Fota: sacyjalnyja sietki
Siarod pradmietaŭ, jakija vieŭ vykładčyk, — fiłasofija, arhumientacyja i krytyčnaje myśleńnie, fiłasofija navuki. Učora Andrej Łaŭruchin napisaŭ zajavu na zvalnieńnie.
«Ja pieražyŭ šok, kali ŭnačy z 23 na 24 lutaha daviedaŭsia sa ŚMI, ad ukrainskich kaleh i siabroŭ pra pačatak vajny suprać Ukrainy, — kaža vykładčyk. — Mnie stała zrazumieła, što tut niemahčyma zajmać «niejtralnuju» pazicyju, i tamu ja źviarnuŭsia z zaklikam da kaleh jak minimum nie zamoŭčvać situacyju, a jašče lepiej pačynać pratesny ruch. Mnie padavałasia i padajecca ciapier, što najbolš efiektyŭnaja i biaśpiečnaja forma pratestu — zabastoŭka.
Na zaniatkach sa studentami my jakraz padyšli da temy «Etyka, maral, palityka» i nie abmiarkoŭvać aktualnuju temu vajny va Ukrainie było niemahčyma. Ale ž ja atrymaŭ, na vialiki žal, vielmi kisły vodhuk ad svaich rasijskich kaleh.
Bolšaść ź ich znoŭ pajšła šlacham tak zvanych «małych spraŭ», jakija ŭ hetaj situacyi byli vidavočna nieadekvatnymi. A taksama kisły vodhuk ad studentaŭ. Bolšaść ź ich adčuvała razhublenaść i sumnieŭ u svaich zdolnaściach supraćstajać vajnie i abstavinam».
Fota: sacyjalnyja sietki
«Akademičnaje charakiry» padałosia mnie adzinym šlacham uratavańnia ad pahrozy stać pasiŭnym saudzielnikam»
Paźniej Andrej ubačyŭ zvaroty rektaraŭ 185 vyšejšych navučalnych ustanoŭ Rasijskaj Fiederacyi da Uładzimira Pucina. Usie jany vykazvali padtrymku tak zvanaj «śpiecapieracyi».
«Trochi paźniej niekatoryja akademičnyja supolnaści zrabili alternatyŭnyja zvaroty da Pucina i hramadskaści z asudžeńniem vajny va Ukrainie. Siarod ich była i akademičnaja supolnaść Vyšejšaj škoły ekanomiki, što, viadoma, pryjemna, — kaža vykładčyk. — Ale ž usim było z samaha pačatku zrazumieła, što papiarovym zvarotam vajnu ŭžo nie spynić, i tut byli patrebnyja bolš mocnyja arhumienty. Na žal, rasijskaja akademičnaja supolnaść akazałasia na ich niazdolnaj.
I tady mnie stała zrazumieła, što ja praciaham vykładčyckich abaviazkaŭ i samoj svajoj prysutnaściu ŭ «Vyšcy» ažyćciaŭlaju pasiŭny ŭdzieł u vajnie suprać Ukrainy.
Taki ŭdzieł u svoj čas niamieckaja fiłosafka Hanna Arendt nazyvała «banalnaściu zła»: «usio idzie pa płanie» — my pracujem, płacim padatki i vykonvajem svaje vykładčyckija i hramadzianskija abaviazki dziaržavie-ahresaru zhodna z ustalavanym paradkam. I pry hetym robim vyhlad, što byccam by žyviom u narmalnym, a nie zvarjaciełym hramadstvie. Mienavita tamu ja zrabiŭ svoj maralny vybar i syšoŭ.
U takich abstavinach «akademičnaje charakiry» padałosia mnie adzinym šlacham uratavańnia ad pahrozy stać pasiŭnym saudzielnikam u vajennaj ahresii. A taksama ŭ maŭklivym hramadskim «adabrams» na źniščeńnie dziaciej i ŭsich mirnych ludziej va Ukrainie».
Niepasrednaje kiraŭnictva pastaviłasia da takoha rašeńnia Andreja z razumieńniem i pavahaj. A z boku bolš vysokaj administracyi pačalisia sihnały, što z vykładčykam treba pravieści razmovu.
