany pasprabavali, daviedaŭšysia ŭ mianie numar, uvajści ŭ tielehram, ale ŭ ich ničoha nie atrymałasia.
Praź niejki čas u mianie pačali pytać pra maju pracu, adukacyju i dypłom. Tut ja mušu pryznacca ŭ nievialikim złačynstvie, ździejśnienym mnoj piatnaccać hod tamu. Paśla vybaraŭ (i majho pieršaha administracyjnaha aryštu) u 2006 hodzie mianie vypierli z univiera. I ja, nikoli tak nie rabicie, nabyŭ praź internet dypłom rasijskaj VNU i spakojnieńka pa im pracavaŭ usie hetyja hady. Možna navat skazać, što za stolki hod najaŭnaści hetaha samaha dypłoma ja pačaŭ identyfikavać siabie jak čałavieka z vyšejšaj adukacyjaj.:)
Uvosień 2021 hoda ja padaŭ dakumienty ŭ salihorski vykankam dla ŭzhadnieńnia mianie ŭ jakaści staryšyni tavarystva ŭłaśnikaŭ i navat atrymaŭ takoje ŭzhadnieńnie, ale padčas hetych praceduraŭ supracoŭnikam stała viadoma, što moj dypłom nie zusim kab sapraŭdny.
Mianie pryvieźli ŭ salihorski RAUS, usio tak ža ŭ kajdankach pryviali ŭ kabiniet 315, dzie narešcie źniali šapku z vačej. U kabiniecie znachodzilisia ci nie ŭsie supracoŭniki kryminalnaha vyšuku, major Drabućka, i namieśnik načalnika RAUS padpałkoŭnik Kanapacki. Supracoŭnikam, jakija mianie zatrymlivali, skazali, što jany mohuć jechać (heta jašče bolej uzmacniła maje «aščuščenija», što zatrymlivali mianie nie miascovyja).
Mnie adrazu ahučyli, što prysutnyja čakajuć ad mianie źniščeńnia toj samaj hrupy. Ja paviedamiŭ, što ja da hetaj hrupy nie maju anijakaha dačynieńnia i, adpaviedna, źniščyć jaje nijak nie mahu. Mnie pačali ahučvać kryminalnyja artykuły, jakija na mianie mohuć być zaviedzienyja (aproč 380 za padrobku dypłoma), i terminy, na jakija ja mahu sieści. Niekalki razoŭ padkreślili, što ŭ dačynieńni da zmaharoŭ u ich absalutna raźviazanyja ruki, što luby sudździa daść mnie stolki, kolki jany paprosiać.
Taksama namieśnik načalnika ahučvaŭ niekatoryja dastatkova intymnyja fakty majho pryvatnaha žyćcia, a major navat hraziŭsia pakazać niejkija fota majoj žoncy. Taksama pytali, adkul u mianie na rachunkach stolki hrošaj (ale na pačatku hoda salihorskaja padatkovaja ŭžo supastaŭlała maje dachody i vydatki ažno za 10 hod).
U hety samy čas u dźviuch kvaterach, što naležać našaj siamji, adbyvalisia vobšuki nibyta ŭ ramkach kryminalnaj spravy, zaviedzienaj za abrazu načalnika salihorskaha RAUS. Ahułam było praviedziena ažno 5 vobšukaŭ. Šukali nibyta moj fejkavy dypłom, ale zabrali tolki telefony, fłeški, noŭtbuk, BČB-značok i ŭzmacnialnik wi-fi.
U hety samy čas lepšyja intelektualnyja siły salihorskaj milicyi, jak umieli, sprabavali ŭsio ž źniščyć nienavisnuju hrupu i ad majho imia pačali pisać paviedamleńni adminu pablika. Kali vyjšaŭ z turmy, pabačyŭ, što «ja» apošni raz byŭ na VK 26 listapada, to-bok na treci dzień paśla zatrymańnia (darečy, sam telefon pavinien byŭ u toj čas znachodzicca ŭ zapiačatanym kanviercie ŭ śledčaha SK Michnaŭca, ale inohdaniedazakonaŭ).
Mabyć, u rospačy ad taho, što takaja detalna spłanavanaja apieracyja nie dasiahnuła svaich metaŭ, supracoŭniki źmianili mnie ŭ profili proźvišča z Batujeŭ na Batutieŭ. Nu, choć niejki vynik.
Paśla ŭsich manipulacyj z mabilnikam supracoŭniki milicyi narešcie źniali ź mianie kajdanki, prynieśli moj telefon i pakłali mnie ŭ kišeniu, vyklikali paniatych, jakija akazalisia sutačnikami z salihorskaha izalatara. Ja vykłaŭ telefon na stoł, milicyjanty pakłali jaho znoŭ u kišeniu.
