Va ŭmovach sankcyj i błakavańniaŭ zamiežnych sacsietak karystalniki pačali aktyŭna spampoŭvać rasijskija mabilnyja prahramy JaRus i TenChat. 7 sakavika abodva servisy ŭvajšli ŭ top-10 samych zapatrabavanych dadatkaŭ u Rasii ŭ katehoryi sacsietak. Da 10 sakavika TenChat akazaŭsia na druhim miescy, abahnaŭšy «UKantakcie» i WhatsApp, a JaRus — na piatym.
JaRus — sacsietka, jakaja zaklikanaja «zamianić YouTube, TikTok, Twitter i Instagram u adnym dadatku».
Servis pačaŭ aktyŭna raźvivacca sa studzienia 2022 hoda i ciapier u sacyjalnaj sietcy zarehistravana bolš za dva miljony karystalnikaŭ ad 12 da 45 hadoŭ.
Paśla zapampoŭki prahramy JaRus prapanuje zarehistravacca z dapamohaj numara telefona, uvajści praz akaŭnt Apple, Google abo «Jandeks», staronku va «UKantakcie» abo ŭ «Adnakłaśnikach». Paśla rehistracyi karystalnik traplaje na hałoŭnuju staronku z abviestkaj-papiaredžańniem ab niestabilnaj pracy servisu praz «kibierataki z terytoryi ZŠA i Jeŭropy».
Na hałoŭnaj staroncy vyvodzicca «hałoŭnaja stužka», jakaja nahadvaje stužku «Ukantakcie» — na joj hetak ža pakazvajucca publikacyi resursaŭ, na jakija padpisany karystalnik, papularnyja pasty, navinavyja paviedamleńni i videa.
Naviny JaRus źbiraje ŭ asobnaj ŭkładcy — materyjały vydańniaŭ z «ptušačkaj» možna čytać u ahulnaj stužcy, piersanalizavaŭšy ich, vybraŭšy intaresy, abo adfiltravać pa rehijonie. Siarod ŚMI, jakija publikujuć naviny ŭ JaRus — «Kommiersant», RBK, Lenta.ru, «Rasijskaja hazieta», Sputnik, RT i inšyja. Pačytać zamiežnyja krynicy nie atrymajecca.
Rus źbiraje videa ź dzieviaci chostynhaŭ, uklučajučy YouTube, RuTube i TED. U raździele «siužety» publikujuć karotkija viertykalnyja roliki, jakija nahadvajuć farmat TikTok. Mnohija Videa tam — pierazalivy z Tyktoka, ale sustrakajecca i ŭnikalny dla sacsietki kantent.
Teenchat
Teenchat, u adroźnieńnie ad JaRus, pazicyjanujecca jak prahrama dla biznesu i zamiena servisu LinkedIn. Raspracoŭščyki natchnialisia kitajskaj sacsietkaj WeChat.
Pry rehistracyi prahrama prapanuje vybrać «scenaryj atrymańnia dachodu» — paznačyć, ci źjaŭlajecca karystalnik uładalnikam biznesu, supracoŭnikam kampanii abo fryłansieram. Zatym u servisie možna vybrać svaje prafiesijnyja intaresy i zapoŭnić asabistuju staronku infarmacyjaj ab adukacyi, navykach i vopycie raboty.
Hałoŭnaja «fiška» servisu — «Biznes.Cinder»: šukać pracadaŭcaŭ, kaleh i supracoŭnikaŭ u im možna z dapamohaj svajpaŭ kartak z asnoŭnaj infarmacyjaj pra ich. Pry ŭzajemnym svajpie naprava (uzajemnym adabreńni kandydatur adzin adnaho) karystalniki mohuć pačać dziełavuju pierapisku ŭ miesiendžary.
Niahledziačy na pavyšanuju papularnaść rasijskich sacsietak, VPN-servisy karystalniki zapampoŭvajuć jašče čaściej, tamu masavy sychod rasijan z zamiežnych płatformaŭ naŭrad ci adbudziecca chutka.
