Mety abvieščanaj A.Łukašenkam u Lachavickim rajonie revalucyi ŭ śvinahadoŭli tyja ž, što i ŭ «aranžavaj» — praz dva hady «žyć, jak u Jeŭropie». Fieljeton Lolika Uškina.
Luty 2014 hoda. Rasija. Dzień vybaraŭ prezidenta. Štab demakratyčnaj apazicyi. Usie prysutnyja tupa hladziać ŭ cielek.
Dyktar na ekranie: Pavodle aficyjnych dadzienych CVK, Dźmitryj Miadźviedzieŭ nabraŭ 74% hałasoŭ, Žyrynoŭski — 12%, Ziuhanaŭ — 6%, Bahdan Isakavič Saakabidze‑Dudajeŭ (niezaležny kandydat) — 4%, Anatol Kasparaŭ (demakratyčnaja apazicyja) — 1,5%.
Usie prysutnyja: Kolki‑kolki?
Dyktar: Prabačcie. Adbyłasia pamyłka. U kandydata ad demakrataŭ 0,04% hałasoŭ. A zaraz — rekłama srodku dla čystki ŭnitazaŭ «Damiestas».
Maŭčańnie.
Kaśjanaŭ: U kaho jość kanśpiekt?
Limonaŭ: Jaki kanśpiekt?
Kaśjanaŭ: Kanśpiekt lekcyj pa arhanizacyi śviniačych revalucyj. Pamiataješ sieminar u Minsku ŭ 2012‑m «Parasiačaja revalucyja jak novaje słova ŭ praktycy aranžavaj revalucyi»? Nu, ich čytaŭ u łahiery na bazie KDB taki vysoki kačok. Jak jaho — Jan Usievaładoŭski…
Limonaŭ: Dy ja bolšaść lekcyj prahulaŭ. Hetak chaciełasia pabačyć biełarusaŭ, jakija stali žyć, jak u Jeŭropie…
Kasparaŭ: U mianie ŭsie chady zapisanyja! Zaraz pahladžu. Lekcyja «Karmleńnie śvinamatak». Heta nie toje. Sieminar «Kupańnie narodžanych parasiat». Nie toje. Aha, voś: «Budaŭnictva śvinakompleksu na 50 tysiač hałoŭ». Mienavita z takoha «piłota», jak zapisana ŭ kanśpiekcie, pačałasia ŭ Biełarusi revalucyja ŭ śvinahadoŭli. Dziakujučy joj, darečy, biełarusy žyvuć ciapier u Jeŭropie, a my dasiul pakutujem pad pryhniotam «kryvavaj hebni».
Limonaŭ: Kažacie, śvinakompleks? A jon vytrymaje DOS ataku?
Kasparaŭ: Dakładčyk kazaŭ, što maje vytrymać.
Limonaŭ: Tady napierad! Niachaj žyvie rasijskaja demakratyja!
Demakraty vysypali na vulicu. Ich adrazu padtrymaŭ prosty rasijski lud, jaki ŭžo stamiŭsia ad tandemu Pucina—Miadźviedzieva. Na Čyrvonaj płoščy natoŭpam byŭ stychijna pabudavany pa dackich i hałandskich technałohijach śvinakompleks na 50 tysiač hałoŭ. Parsiukoŭ karmili ŭsim śvietam. Hurty «DDT» i «Leninhrad» davali dla ich biaspłatnyja kancerty. Zachodnija demakratyčnyja palityki pryjazdžali vykazać zachapleńnie padziejami.
Chutka takija śvinakompleksy vyraśli i ŭ inšych haradach Rasii. Kramloŭskaja administracyja nie viedała, što rabić z usienarodnym rucham demakratyčnaj śvinahadoŭli. U vyniku pucinski kłan pahadziŭsia pajści na pieramovy z apazicyjaj. Vyniki vybaraŭ pieraličyli. Jak akazałasia, heta nie Miadźviedzieŭ, a Kasparaŭ nabraŭ 74% hałasoŭ. U Rasiju pryjšła demakratyja. Adnak Jeŭropaj čamuści nie pachła.
Demakraty znoŭ paleźli ŭ kanśpiekt lekcyj i z žacham zrazumieli svaju kanceptualnuju pamyłku. Jany prapuścili važny abzac, pryśviečany roli ŭ revalucyjnym pracesie sałomy. A miž tym hałoŭny tearetyk biełaruskaj prajeŭrapiejskaj revalucyi jasna skazaŭ: «Rastrasicie jaje, potym dadajcie kalij abo azot. Kali zaraz my dadamo heta ŭhnajeńnie, u nas buduć raźviazanyja ruki ŭviesnu».
Demakraty schapilisia za hałavu, adnak rabić niešta było pozna. Rasija ŭpuściła ŭnikalny šaniec viarnucca ŭ Jeŭropu. Chutka kraina znoŭ trapiła pad kantrol režymu kiravanaj demakratyi.
