Fota: zarya.by
Naradziłasia niedanošanaj i zmahałasia z chvarobami
Huśkovaj 29 hadoŭ. Budučaja čempijonka rodam ź Minska, pryčym, naradziłasia jana šaścimiesiačnaj, z vahoj 1,55 kiłahrama. Praz heta, jak śviedčyła sama dziaŭčyna, u dziacinstvie jana časta mieła prablemy sa zdaroŭjem: prychodziłasia lažać pad kisłarodnaj maskaj, navat niejak spyniałasia serca, ale ž miedyki dapamahli ŭstać na nohi.
Hanna ŭ sporcie z samaha dziacinstva. Pačynała z mastackaj himnastyki, kudy patrapiła jašče ŭ dziciačym sadku.
A kali Huśkovaj spoŭniłasia siem, nadyšoŭ čas frystajła: siabar siamji, Uładzimir Daščynski (baćka adnaho z trenieraŭ zbornaj Dźmitryja Daščynskaha), paraiŭ pasprabavać dziaŭčynku ŭ hetaj dyscyplinie. Razam ź im i inšym trenieram, Juryjem Kupracevičam, Huśkova i pačynała svoj šlach u hetym vidzie sporta.
Cikava, što paźniej jana nieadnarazova kazała: na toj momant nichto i nie pytaŭsia, ci chočacca joj samoj zajmacca frystajłam. Hanna ŭspaminaje, što, kali była maleńkaj, časam nie nadta chacieła chadzić na treniroŭki. Ale, kali dabrałasia da surjoznych startaŭ, narešcie adčuła azart da novych dasiahnieńniaŭ.
Hetaje i astatnija fota: anita_guskova / Instagram.
U 2005 hodzie Huśkova trapiła ŭ darosłuju zbornuju krainy, a ŭ trynaccać hadoŭ vystupiła na pieršym surjoznym turniry — adkrytym čempijanacie Rasii. Potym pajšli kubki Jeŭropy i śvietu, a paźniej źjavilisia i pieršyja miedali: u 2012 hodzie na junijorskim čempijanacie śvietu Huśkova ŭziała srebra.
Pierad pieršaj Alimpijadaj straciła baćku
Niezadoŭha da svaich pieršych Hulniaŭ u Sočy-2014 Huśkova pieraniesła apieracyju na kalenie, paśla jakoj nie zdoleła na toj čas całkam adnavicca. Heta adbiłasia na vynikach: junaja biełaruska nie ŭtrymałasia na nahach paśla skačka i akazałasia na toj Alimpijadzie tolki 21-j.
Za hod da hetaha ŭ žyćci spartsmienki zdaryłasia jašče adna drama — Huśkova straciła baćku. Toj pieryjad jana zhadvaje jak vielmi ciomny.
Ale dalej u Hanny nibyta pačałasia śvietłaja pałasa: u studzieni 2015 hoda Huśkova ŭziała svoj pieršy miedal — bronzu, na Kubku śvietu pa frystajle. Ale ž znoŭ pačalisia prablemy sa zdaroŭjem: paškodžańnie mieniska, razryŭ kryžapadobnaj źviazki na pravym kalenie i dalejšyja apieracyi pryviali da taho, što ŭ kalenie spartsmienki źjavilisia dźvie tytanavyja šruby.
Adnaŭlacca pryjšłosia doŭha, Huśkova całkam prapuściła siezon 2016/2017. A kali viarnułasia, uziała pa vynikach druhoje miesca ŭ zaliku Kubka śvietu.
U 2018 hodzie ekśpierty nie bačyli ŭ Huśkovaj pretendentku na alimpijski miedal. Ale sama Hanna rychtavałasia da surjoznaj baraćby i vybrała dla vystupu składanuju prahramu. Padčas pryziamleńnia frystajlistka dakranułasia rukoj da śniehu. Adnak heta nie pieraškodziła joj stać čempijonkaj: srebranaja miedalistka Pchiončchana Čžan Siń adstała ad Huśkovaj na 0,62 bała.
Paśla alimpijskaha zołata znoŭ pakutavała ad traŭmy
Paśla toj Alimpijady Hanna znoŭ prapuściła siezon: padviało kalena. U lutym 2020-ha, na apošnim pierad pandemijaj etapie Kubka śvietu, Huśkova ŭziała zołata, čym adznačyła svajo viartańnie ŭ sport.
Bukmiekiery nie nadta vieryli ŭ pośpiech Huśkovaj dy i inšych biełaruskich frystajlistaŭ u Piekinie. Naprykład, brytanskaja firma bet365 aceńvała šansy Hanny na čempijonstva z kaeficyjentam 13, joj pradrakali miesca, nie vyšejšaje za šostaje.
Mahčyma, na čakańni kantor upłyvała i toje, što sioletniaja Alimpijada — pieršyja za doŭhi čas Hulni, dzie biełarusam nie dapamahaje Mikałaj Kazieka, šmathadovy zorny trenier našaj zbornaj pa frystajle.
U ciažki čas nie chavała svaju hramadzianskuju pazicyju
Letam 2020 hoda Hanna, jak i šmat chto ź jaje kaleh sa zbornaj pa frystajle, padpisała list spartoŭcaŭ za sumlennyja vybary.
Paźniej inšy padpisant hetaha lista, trenier Mikałaj Kazieka, trapiŭ pad presinh z boku uładaŭ za svaju hramadzianskuju pazicyju.
Tady spartoŭcy biełaruskaj zbornaj pa frystajle skłali i padpisali adkryty list u padtrymku svajho treniera. Podpis Huśkovaj pad im taksama staić.
Varta adznačyć, što da takoj pazicyi Hanna pryjšła nie adrazu. Tak, u 2019 hodzie ŭ adkaz na pytańnie pra toje, jak jana stavicca da Łukašenki jak da kiraŭnika Biełarusi, Huśkova adkazvała: «U našaj krainie mianie šmat što zadavalniaje».
Što da cikaŭnaściej, to Huśkova maje niekalki tatuirovak. Siarod ich — puma, kvietka ź piarom i nadpis na łatyni, jaki pierakładajecca jak «imknucca ŭvierch».
Hanna — fanatka rok-muzyki i navat chacieła, kali joj było 16, stvaryć ź siabrami rok-hurt. U 2015 hodzie, kali ŭ Minsk pryjazdžaŭ amierykanski kalektyŭ 30 seconds to Mars, Huśkova zabrałasia padčas kancerta na scenu i apynułasia ŭ niekalkich mietrach ad frontmena hurta Džareda Leta.
