Valer Karbalevič staŭ novym hościem jutub-kanała «Žyćcio-malina». Zapisali niekalki jaho nazirańniaŭ ź intervju.

Karbalevič adznačaje, što byŭ ździŭleny ŭzroŭniem padtrymki vajny rasijskim hramadstvam, u tym liku rasijskaj dyjasparaj — ludźmi, što žyvuć u zachodnich demakratyčnych krainach:

«Heta adlustravańnie toj impierskaj śviadomaści, jakaja jość u Rasii i jakaja adbivajecca na častcy hramadzian tych krain, jakija ŭźnikli na postsavieckaj terytoryi. My majem spravu z postimpierskim sindromam — psichałahičnym kryzisam u hramadzian krainy, jakaja straciła status vialikaj dziaržavy. Taki sindrom uźnik na postsavieckaj prastory, asabliva na terytoryi Rasii, paśla raspadu Savieckaha Sajuza. I Pucin na hetym vielmi dobra zhulaŭ».

Palitołah prahnazuje, što ciaham biahučaha hoda vajna va Ukrainie skončycca, ale niezaležna ad vynikaŭ Rasija ŭžo prajhrała, bo tyja sankcyi, jakija ŭviedzienyja zachodnimi krainami, razburajuć ekanomiku, jany vykidajuć Rasiju ź siońniašniaha hłabalnaha śvietu.

Karbalevič kaža, što, chutčej, schilajecca da dumki ab niaŭdziele biełaruskich vojskaŭ u vajnie, a ŭ samoj Biełarusi prahnazuje zachavańnie represij na siońniašnim uzroŭni.

Razvažajučy ab mahčymaj budučyni Łukašenki, palitołah adznačaje, što ŭ 2025 hodzie toj, chutčej za ŭsio, sydzie z pasady prezidenta, ale moža ŭznačalić Usiebiełaruski narodny schod i praciahvać realna kiravać Biełaruśsiu.

Kali ad jaho budzie zaležać, chto stanie nastupnym prezidentam, Łukašenka abiare na hetuju pasadu čałavieka, mahčyma, nie sa svajho ciapierašniaha atačeńnia, u jakoha adsutničajuć palityčnyja ambicyi i jaki hatovy jamu padparadkoŭvacca.

Karbalevič prahnazuje, što paśla źmieny isnaha palityčnaha režymu Biełaruś uvojdzie ŭ jeŭrapiejskija intehracyjnyja pracesy.

Biełaruś čakaje dełukašenizacyja, kaža palitołah. Režym Łukašenki biez samoha Łukašenki isnavać nie moža.

«Nikoli raniej za tryccać hadoŭ isnavańnia niezaležnaj Biełarusi ŭnutrypalityčnaja situacyja nie zaležała ad źniešnich faktaraŭ. Hetaja vajna Rasii z Ukrainaj vielmi mocna budzie ŭpłyvać na toje, što budzie adbyvacca ŭ samoj Biełarusi. Ad vyniku hetaj vajny zaležać tyja pracesy, jakija adbuducca ŭ Biełarusi».

Palitołah adznačaje, što ciapier u Biełarusi jość pieradumovy dla buntu elit. Łukašenka byŭ simvałam stabilnaści. Bolej za 25 hadoŭ heta była hałoŭnaja ideałahiema prapahandy: chaj my nie vielmi bahata žyviom, ale ŭ nas nijakaj vajny, nijakich pratestaŭ. Paśla 2020 hoda akazałasia, što Łukašenka źjaŭlajecca hałoŭnym destabilizataram. Niama stabilnaści ŭnutry krainy, bo ludziej chapajuć na vulicy, niama stabilnaści dla biznesu, bo jaho raskułačvajuć, niama stabilnaści ŭ adnosinach z susiedziami, bo mienavita Łukašenka arhanizavaŭ mihracyjny kryzis u minułym hodzie.

Łukašenka źjaŭlajecca krynicaj tych sankcyj, jakija abrynulisia na Biełaruś. Dla krainy ŭvohule i navat dla namienkłatury trymańnie ŭłady Łukašenkam stanovicca ŭsio bolš darahim.

Karbalevič adznačaje, što va ŭmovach admovy krainaŭ Zachadu ad rasijskich enierhanośbitaŭ adzinym rynkam zbytu zastaniecca Kitaj, jaki faktyčna budzie dyktavać Rasii ceny. U takich umovach niama havorki pra hramadnyja dachody ad handlu naftaj i hazam, jakija byli da vajny. Praces dehradacyi Rasii budzie praciahvacca.

«U hetaj vajnie z usim śvietam, najpierš Zachadam, u Rasii šancaŭ vyjhrać niama nijakich. Kali hetuju vajnu prajhraŭ Saviecki Sajuz, jaki mieŭ našmat bolš resursaŭ, jaki mieŭ sajuźnikaŭ, jaki mieŭ niejkuju ideałohiju, jakuju padzialali 40% nasielnictva ziamli, dyk ciapier hetaha niama. U Rasii faktyčna adzin sajuźnik — Biełaruś. Tamu pierśpiektyvy Rasii vielmi zmročnyja».

Razvažajučy ab prablemach Biełarusi, Karbalevič kaža, što 70% tavaraŭ, jakija našaja kraina pradavała ŭ Jeŭropu, trapili pad sankcyi, situacyja vidavočna budzie horšać i małavierahodna, što ŭ takich umovach možna raźličvać na surjoznuju dapamohu Rasii.

«Biełaruś pryviazanaja da hetaha rasijskaha tytanika, jaki ŭpeŭnienym kursam ruchajecca na skały».

Клас
1
Панылы сорам
0
Ха-ха
0
Ого
0
Сумна
2
Абуральна
0