Ja byŭ sprabavaŭ skazać, što jak by nie viedaju, što za hety čas adbyvalisia z maim telefonam, ale im mocna chaciełasia zafiksavać sam fakt vymańnia telefona mienavita z majoj kišeni pry paniatych, tamu major Drabućka nienaviaźliva pacikaviŭsia, ci nie chaču ja atrymać «po je…u». Ja nie chacieŭ, tamu fakt vymańnia telefona navat zaźniaŭ na svaju mabiłu adzin z prysutnych milicyjantaŭ.
Paśla niekalkich hadzin znachodžańnia ŭ RAUSie my taki dajšli da spravy z dypłomam. Ja vietliva admoviŭsia davać niejkija tłumačeńni biez prysutnaści advakata, paśla čaho z dapamohaj niekalkich udaraŭ pa majoj hałavie major Drabućka mianie pierakanaŭ, što darma ja tak.
Zapisali maje tłumačeńni, adkatali maje palcy i źmiaścili ŭ izalatar pa 108 artykule KK RB (niepasredna ŭźnikłyja padazreńni ŭ ździajśnieńni złačynstva).
Za try dni, što ja pravioŭ u izalatary, mianie niekalki razoŭ naviedaŭ vyšejzhadany śledčy Michnaviec. Adzin z dopytaŭ fiksavaŭsia na videa, a paśla frahmient hetaha videa źjaviŭsia ŭ adnym salihorskim telehram-haŭnakanale, takim sabie łakalnym anałahu žoŭtych źlivaŭ.
Kab ja napoŭnicu adčuŭ uvieś smak turemnaha žyćcia, na dopyty mianie vyvodzili tak: spačatku adčyniałasia karmuška, ja, trymajučy ruki za śpinaj, vysoŭvaŭ ich tudy, mnie apranali kajdanki, paśla adčynialisia dźviery, ja vychodziŭ z kamiery, mianie zavodzili ŭ pakoj dla dopytaŭ, zdymali kajdanki, prymušali całkam raspranucca i pramacvali vopratku. Kali viartali ŭ kamieru, usio paŭtarałasia ŭ advarotnym kirunku.
Troški paźniej čałaviek, jaki siadzieŭ pa «ciažkim» artykule i pabačyŭ hety cyrk, zapytaŭ: «b…, a što u ciebia za dieluha takaja, što musara tak ciebia bajacca?»
Praz try dni, a mienavita na taki termin čałaviek moža być zatrymany pa 108 art. KK RB, źjaviŭsia moj śledčy i paviedamiŭ, što vypuskaje mianie pad padpisku ab niavyjeździe, voś tolki za paru hadzin da hetaha
«sudździa» Błocki, vysłuchaŭšy malaŭničy apovied siaržanta Dałajana ab tym, jak ja admaŭlaŭsia padparadkavacca zakonnym patrabavańniam supracoŭnikaŭ milicyi, užo prysudziŭ mnie 15 sutak.
Darečy, mienavita na tym sudzie ja daviedaŭsia, što zatrymlivali mianie supracoŭniki AMAP. Maje pytańni, navošta supracoŭniki AMAP pravodzili zatrymańnie pa artykule, jaki nie źjaŭlajecca hramadska niebiaśpiečnym i čamu mianie nielha było vyklikać u RAUS zvyčajnaj pozvaj, zastalisia biez uciamnaha adkazu.
Paśla «suda» mianie pieraviali ŭ inšuju kamieru. Tam nie było tualetnaj papiery, tamu ŭsie maje pratakoły pastupova byli vykarystanyja pa pramym pryznačeńni.
U pieršy ž viečar u novaj chacie zdarylisia niepryjemnyja pryhody. Aryštantu, ź jakim ja siadzieŭ, stała błaha, jon pahrukaŭ u dźviery i paprasiŭ tabletku. Mient adčyniŭ karmušku i napšykaŭ nam u kamieru hazu. Dobra, što ŭ chacie vielmi dobra pracavała vientylacyja i praz paru chvilinaŭ ad hazu ničoha nie zastałosia, ale ŭražańni nie samyja pryjemnyja.