«Darečy, heta było źviazana z danosam ad adnoj sa studentak, jakaja paskardziłasia na mianie, što ja na zaniatkach abmiarkoŭvaŭ «śpiecapieracyju va Ukrainie» i nie daŭ joj słova ŭ jaje padtrymku. Maŭlaŭ, ja spasłaŭsia na arhumient: «Vam budzie dadzienaje słova, kali napaduć na vašu krainu». Ale ž heta nie tak — słova ja joj daŭ i navat pastaviŭ joj samuju vysokuju adznaku mienavita tamu, što viedaju svaje prafiesijnyja abaviazki.
Ja nie daŭ joj paŭtarać adzin i toj ža tezis ab «apraŭdanaści śpiecapieracyi rasijan suprać ukraincaŭ» šmat razoŭ — heta tak. I pakolki studentka była hramadziankaj Kazachstana, ja vykarystaŭ hety zvarot mienavita u kantekście dadzienych dla čytańnia materyjałaŭ: kasmapalityčna adčuvać čužy bol, jak svoj.
Hety vypadak danosu i reakcyi vyšejšaj administracyi staŭ jašče adnym vielmi istotnym šturškom dla pryniaćcia majho kančatkovaha rašeńnia sychodzić. Ja napisaŭ zajavu 23 sakavika, ale ž praces zvalnieńnia praciahvajecca. Ciapier ad mianie patrabujuć źmianić farmuloŭku na standartny vyraz «pa asabistym žadańni». Ja prapanavaŭ kampramisny varyjant: «pa asabistym žadańni ŭ suviazi z vajnoj va Ukrainie». Tam z farmuloŭkaj nie zhadžajucca», — kaža Andrej.
«U svajoj bolšaści studenty byli zasmučanyja, što ja sychodžu»
Niahledziačy na hety adzinkavy vypadak z danosam, z bolšaściu studentaŭ u Andreja było maralnaje i palityčnaje parazumieńnie. Heta natchniała vykładčyka.
«Asabliva, kali paśla žudasnych kadraŭ bambavańniaŭ i zabojstvaŭ mnie treba było «vykładać pradmiet».
Darečy, šmat studentaŭ padziakavała mnie za śmiełaść i ščyraść u abmierkavańni aktualnych padziej vajny va Ukrainie, pytańniaŭ pra kalektyŭnuju adkaznaść rasijan za ŭsio, što adbyvajecca, pra vajnu jak hvałtoŭny instrumient u palitycy, pra rolu hramadzianskaj supolnaści i prava studentaŭ na pratest suprać vajny.
Ja atrymaŭ vielmi istotnyja dla mianie jak vykładčyka, hramadzianina i čałavieka słovy padtrymki i pavahi ad vielmi razumnych i talenavitych studentaŭ i studentak «Vyški».
U svajoj bolšaści studenty byli zasmučanyja, što ja sychodžu. Ale ž heta pakul što ŭsio, na što jany zdolnyja — nijakich masavych pratestaŭ suprać vajny my, na žal, nie ŭbačyli. Tut treba, kaniečnie, udakładnić, što maje studenty — heta pieršy kurs.
Na ich katastrofa abrynułasia raptam, i jany ciapier razhublenyja, praz mnohija siemji prajšoŭ dramatyčny maralna-palityčny padzieł, jaki studenty jašče nie paśpieli asensavać.
Niekatoryja ź ich užo adsiadzieli na sutkach za pratesty na vulicach Sankt-Pieciarburha. Usie studenty bačać, što vychad na vulicy nie moža spynić vajnu, i nie viedajuć, što rabić, jany adčuvajuć siabie ŭ mienšaści (jak, darečy, i ja ŭ Rasii) i demanstrujuć dobra viadomy biełaruskam i biełarusam sindrom «vyvučanaj biezdapamožnaści», — kaža Andrej.
Ciapier vykładčyk šukaje pracu. Spadziajecca, što znojdzie jaje ŭ vyšejšaj navučalnaj ci ŭ daśledčaj ŭstanovie Vilni, dzie znachodzicca jaho siamja.
«Ja adkryty da usich prapanoŭ i mahčymaściaŭ pracy ŭ adukacyjnych, daśledčych i hramadskich arhanizacyjach», — kaža jon.
«Spaleny dom i ciahniki, na jakija niemahčyma siesci». Što ciapier śnicca biełarusam
«Naš vielmi cichi pratest — heta bajaźlivaść ci razumny kłopat pra ŭłasnuju biaśpieku?» Što ciapier chvaluje biełarusaŭ