Na paślazaŭtra situcyja paŭtaryłasia. Ja paprasiŭ ručku ad akna i kali sukamiernik jaje addavaŭ, zazirnuŭ u karmušku, paznaŭ taho samaha mienta-hazavika i vietliva jamu skazaŭ: «A, eto ty, ch..ła!». Nie abviarhajučy hetuju tezu, ja prosta dastaŭ šapku i prycisnuŭ jaje da tvaru. Mient znoŭ napšykaŭ nam hazu, ale hetym razam zusim mała, bo bałon byŭ amal pusty. Pačuŭšy heta, moj sukamiernik pačaŭ kryčać, što moža nabździeć macniej za hety bałon. Dziakuj Bohu, da hazavaha dvuboju nie dajšło.
Pad viečar nas abodvuch pieraviali ŭ inšuju chatu dla zatrymanych pa kryminalnych spravach. Uvieś svoj nastupny termin ja tam i prasiadzieŭ. Praź piatnaccać sutak ja atrymaŭ jašče piatnaccać, bo kapitan Michied «proiźvioł monitorinh sieti intierniet» i vyjaviŭ tam (u internecie) moj instahram, a ŭ im fotazdymak śniehavika z BČB-ściaham i «nieiźviestnoho mužčinu». Nieviadomy mužčyna — heta ja, a śniehavik — heta śniehavik.
Fota było raźmieščana 11 miesiacaŭ tamu, ale heta nijak nie pieraškodziła «sudździ» Rabamu prysudzić mnie čarhovyja 15 sutak.
Padčas druhoha aryštu raptam vyśvietliłasia, što asabista mnie nielha spać na nižniaj škoncy, bo mianie, maŭlaŭ, kiepska bačna pa kamiery. Kamiera ŭ kamiery — heta takaja biełaruskaja rekursija. Taksama
vyśvietliłasia, što mnie nielha čytać. Jak prakamientavaŭ heta moj sukamiernik, «sami tupyje i druhim raźvivaťsia nie dajut».
Usie hetyja «niečakanyja» zabarony zaŭsiody zdaralisia, kali dziažurnym pa izalatary byŭ načalnik IČU padpałkoŭnik Alachnovič. Jon ža na ranišnim šmonie skazaŭ mnie, što «opriedielonnym katiehorijam lic zaprieščieno čitać».
Davodziłasia prydumlać sabie inšyja zaniatki — hulnia ŭ mandavošku, lepka z chleba, mouse-watching. Apošniaje asabliva zachaplalna — uviečary kładzieš pad umyvalnik chleb ci bulbu i čakaješ, kali vylezie myš.
Pa tym, kolki razoŭ unačy brazhajuć karmuški ŭ inšych kamierach, možna było mierkavać, kolki palityčnych znachodzicca ŭ izalatary. Za maje 33 dni ŭ niavoli tam razam sa mnoju znachodziłasia ad 3 da 7 čałaviek. Heta ŭ horadzie z nasielnictvam troški bolšym za 100 tysiač. Kambajn represij haniaje va ŭsiu moc.
Taksama cikavy fakt: ci nie va ŭsich, chto traplaje ŭ miantoŭniu, niezaležna ad pryčyn zatrymańnia praviarajuć telefon. Naturalna, tavaryščaŭ u pahonach bolš za ŭsio cikavić telehram. Prynamsi niekalki čałaviek mnie pra heta kazali.
Sami aryštanty cudoŭna razumiejuć, što robicca ŭ krainie, i da palityčnych staviacca narmalna. Ludzi, ź jakimi ja siadzieŭ, u absalutnaj bolšaści całkam adekvatnyja, časam z pakručastym losam, i, niahledziačy na ich bahaty kryminalny dośvied, u ich tavarystvie adčuvaješ siabie našmat bolš biaśpiečna, čym u kampanii tavaryščaŭ u pahonach. Napeŭna, heta adno z hałoŭnych «dasiahnieńniaŭ» łukašyzmu.
Padčas druhoha administracyjnaha aryštu da mianie niekalki razoŭ prychodziŭ namieśnik načalnika RAUS i raspaviadaŭ pra maje zmročnyja pierśpiektyvy. Maŭlaŭ, ty i hrupu na VK vioŭ ekstremisckuju, i ŭ mitynhu ŭ Minsku ŭdzielničaŭ, a mienavita ŭ toj dzień tam byli «masavyja biesparadki», i ledź nie artykuł za zdradu radzimie tabie možna prymatać. Ale pierad hetym pa maim instahramie mnie nibyta miesiacy z try možna pravieści ŭ izalatary za fatazdymki, dzie prysutničaje naš ściah.
Ale jość alternatyva, skazaŭ namieśnik načalnika RAUS. Možna sustrecca z supracoŭnikam KDB i, mahčyma, jon prapanuje alternatyŭny varyjant.
U takich varunkach ja byŭ vymušany pahadzicca, i taki supracoŭnik źjaviŭsia na nastupny dzień. Vielmi vietlivy dziadźka, jakoha, kab nie abstaviny našaj sustrečy, možna było nazvać pryjemnym surazmoŭcam. Paviedamiŭ, što naziraje za mnoj z pačatku dvuchtysiačnych, što ja viadomy ŭ horadzie čałaviek, miedyjapiersona (tut ja nie vielmi zrazumieŭ), što, maŭlaŭ, u mianie suviazi za miažoj (tut zusim nie zrazumieŭ), i što kali b my znajšli ahulnuju movu, było b cudoŭna. Uzamien ja zmahu pracavać, jak płanavaŭ, staršynioj tavarystva ŭłaśnikaŭ.
Tut ja nahadaŭ pra moj nie zusim sapraŭdny dypłom, ale jon zapeŭniŭ, što heta nie prablema. Taksama zapeŭniŭ mianie, što ŭ vypadku zhody na supracoŭnictva «milicyja zabudiet o mojom suščiestvovanii». Kali ž zhody nie budzie…
Hetyja pierśpiektyvy mnie ŭžo abmalavaŭ namieśnik načalnika RAUS. Ja pasprabavaŭ daviedacca, što ja budu pavinien zrabić u adkaz, ale ŭciamnaha adkazu tak i nie atrymaŭ. I vyrašyŭ pahadzicca na «supracoŭnictva».
Kadebist dastaŭ list i asadku i pačaŭ dyktavać «ja, imia, proźvišča, abaviazvajusia supracoŭničać, zachoŭvać u tajamnicy, prašu pryznačyć mnie apieratyŭny psieŭdanim». Voś na psieŭdanimie mnie zrabiłasia śmiešna i kadebist skazaŭ «da, da, kak v kino».
Tut ja spytaŭsia, ci daduć mnie psieŭdanim Aston Martin, jak u Bonda. Aston Martin mnie nie paabiacali, ale skazali, kali ja ŭžo ŭzhadaŭ Bonda, tak i pisać «apieratyŭny psieŭdanim Bond». Pad hetym tekstam podpis, datu kadebist skazaŭ nie stavić.
Mahu tolki zdahadvacca čamu paznačać datu nie treba było, ale liču važnym adznačyć — hetaja razmova adbyvałasia 22 śniežnia 2021 hoda
26 śniežnia 2021 hoda ja vyjšaŭ ź izalatara i adrazu ž raspavioŭ blizkim, što zaraz ja ahient Bond. Praź niekalki dzion maja siamja vyjechała ź Biełarusi ŭ biaśpiečnaje miesca.
Ja źbiraŭsia źjechać adrazu ŭ tym ža kirunku, ale ŭ salihorskim izalatary ŭsie nary stalnyja, a matracu ŭ mianie, jak i va ŭsich palityčnych, nie było, i ja vielmi mocna prastyŭ dy byŭ vymušany trochi padlačycca.
Ahučvajučy publična fakt vymušanaha padpisańnia mnoj zajavy ab supracoŭnictvie z KDB, ja ŭ adnabakovym paradku jaje razryvaju i publična śviedču, što nie źbirajusia supracoŭničać z hetaj strukturaj nijakim čynam.
Za čas, što pravioŭ u statusie ahienta Bonda, ja nie padpisaŭ nijakich inšych papieraŭ i nijakim čynam nie ŭstupaŭ va ŭzajemadziejańnie z «kamitetam». Praz maje dziejańni nie paciarpieŭ nichto, aproč mianie i majho honaru.
Pra svoj adjezd ź Biełarusi bolš padrabiazna raspavieści nie mahu — na žal, šmat kamu hetyja šlachi jašče mohuć spatrebicca, ale ahułam časam nahadvała kino pra špijonaŭ.
Učora śledčy Michnaviec vyklikaŭ «na razmovu» majho brata i prasiŭ mnie pieradać, što kryminalnaja sprava ŭ dačynieńni da mianie spynienaja. Apošniaja chitraść, tak by mović.
Čytajcie taksama:
Biełarus piać hadoŭ pražyŭ na Jamale. Hutarka pra purhu, niencaŭ, ałkahol i hrošy
«Nad mnoj pravodzili ekśpierymienty». Piśmieńnik Sieviaryn Kviatkoŭski raskazaŭ, što ź im adbyvałasia za kratami
Z butelkaj pad hałavoj. Andrej Dyńko apisaŭ svoj turemny dośvied u balučym tekście
«Ludziej dahetul praciahvajuć katavać». Žurnalistka Kaciaryna Karpickaja raskazała pra svoj miesiac na Akreścina
